1 Muaze wa kakai heelo elha ya kudori he muang'a wa Kana uaha he idi la Galilaya. Alhii Yesu nau eereaha are. 2 Yesu hawe na vahina kuu navo veerarikwe heka elha. 3 Divai ireavakhitia, alhii Yesu ekamba muinyi kuu, "Vaakhitiwa ni divai." 4 Yesu ekamba, "Lage, ya mburi si kanu, wai si muaze wa kuaija lumuruisho gho." 5 Alhii Yesu, ekavaba vazasughawe va are ana veeaha to, "Cho enemubaiya muboi boini." 6 Ata heelo madondo sita eboiiwe na masaheru, kira idondo leekubuu sange koi hile sita ja mai. Yekeiwe ata kwaite veekuraonhia kira muaze sakigi miku kini ya kuaresi idumu. 7 Yesu ekavaba hu vanyamalo, "Hutini ka madondo mai." Vekahuti ka madondo sari yekahu. 8 Niho ekavaba hu vazasughawe, "Bukuni iji mai mumtiiye mgiru wa elha." Vekamtiia ka mai, 9 hu mgiru wa elha areagali ka mai ekaaho yaakhwa divai. Teeiliye ite ka divai ilie nale, mira hu vanyamalo vebukhue hu mai veeilie. Niho mgiru wa elha ekamse hu mzadori khakhera, 10 ekamba, "Vahe khabuna vegu ini divai kulho, vagalho varaawaha sari vaengeli vetagera hu divai esikulho. Mira ari ukee hu divai kulho sari waijiji!" 11 Ya nee kimako cha bosi cho Yesu eboie, eechiboie are he muang'a usewe Kana uaha he idi la Galilaya. Kwato ekaaija lumuruisho, na vahina kuu vekamdarisha. 12 Ka elha irekhita Yesu ekali hawe ne alhii kuu, vabakhu kuu na vahina kuu vekaso Kapernahumu vekafufu are maaze esimakumure.

13 Elha ya Pasaka ya Vayahudi yeehee sina, Yesu ekaso Yerusalemu. 14 Are he minda ya Kiumbi ekavahelha vahe vedi na kuwe wa na maalu na sua, naho ekavaakho vahe vahali veekupuiyana mihaku kini kalo vakhwa na mihaku yahe minda ya Kiumbi. 15 Yesu ekaboi ndate ya mulhu, ekavagu vakhabuna vali he minda ya Kiumbi na maalu na wa kini, ekalhuku meza ja hu vahe vekupuiyana mihaku ekasu mihaku kini. 16 Ekavaba hu vekudidi sua, "Jiguni ii musiboi minda ya Aba gho kukhwa kikhoja!" 17 Vahina kuu vekahulha ite magondo eba, "Ludumuisho gho he minda kechi lulo u, lukha za gho sa mwalha." 18 Vagiru va Vayahudi vekamlhasu, "Ho, umuru kuboi lhaa mina kuaija ite ulo ugiru wa kuboi ya?" 19 Yesu ekavaba, "Ipuni ya minda ya Kiumbi, na ani nineikwa kahali kwa maaze makai." 20 Hu vagiru Vayahudi vekamlhasu, "Ya minda ya Kiumbi idorie miko mikado mihai na tizu kukwawe, kwaakhoni iji uba uneikwa kwa maaze makai?" 21 Mira Minda ya Kiumbi yo Yesu eekuyoya ni msa kuu salaghe. 22 Kwato areaka kuli he kigame, vahina kuu vekahulha ite eevabaiye ya mburi, niho vekadarisha magondo na hu mburi Yesu eeyoe.

23 Yesu eaha are Jerusalemu he elha ya Pasaka vahe vakumure vekamdarisha vareakho vimako vyo eboiye. 24 Mira Yesu teevadumuije kwaite eereile vikhabuna viaha he swaho kini. 25 Teedumue muhe ambaiye mburi ja vahe vakhabuna vetoe kwaite u salaghe ereile viaha he swaho kini.