1 Heelo mgiru muwe he ifyo la Mafarisayo ilhe kuu eekusewa Nikodemo nau nee muwe wa ibaraza igiru la Vayahudi. 2 Kiama kiwe ekali ekaso he Yesu ekamba, "Rabi sa kuba Mhinya tureile ite ari umhinya ulie he Kiumbi. Tehelo muhe emuru kuboi vimako vyo uboi kai Kiumbi teaha hawe nau." 3 Yesu ekamba, "Kweri nitakubaya, tehelo muhe enemuru kukhwa he udilao wa Kiumbi eesisawe kahali." 4 Nikodemo ekamlhasu, " Imuruikana kimomo muhe mzime!" Ho, muhe emuru kubuu he maso ya lage kini aakhoike kahali? 5 Yesu ekamba "Natakubaya Kweri, tehelo muhe emuru kukhwa he Udilo wa Kiumbi eesina kusawe kwa mai na kwa Swaho. 6 Msa usa msa mira swaho isa swaho. Muhe eakhoke kwa swaho ya Kiumbi etakhwa na uzime wa swaho. 7 Kwato usimake nikukuba ite udumuwe uakhoike ka kanu. 8 Saa iso hodi idumu, urako mvumiro kuu mira tuilie ho ili hile ho iso. Niu chitotiye he muhe eeakhowe ni swaho." 9 Nikodemo ekamlhasu "Ya mburi jimuruika kimomo?" 10 Yesu ekamba, "Ari ni mhinya he idi la Iziraeli ho tuailiye ya makhabuna? 11 Nitakubaiya kweri ite, nne tuyo huyo tuiliye nakuvabaia huyo tuakhoe nakumubaiya, mira kune temudumu huyo tuakhoe na kukubaiya. 12 Kai tunidarisha nikukubaiya mburi ja idi, ho unedarisha kimomo nikukubaiya mburi ja are ana he Kiumbi? 13 Tehelo ekutue kuso ana he Kiumbi saari bi Muinyi wa Muhe bi edimie kuli ana he Kiumbi." 14 Sakigi Musa erengeshe bome ya shaba ana he mkhatu madamo Vaiziraeli veaha are he ilangwa wato oto chidumuwa Muinyi wa Muhe arengeshwe ana he msar aba, 15 kalo kira muhe enemdarisha akhwa na uzime wa maaze makhabuna. 16 Kwaite Kiumbi eevadumue vahe va idi, sari ekamgu Muinyi kuu salaghe, kalo kira muhe emdarisha asilaha mira akhwa na uzime wa maaze makhabuna. 17 Kwaite Kiumbi temsughae Muinyi kuu avazamari vahe va idi, mira eemsughae Muinyi kuu kuvagu vahe va idi kuli he makusa. 18 Hu vemdarisha na kumuarira tevepaaiwe zamaro, mira hu vesidarisha vaafi kuzamariwa, kwaite tevemdarishe Muinyi wa Kiumbi salaghe. 19 Naya niu zamaro, ite luatame lwaalita he vahe va idi, mira vahe vaadumu kidughu vekasanuia luatame, kwaite veboi makusa. 20 Kwaite hu vakhabuna veboi makusa verasanuia luatame na tevelita he luatame, kwaite tevedumu makusa kini yaahowe. 21 Mira hu vakhabuna veboi mburi ja kweri velita he luatame kalo huyo veboi yaahoike ite vaaowe umuruisho ni Kiumbi.

22 Ka mburi khabuna jireatakho, Yesu na vahina kuu, vekaso he idi la Uyahudi, vekafufu are na kuvabatija vahe. 23 Yohana nau eekubatija are Ainoni, sina na idi lisewa Salimu, kwaite are heelo mai makumure. Vahe veekumlitia nau ekavabatija. 24 Ya yeboiike yohana esina lhatiiwa he igereza. 25 Muaze muwe vahina vakuwe vakwe Yohana na Myahudi muwe vekatakhoana viome he mburi ya kuonhi kalo uye kumuaresi Kiumbi. 26 Vekaso he Yohana na kumba "Rabi ite, Mhinya, ho, urahulha hu muhe eeaha twai bwa wa kanu wa mharaza wa Yordani, huye weetubaie mburi jo uilie kuli heu? waijiji ebatija vahe naho kira muhe eso hakuu!" 27 Yohana ekavaba, "Tehelo mhe emuru kuboi kigi saari akhwa eowe kuli ana he Kiumbi." 28 Kuni salaghe mweekoie nikuba, "Ani siu Kiristo elhoijwe ni Kiumbi, mira nitesughawa nimkaeiye." 29 Mlage edoriwe ni wa mwagiru edori mira msaho wa muagiru edori euma sina na u na kulahonha kuli hakuu. Elhamuishishwa ekuko kiome cha muagiru mzadori. Kwa mburi ya kulhamuiwa gho kwaafuru. 30 U edumuwe akhwa mgirusha na ani nikhwa mgitutusha.

31 U elhoijwe elie ana he Kiumbi ni mgiru kutakho kira muwe, muhe wa idi erayo hu eailie heya idi, mira Yesu elie he Kiumbi niu eumaia makhabuna kira hodi. 32 U eratubaia eyaakhoe nakuyako are ana he Kiumbi, mira tehelo edumu huyo eyaakhoe nakuyako 33 Mira muhe enedumu hu kigi eyo etaaija ite viome vya Kiumbi nivya kweri. 34 Hu esughaiwe ni Kiumbi erayo viome vya Kiumbi, kwaite Kiumbi emo Swaho kuu khabuna. 35 Aba emdumu Muinyi naho aamo vigi vikhabuna vikhwa he miharegha kuu. 36 Emdarisha Muinyi elo uzime wa maaze makhabuna, mira hu emlhi Muinyi tekakhwa na uzime wa maaze makhabuna naho malhaha ya Kiumbi enemlitia.