1 Ka mburi jireataho Yesu ekaso hodi hakumure he idi la Galilaya, teedumue kuso hodi ha idi la Yudea kwaite vagiru va Vayahudi veekudaa kwalhi ya kumgaa. 2 Madamo ka elha ya vuminda vwa Vayahudi yehee sina. 3 Kwato, vabakhu kuu vekamba, "Hali ii uso Yudea, kalo vahina kechi vaakho vimako uboi. 4 Tehelo muhe edumu kuilika kwa kuboi mburi kwa kukumatu. Kai uboi ya mburi kuaije he idi." 5 Vaagitutu kuu veeyoe to kwaite tevekudarisha ite u ni Masia elhoijwe ni Kiumbi. 6 Yesu ekavaba, "Madamo gho teenaba kuhe, mira kune mumuru kuso are madamo makhabuna. 7 Vahe va Idi tevemuru kumusanuia kune, mira venisanuia ani kwaite nireila ite miboire kini ni mikusa. 8 Kune soni heka elha, mira ani sikaso, kwaite madamo gho nidumuwa kuso Yerusalemu teunaba kuhe." 9 Arefiriti kuyo to ekafufu are Galilaya.

10 Mira vagitutu kuu vareali kuso he elha, Yesu nau ekaso, mira eesoe kwakukumatu. 11 Vagiru va Vayahudi veekumdaa ata he elha, veekulhasu, "Ya muhe eaha le?" 12 Maifyo makumure ya vahe veekutakhoana viome kwa mburi kuu, vahali vekuba, "Ni muhe mkulho." Vahali vekalhi, "Hai! Etavata vahe." 13 Mira tehelo muhe egalie kuyoisha mburi jakwe Yesu neri kumatu kwaite vekuvabugheno vagiru va Vayahudi. 14 Madamo ya maaze elha yareahe hasi Yesu nau ekaso ekabuu he lugo lwa Minda ya Kiumbi, ekalholhoshi kuhinya vahe. 15 Vagiru va Vayahudi vekamaka mahinyo kuu vekakhwa veba, "Ya muhe emurue kimomo kuhinya to naho tenarahinywa?" 16 Yesu ekavaba, "Ya mburi nimuhinya si gho, mira nija Kiumbi enisughaye. 17 Muhe ekudumu kuboi mburi Kiumbi edumu, eneila ite mahinyo gho yeli he Kiumbi, hile ni mahinyo gho salaghe. 18 Hu vekuyoiya mburi kini wangau vedaa kukuyoiya kikulho salaghini, mira hu edaa ugiru wahu emsughae niu mkulho, naho tevata vahe vahali. 19 Ho, Musa temuoe miku? Mira tehelo neri muwe edara ka miku. Kwahoni mudumu munigaa?" 20 Hu ifyo la vahe vekamba "Ulo ipepo ari! Niji edumu kukugaa?" 21 Yesu ekavaba, "Niboie kimako kiwe bi vakhabuna mukamaka." 22 Musa eemukeie mburi ja kutakhoiwa elha, ka mburi tejilie he Musa, mira jilie he vakaka kaghu, iji kune mumtakhoiya elha muinyi wa kiagiru he Muaze wa kusaaboi nyamalo. 23 Kai, muinyi wa kiagiru enetakhoiwa elha he Muaze wa kusaaboi nyamalo kalo miku yakwe Musa iseoniwe, kwakhoni munisanuiya ani kuuti muhe he Muaze wa kusaaboi nyamalo? 24 Roni kupaaya zamaro kwa mburi jo muaho, mira paani zamaro kwa kuliaha ukweri.

25 Niho vahe vakuwe va are Yerusalemu veekulhasuana, "Ho, yaye sihu muhe vekumdaa vamgaa? 26 Wesiani iji eyo na vahe vakhabuna esikumatue neri vagiru tevemlhiija kigi. Ho, tuba vagiru vaaila ite ya niu Masia? 27 Masia ekulita, tehelo eneile ite elie le, na nne tureile hodi ya muhe eli." 28 Yesu areakhwa ehinya he Minda ya Kiumbi, ekayoisha ekuba, "Ho, mureniila naho mureila hodi nilie? Neri silitie kwa umuruisho gho salaghe. Mira hu enisughaye niwa kweri na kune temumuilie, 29 ani nimuilie kwaite nilie hakuu, nau niu enisughaye." 30 Vekadaa kwalhi ya kumdara, mira tehelo egalie kumdara kwaite madamo kuu teyeenahe. 31 Mira ifyo la vahe vakumure vekamdarisha, veekuba "Ho, Masia ekunelita eneboi vimako vigiru kutakho ya muhe?"

32 Mafarisayo vekako vahe vekupoghosha mburi jakwe Yesu, kwato vo na vagiru va muaresi vekasugha vakilaaru va minda ya Kiumbi varemdara Yesu. 33 Yesu ekaba, "Nirecheri aha hawe na kune kwa madamo maghere, naho nnekirii hehu enisughaye. 34 Munenidaa mira temukaniakho, kwaite temumuru kuso hodi nineso." 35 Vagiru va Vayahudi vekalhasuana, "Ho, ya muhe edumu asole hodi tusikamuru kumuakho? Hile eneso he madi ya uda, hodi vedie Vayahudi vahe vakue vesi Vayahudi na kuvahinya vahe vesi Vayahudi? 36 Kwaakhoni eyo to, ekuba, Munenidaa mira temukaniaho, naho tetukamuru kuhe hodi eaha.?"

37 Hu muaze wa mkhito wa elha, muaze hu mgiru. Yesu ekauma, ekayoisha, "Muhe elo kasu alita hagho awaha mai, 38 neri muwe ekunidarisha edumuwa awaha. Sakigi Magondo ya Kiumbi eba, Miharaza ya mai ya uzime inesuika kuli he swaho yaka venenidarisha." 39 Yesu eekuyoiya mburi ya Swaho Mnyakhare nahu vakhabuna vemdarishe vesemdoria. Madamo ka Swaho Mnyakhare teenaba kuguwe kwaite Yesu teenaba kudoria ugiru kuli he Aba Kiumbi.

40 Vahe vakuwe vareko ekuyo to vekaba, "Kweri ya muhe ni Mroto wa Kiumbi!" 41 Vahali vekaba, "Ya niu Kiristo." Mira vahali vekalhasu, "Ho nikweri Masia eneli he idi la Galilaya? 42 Ho Magondo ya Kiumbi teeba, Kiristo eneli he ikolwa lakwe Dilao Daudi, naho eneakhoika are Betilehemu, he muang'a wakwe Daudi." 43 Kwato vahe vekakakaana kwahu mburi jakwe Yesu. 44 Vahe vakuwe veedumue kumdara mira tehelo egalie kumdara.

45 Hu vakilaaru va Minda ya Kiumbi vareakirii vesilo ne Yesu, vagiru va muaresi na Mafarisayo vekavalhasu "Kwaakhoni temumdarae na kumgera?" 46 Hu vakilaaru va Minda ya Kiumbi vekavaba, "Neri tehelo muhe emurue kuyo viome vilo viugho saya muhe." 47 Mafarisayo vekavalhasu, "Ho, na kune mwataika? 48 Ho, temuakho ite tehelo madilao hile Mafarisayo vemdarishe ya muhe? 49 Vahe vemdarisha ya muhe nihu vesiilie miku yakwe Musa Kiumbi evabusu lupae vahe saya." 50 Muwe wa Mafarisayo eaha too nee Nikodemo, hu eesoe he Yesu naama, ekavalhasu, 51 "Ho, miku kanu iba ite tumpaaie muhe zamaro tusina mlhahonha na kuile cho eboie?" 52 Vekamba "Ni kikulho," Ni kweri na ari ulie Galilaya. Wesiisha magondo ya Kiumbi uneakho ite tehelo mroto wa Kiumbi eyowe ite elie Galilaya. 53 Niho vekaka, kira muwe ekagale.