Família

19 uvako aba kechi ne lage kechi, naho mdumu msina kechi sahucho ukudumue salaghe."

Yesu etahinya mburi ya kuoana magondo ya kuroana

1 Yesu areafiriti kuyo ka kiome, ekahali Galilaya, ekaso Yudea, chauju ya mharaza usewe Yoridani. 2 Vahe vakumure vekamliaha are, nau ekavauti. 3 Mafarisayo vakuwe vekamliaha kalo vamgali, vekamlhasu, "Ho, chiradumuijwa muhe kumro mlage kuu?" 4 Yesu ekavaba, "Ho temusomie he Magondo ya Kiumbi ite kuli azeto Kiumbi evaboie muagiru na mlage, 5 naho ekaba, ‘Kwaka mburi muagiru enem’ro igii kuu ne alhii kuu enekhwa hawe na mlage kuu, naho ka vanu venekhwa msa muwe?’ 6 Kwato, vo si vanu kahali mira ni msa muwe. Kwato chikhwarijwe ni Kiumbi, muhe asirechikakaanya." 7 Mira vo vekamlhasu, "Ni kwakhoni iji Musa eeajie ite muagiru amuo mlage kuu magondo ya kumro?" 8 Yesu ekavaba, "Musa eemudumuije kuvaro valage kaghu kwa mburi ya uure wa swaho kaghu, mira techeekhwae to kuli azeto. 9 Kwato nimubaiya, kira enemro mlage kuu mira esi kwa mburi ya udana, ekadori mlage mhali, enekhwa aaboi ukusa." 10 Vahina kuu vekamba, "Chikukhwa mburi ja muagiru na mlage kuu nito, ni keba kusaadori." 11 Yesu ekavaba, "Sivakhabuna venemuru kulidoria ya ihinyo, mira nihu bi veowe umuruisho ni Kiumbi. 12 Kwaite helo mburi hali jiro muhe asimuru kudori, vahali nikwaite veakhoike to, vahali kwaite veteboiwe to ni vahe, na vahali tevedumue kudori kwa mburi ja Udilao wa Kiumbi. Enemuru kudoria ya ihinyo alidorie."

Yesu etavabusuia mapae vainyi vagitutu

13 Vahe vekamgeria Yesu vainyi vagitutu kalo avakee miharegha naho avabusue mapae makulho. Mira vahina vekavajoghoiya. 14 Yesu ekaba, "Varoni vainyi vagitutu valita hagho neri musivatiti, kwaite Udilao wa Kiumbi niwa vahe vekhwae saya vainyi." 15 Niho Yesu ekavakeiya miharegha ana he mia kini, naho ekahaka ata hodi.

Mburatu mzuri

16 Mhe muwe ekamlitia Yesu ekamlhasu, "Mhinya mkulho, niboi mburi mina kulho kalo niudorie uzime wa maaze khabuna?" 17 Yesu ekamba, "Kwaakhoni unise mkulho? Mkulho ni Kiumbi bi. Mira ukudumu kubuu heuzime, dara miku ja Kiumbi." 18 Hu muhe ekamlhasu, "Miku hama?" Yesu ekamba, "Usigae, usibodi na valage esivakechi, Usigwa, Usiyo lame, 19 uvako aba kechi ne lage kechi, naho mdumu msina kechi sahucho ukudumue salaghe." 20 Ka mburatu ekaba, "Ka makhabuna niyadarie. Niboi kiakhoni kihali?" 21 Yesu ekamba, "Kai udumu usibeni kigi, so uredidi vikhabuna ulonavyo, uvao vahuye, naari unekhwa na uzuri he Kiumbi niho uniliahe." 22 Ka mburatu areako to, ekaso ilai elo vuhuye, kwaite eelo uzuri mgiru. 23 Niho Yesu ekavawesia vahina kuu ekavaba, "Kweri nimubaiya chinekhwa kiure hemzuri kubuu he Udilao wa Kiumbi. 24 Kahali nimubaiya, chimangamuruika ngamia kutakho he idaho la singano kuro mzuri kubuu he Udilao wa Kiumbi." 25 Vahina kuu vareako kayo Yesu eyoe vekamakisha, vekamlhasu, "Ho niji enemuru kuguwe hemakusa?" 26 Yesu ekavawesiisha ekavaba, "Ya mburi teimuruika he vahe, mira he Kiumbi mburi khabuna jimuruika." 27 Niho Petro ekamba, "Wesia nne twaaro vigi vikhabuna nakukuliaha ari, tunedoria kiakhoni?" 28 Yesu ekavaba, kweri nimubaiya ite kune muniliahe ani heidi ikuale, ekunelita Muinyi wa Muhe hekikire kuu cha ugiru kuu, na kune munezokhodi hevikire ikado na vinu, mkuyazamari mbari ikado na manu ya Iziraeli. 29 Naho kira eroe muang’a kuu hile vabakhu kuu vakiagiru hile vakilage hile igii hile alhii hile vainyi hile mbuva kwa mburi gho enedoria kagi igana kutakho naho enepala uzime wa maaze makhabuna. 30 Mira vahe vakumure vekuakho ite veye waijiji, venekhwa vahe vesiye hemadamo yelitie. Naho vesiye waijiji, veneye hemadamo yelitie.

6 Mira kuli cho ya idi lireboiwe, Kiumbi eboiye muagiru na mlage, 7 kwato muagiru enemro aba kini ne lage kini, nau enekwari na mlage kuu, 8 navo vanu venekhwa msa muwe. Kwato vo si vanu kahali mira mhemuwe. 9 Kwato, cho chikwarijwe ni Kiumbi mhe asichikakanye."