1 Fɔŋ-kənu ndə nchəŋnchəŋ-ɛŋ, ndʉʉmɛ, mɔ nɔ kàhə bii shʉ́əshʉ́ə mbɔ, b̈ii kə́ gháaNyii, kə́ fʉ̀ʉtə Nyii mbɔ ɔ̈ kɔ́ fɔbə ndə bəbɛʼbʉə tʉʼ byúu, kə́ gháaNyii yie-bəbɛʼbʉə bɔŋleʼ kɔ́ ndɔ tʉ Nyii yie bʉə bənchəŋ, 2 yie bəfɔŋ leʼnə bʉə bənchəŋ ndə bɔ̂ŋ dùʼ ndəŋ yəŋkwɛʼtəŋbə, yəŋbə chʉʼ yùtə b̈ʉʼʉ dùʼ nə fyiighʉ́ənə, m̈əchimbi-yʉʼʉ kə́ kɔ́ kuŋhə tʉ Nyii bɔŋleʼ tə́nə ndyʉndyʉ shʉ bəbɛʼbʉə. 3 Yɔ̄ŋ-yə nɔ bʉ̀ʉ bɔŋleʼ chìi ẗʉʉ Nyii Ŋkwaa-yʉʼʉ kə́ bɛ jyujyu, 4 ndə ɔ kʉ̀ʉ mbɔ b̈ʉə bənchəŋ kie ŋkwaa bɔŋleʼ kínə shʉəŋ. 5 Bʉʼka mbyu Nyii nɔ bɛ imɔʼ, nə mbyu lìʼ ntuu-yʉʼʉbə Nyii imɔʼ, kə́ bɛ Klai Jiso ndə mbəŋ-ɛŋ bɛ woməsʉʉ. 6 Nɔ bɛ ɔ ndə ɔ kɔ́ ŋwɔŋ-ɛŋ ndə məchʉ̀ʼ tʉ-bʉəməsʉʉ-kə bənchəŋ. Nɔ kə bɛ cheʼkə ndə i kə gwè ndə ndʉʉ ndə i kʉ̀ʼnə, ndə mədʉ̀ʼ mbɔ Ñyii nɔ kʉ̀ʉ mbɔ b̈ʉə bənchəŋ kie ŋkwaa. 7 Nɔ bɛ nukə nɔ ndə i kə chìi bə tə́ŋ mɔ nə wo lɔ̀ʼ kəŋgieNyii leʼnə lɔntəŋNyii leʼnə wo ndə ɔ bu kə́ dàhə bʉə ndə gòʼ təmə bɛ bʉə-Juu fɛ, ndə məmɔ̀ʼfyii ndəŋ Nyii leʼnə ŋgie-shʉəŋ-kə. Mɔ tʉʼ chʉ̀ə lɛɛŋkə fɛ, mɔ nɔ tʉʼ gìe shʉəŋ.

8 Mɔ nɔ kʉ̀ʉ mbɔ mu yəŋbə inchəŋ b̈ələŋ chɔ̀ʼhə ghɔbə ndə i bɛ itʉ́ʉnə kɔ́ ghɔʼ gháaNyii təmə kie tʉʉbʉə byuunɔ kə́ túŋ bəŋʉʉ fɛ. 9 Mɔ nɔ kʉ̀ʉ ghɔ mbɔ b̈əke bɛ ntəŋntəŋ ndə məshʉ̀tə ŋwɔŋtə-ʉə, bɛ jyujyu bɔŋleʼ bɛ kʉ̀ʼnə. Mɔ kʉ̀ʉ mbɔ b̈ɔ̂ŋ kə́ bɔ́ tʉbə təvɛʼtəvɛʼ fɛ, təmə kə́ véʼ nyiinyɔmə ndə bə chìi nə goo fɛ ghɔŋbə ghʉəʼ-kwii-chuɔŋ-chyʉʉchyʉʉ-bə ndə bə chìi nə ŋgoʼbɛʼ bə kə́ tíi nə bee leʼnə ndyi-kyʉə-hə fɛ. 10 B̈ɔ̂ŋ bɔŋ shʉ̀tə ŋwɔŋtə-ʉə bə nə fɔʼ-jyujyu-tə ndə bɛ nubə ndə i kʉ̀ʼnə tʉ bəke ndə bɔ̂ŋ tʉʼ ghɔ̀ŋ mbɔ bɔ̂ŋ tʉʼ chí mbi ndə ntɛ ndə i tʉʼ kɔ́ kuŋhə tʉ Nyii. 11 B̈əke bɔ́nə chutə-ʉə bɔŋleʼ ké ŋwɔŋ-yʉə inchəŋ ndʉʉ ndə bɔ̂ŋ tʉʼ yétə nubə. 12 Mɔ bɛ́ŋ mbɔ ẅoke kə́ dàhə byuunɔ gìe hə kətʉ bələŋ fɛ, bɔŋ nɔ kie ndə məbɔ́nə chutə-ʉə. 13 Bʉʼka bə nɔ nə fəŋ bɔ́ŋ Adaŋ, buŋ bɔ́ŋ If. 14 Təmə bə bɔŋ kə fə́ʼhə Adaŋ fɛ, bə nɔ nə fə́ʼhə mbʉ woke, ɔ bə́ʼ nuʼ-Nyii. 15 Bɔŋ Nyii bu kwáa woke tíŋ hə bɔ̌ŋ bikə, kaʼ ɔ lyʉ̀ʉtə́nə ndə məmɔʼfyii-i ndəŋ Nyii, kie ŋkʉ̂ʉ, lʉ̀ ŋwɔŋ-ɛŋ ŋkʉʉ bɔŋleʼ kə́ yá ŋwɔŋ-ɛŋ.