1 Kwato Pilato ekamgu Yesu ekaba ite amawe ndate ja bulhe. 2 Vaaku navo vekadori milhae vekaboi nkofia saya kidilao vekamuoro he mua, naho vekam'oro gomae ya kidilao ibayu. 3 Vekakhwa vetaso kakumure to hodi eaha vekumholu kwa kumfwa vekumba, "Tukuholu, Dilao wa Vayahudi!" Ilai vekumma mazokhera he vubasa. 4 Pilato ekali kahali gahana, ekavaba Vayahudi, "Wesiani nitamugeria ya muhe kahali, kalo muakho ite ani siakhoe cho eonie. 5 Kwato, Yesu ekali gahana eoroe he mua hu nkofia saya kidilao na gomae ibayu ya kidilao. Pilato ekavaba, wesiani, muhe mumdaa niu ya!" 6 Vagiru va muaresi na vakilaaru va Minda ya Kiumbi varemuakho vekama gimbe vekuba, "Mkharotini, mkharotini!" Pilato ekavaba, mdorini wakune muremkharoti, kwaite ani siakhoe cho eonie. 7 Vayahudi vekamba "Nne tulo miku, kutahoia heka miku, chidumuwe aga, kwaite etekuse ite u ni Muinyi wa Kiumbi." 8 Pilato areko ka mburi, ekabughenusha. 9 Kwato ekabuu kahali he iminda la kidilao, Ekamlhasu Yesu, nile hodi elie. Mira Yesu tembaie kigi. 10 Kwato Pilato ekamba, "Ari utalhi kuyo na ani? Ho, tuilie ite nilo ugiru wa kukulhamera hile kukukharoti?" 11 Yesu ekamba,"Tweseekhwa naka ugiru, kai Kiumbi teekuoe. Kwato, hu enigerie he ari elo makusa magirusha." 12 Kulholhoshia to Pilato ekadaa kwalhi yakumlhamera Yesu, mira Vayahudi vekama gimbe vekuba, "Ukumlhamera ya muhe, ari tumsaho wakwe Kaisari. Kira muhe ekuboi ni dilao etamsanuia Kaisari!" 13 Kwato Pilato ereako ka viome, ekamgu Yesu gahana, ekazokhodi he kikire kuu cha kuzamaria chiaha hodi heboiiwe na masaheru Kiebrania hesewe Gabata. 14 Madamo ka nee kela tizu hachakako muaze wa elha ya Pasaka. Pilato ekavaba Vayahudi, "Yaaye ii Dilao kaghu!" 15 Mira vekama gimbe vekuba, "Mgaa! Mgaa! Mkharotije he msaraba!" Pilato ekavalhasu, "Nimkharotije he msaraba Dilao kaghu?" Vagiru va muaresi vekaba, "Dilao kanu ni Kaisari bi tetulo mhali!" 16 Kwato Pilato ekamuotija Yesu he miharegha kini kalo akharotijwe.

Kwato vakilaaru vekamdori Yesu nakuso nau. 17 Yesu ekali etiie msaraba kuu ekaso hodi hesewa "Ifwara la Mua" Kiebrania lisewa Goligota. 18 Vareahe ata hodi vekamkharotija he msaraba hawe na vahe vahali vanu, muwe bwa wa sughano na mhali bwa wa hina. 19 Pilato ekaba hagondwe magondo he kibala chikewe ana he msaraba. Ka magondo yeegondiwe to, "Yesu wa Nazareti, Dilao wa Vayahudi." 20 Ka magondo yeegondiwe kwa Kieburania na kilatini na Kigiriki, Vayahudi vakumure veeyasomie ka magondo, kwaite ata hodi Yesu eekharotijwe nee sina nahe muang'a. Kahaliwa ka magondo yeegondiwe kwa Kieburania na kilatini na Kigiriki. 21 Kwato vagiru va muaresi vekamba Pilato " Usigonde, Dilao wa Vayahudi, mira ugonde ite ya muhe ebae, Ani ni Dilao wa Vayahudi." 22 Pilato ekavaba "Cho nigondie naagonda!" 23 Vaaku vareafiriti kumkharotija, vekadori gomae kuu, vekajikakaanya mafumbe mahai, kira m'aku ekadori ifumbe iwe. Vekadori na nkazu kuu ya za, ka nkazu yeehiiwe na kitambala kiwe kuli ana sari di. 24 Kwato vaaku vekabayana, "Tusiikhaa, mira tuimie simbi ite inekhwa ya kweji." Ka mburi yeboiike kalo Mogondo ya Kiumbi yalijanye yeba, "Veekakaane gomae gho, kahali na nkazu gho vekaimaya simbi." Niu kigi veboie ka vaaku. 25 Sina na msaraba wakwe Yesu veeumae lage kuu, na lage mgiru wakwe Yesu ne Maria mlage wakwe Kleopa ne Maria kuli Magidala. 26 Yesu areamuakho lage kini eumae sina nahu mhina ekumdumuisha, ekamba lage kini "Lage, ka iji niu muinyi kechi." 27 Naho ekamba hu mhina , "Ka niu lage kechi." Kulholhoshia to ka mhina ekagale ne alhii Yesu arezokho nau ang'a kuu.

28 Yesu areakho nyamalo kuu yaaboiika, kalo Magondo ya Kiumbi yafuru, ekaba, "Nitako kasu." 29 Ata heelo ibakuri lihuwe divai ikala. Vekadori kikhao cha ighodoro vekachibutu heka divai , vekachitunga he ndate kulhe ya mkhatu usewa isopo vekachikaa ana, vekamkeia he muo. 30 Yesu areafi kugali ka divai ekaba, "Nyamalo gho yaakhita." Ekadudukhuja mua ekapaa swaho ekaga.

31 Nee muaze wa kuke kikulo Muaze wa kusaaboi nyamalo, Vayahudi tevekudumu misa ikhwa he misaraba he Muaze wa kusaaboi nyamalo naho wato ka muaze weekulhuiya he elha ya Pasaka. Kwato Vayahudi vekamlhawa Pilato ite masame yaka vekharotijwe ipuwe kalo vamange ga naho misa kini ikaawe he misaraba. 32 Niho vaaku vekaso, vekapu masame ya muhe wa bosi nawa kanu ka vekharotijwe kakera he Yesu. 33 Mira vareahe he Yesu, vekaakho ite afi kuga, kwato tevempue masame. 34 Mira muaku muwe ekambovora na iguha he lunabo, wato oto sako na mai vikali he msa kuu. 35 Muhe eakhoe ka mburi eyoe yo eakhoe kalo mumuru kudarisha. Mburi yo eakhoe niya kweri naho ereile it cho emubaiya nichakweri. 36 Ka mburi jeeboiike kalo magondo ya Kiumbi yafuru yeba, "Tehelo neri ifwara kuu linepuika." 37 Magondo ya Kiumbi mahali eba, "Venemuwesia hu vembovore."

38 Ka mburi jiretakho, Yosefu wa Arimataya, ee mhina wakwe Yesu, mira eekumliaha kwakukumatu kwaite eekuvabugheno Vayahudi, ekamgogo Pilato kalo aukae msa wakwe Yesu. Pilato ekamdumuija, kwato ekaso ekaukaa. 39 Ka Nikodemo, hu eemliahie Yesu naama, ekalita edarie malhoma ya mihaku mikumure yesewe manemane yekhwariiwe na ubani elo kiro mikado mikai. 40 Kwato ka vahe vanu vekaudori msa wakwe Yesu, vekaulhomi malhoma yesumu kikulho vekauoro sanda sacho yekhwae miku ya Vayahudi ya kuke he mbira. 41 Ata hodi Yesu ekharotijwe, heelo kabuva ka mikhatu ya mizabibu naata heka kabuva heelo mbira kuale yeesinaba kukeiwa msa wa muhe. 42 Kwaite nee madamo ya kuke kikulho mburi ja Muaze wa kusaaboi nyamalo, naka mbira yeeaha sina, vekauke msa wakwe Yesu ata.