1 Mira Yesu ekaso he lubwa lwa mizeituni. 2 Lhenu kuu ama ama Yesu ekaso kahali he minda ya Kiumbi, vahe vakumure vekabunguru ho eaha, nau ekazokhodi ekalholhoshi kuvahinya. 3 Vahinya va miku yakwe Musa na Mafarisayo vekamgera mlage muwe eheiwe ebodie na muagiru esimkuu, Vekamuumati hasi he ifyo la vahe vakhabuna. 4 Vekamba Yesu, "Mhinya, ya mlage eheiwe ebodie na muagiru esimkuu. 5 He miku, Musa eetubae ite mlage eboi kigi saya amawe masaheru sari aga. Ho, ari ubamo?" 6 Vemlhasue to kwa kumgali, kalo vaakho kigi cha kumyoija. Mira Yesu ekaduduku, ekalholhoshi kugonda di he mpulhe na kisatu kuu. 7 Varecheri kumlhasu, Yesu ekauma ekavaba, "Kai helo muhe he kune esilo makusa akhwa wa bosi kumma ka mlage isaheru." 8 Ekaduduku kahali ekagonda he mpulhe. 9 Vareako to, vekalholhoshi kuli muwe muwe, vekukaeiwa ni vaagiru vazime. Yesu ekamerisi salaghe, na hu mlage echeri umae kuwesiana ne Yesu. 10 Yesu ekauma ekamlhasu ka mlage, "Hu vahe veaha le vekukuyoija ite ari ulo makusa? Ho, tehelo ekuzamarie?" 11 Ka mlage ekamba, "Dilao, tehelo neri muwe!" Yesu nau ekamba ni kikulho, "Na ani sikakuzamari. So, naho kuli waijiji usiboi makusa kahali."

12 Yesu ekayo kahali naka vahe ekavaba, "Ani niu luatame lwa vahe va idi" "Enidarisha ani na kuniko tekazokho neri he kidughu, mira enekhwa na luatame lwa uzime wa maaze khabuna" 13 Niho Mafarisayo vekamba, "Ari ukuyoiya neri muhe muhali kuko na kuakho chouyo kwato choukuyoiya sicha kweri." 14 Yesu ekavaba, "Neri ite nikuyoia cho niilie ani salaghe, mira viome gho nivya kweri kwaite ani nireila hodi nilie na hodi niso. Mira kune temuilie nilie le neri niso le. 15 Kune muzamari kwa kuliaha viugho vya vahe, mira ani sizamari muhe. 16 Mira neri kai nikuzamari to, zamaro gho niya kweri, kwaite sigu zamaro salaghe, mira ani ne Aba enisughae tuzamari hawe. 17 Igondiwe he miku kanu ite, kigi chiahowe ni vahe vanu ni kweri. 18 Vanu veakhoe niani Aba enisughaye kwato ya tuyo niya kweri." 19 Niho vekamlhasu, "Aba kechi eaha le?" Yesu ekavaba, "Kune temunilie ani, neri Aba gho. Kai mweniilie ani, Aba gho nau mwesemuilie." 20 Yesu eeyoe ka viome madamo ekuhinya he su hodi mihaku na mari vyeekuzokho he minda ya Kiumbi. Mira tehelo emdarie, kwaite madamo kuu teenahe.

21 Yesu ekavaba kahali, "Ani nineso, munenidaa, mira munega he makusa kaghu. Temukamuru kuso hodi niso." 22 Niho vagiru va Vayahudi vekaba, "Eba ite tetukamuru kuso hodi eso. Hile etarakugaa?" 23 Yesu ekavaba, "Kune mulie waii he idi, mira ani nilie ana. Kune muvahe vaya idi, mira ani si waya idi. 24 Niu chiro nimubae ite munega he makusa kaghu. Kai mukusedarisha ite Ani niu, munega he makusa kaghu." 25 Navo vekamlhasu, "Ari uji?" Yesu ekavaba, "Ani niu sakigi neemubaie kuli azeto. 26 Nilo makumure akuyo na akumuzamari, mira hu enisughae niwa kweri, na ani nitavabaia vahe va idi hu mburi nijikoie kuli heu." 27 Teveilie ite Yesu eekuvabaia mburi ja Abaghe. 28 Niho ekavaba, "Mukumrengesha Muinyi wa Mhe, niho muneila ite Ani niu. Nahosiboi neri kigi salaghe, mira niboi sacho Aba enihinyie." 29 Hu enisughae eaha hawe na ani, teniroe salaghe, kwaite madamo makhabuna niboi hu mburi jimlhamuia. 30 Yesu areakhwa eyo to vahe vakumure vekamdarisha.

31 Niho Yesu ekavaba hu Vayahudi vemdarishe, "Kai muneko hu mahinyo gho nimuhinyie munekhwa vahina gho kweri. 32 Muneila kweri, naka kweri inemuboi mulhamerwe kuli he uhaye." 33 Navo vekamba, "Nne tuikolwa lakwe Aburahamu." "Kahali tetuila kukhwa vahaye va muhe neri muwe. Kwakhoni uba, Tunelhamerwa?" 34 Yesu ekavaba, "Kweri nitamubaia, kira muhe eboi makusa ni mhaye wa makusa. 35 Mhaye tezokho ang'a miaze khabuna, mira Muinyi enezokho ang'a kini maaze khabuna. 36 Mira Muinyi ekumlhamera munekhwa na mlhamero wa kweri. 37 Nireila ite kune muikolo lakwe Aburahamu. Mira mudumu munigaa, kwaite temuyadoria mahinyo gho. 38 Ani niyo hu niakhoe neeaha ne Aba gho, mira kune muboi hu aba kaghu emubae muboi." 39 Vekamba "Nne tu vainyi vakwe Aburahamu!" Yesu ekavaba "Kai kune mwee va ikolwa lakwe Aburahamu kweri, mweseboie hu yeekuboiwa ni Aburahamu. 40 Ani nimubaie ukweri niukoie he Kiumbi, mira kune mudumu munigaa. Aburahamu teeboie to. 41 Kune muboi mburi wahuhu aba kaghu ejiboi" Vekamba, Na nne tetuvainyi va gahana "Tulo aba muwe bi niu Kiumbi." 42 Yesu ekavaba, "Kai Kiumbi nee Aba kaghu kweri, mwesenidumue ani, kwaite ani nilie he Kiumbi na waijiji niaha ii. Siani nikusughae salaghe, mira Kiumbi niu enisughae. 43 Kwakhoni temukoia kigi niyo, ni kwaite temmuru kuyako huyo nimubaia. 44 Kune muvainyi va aba kaghu Shetani mudumu bi kuboi hucho edumu aba kaghu. Kuli azeto ekugaa, neri teumaia kweri, kwaite kweri teiaha nau. Ekuyo lame, eyo sakigi msa kuu utoe, kwaite u nimlame kahali ni aba wa lame. 45 Mira ani nimubaia ukweri kune temunidarisha. 46 Niji enemuru kuaija ite nilo makusa? Kai nimubaia kweri kwakhoni temunidarisha? 47 Hu eliye he Kiumbi eralakhonha mburi ja Kiumbi. Mira kune temulakhonha kwaite temliye he Kiumbi."

48 Vayahudi vekamba, "Ho, tetuyoe kweri ite ari Umsamaria, kahali ulo ipepo?" 49 Yesu ekavaba, "Ani silo ipepo, ani nimko Aba gho, mira kune temniko. 50 Ani sidaa lugimbiko gho salaghe, mira helo edumu kunio lugimbiko, nau ezamari neri kulhoija muhe. 51 Kweri nitamubaia, edara mahinyo gho tekaga neri." 52 Niho Vayahudi vekamba, "Iji, twaile kweri ite ulo ipepo. Aburahamu aaga, varoto nau vaaga, mira ari utaba ite, muhe edara viome gho tekaga neri. 53 Ho ari ukuboi umgiru kutakho Aba kanu Aburahamu egae? Varoto nau vaaga. Kwato ari uji?" 54 Yesu ekavaba, "Nikukugimbika salaghe lugimbiko gho lunekhwa sikigi. Aba gho hu muba ni Aba kaghu niu enigimbika. 55 Kune temumuilie, mira ani nimuila. Kai neeteba simuilie neseekhwae mlame sakune cho mukhwae valame. Mira ani niremuile kahali nirako kiome kuu. 56 Aba kaghu Aburahamu eelhamuiwe ekuarira kuakho muaze gho wakulita, nau areuakho ekalhamuwa." 57 Vayahudi vekamba, "Ari tunaba kuheti miko mikado mikoi, mira umuru kimomo kuba wamuakho Aburahamu?" 58 Yesu ekavaba, " Nitamubaia ukweri, Aburahamu esinaakhoika ani neereaha." 59 Niho vekadodoli masaheru kalo vamma, mira Yesu ekakumatu naho ekali he minda ya Kiumbi.