1 Muaze wa elha ya Pasaka usinahe, Yesu eereila ite madamo kuu ya kuli he idi kuso hakwe Aba yehee. Nau eekuvadumu vahe khabuna veekumdarisha, kahali eevadumuishe. 2 Madamo ya chamagheri Yesu na vahina kuu veekuraa viaghu, Shetani eefie kumbutu Yuda muinyi wakwe Simoni Iskariote mitotire ya kumkherii Yesu. 3 Yesu eekuila ite Aba emoe vigi vikhabuna, kahali eliye he Kiumbi naho etakhwaa kahali he Kiumbi. 4 Kwato ekali to vekuaia viaghu, ekagu gomae kuu ya ana ekaike khakhera, ekadori kitambala ekakuoro hasi hasi he msa. 5 Ekabutu mai he ibakuri, ekalholhoshi kuvaonhi vahina kuu masame ilai ekuvasiki nahu kitambala echioroe hasi hasi he msa. 6 Kwato ekahe hodi ezokhodie Simoni Petro, Petro nau ekaba, "Dilao, nimuru kimomo kukudumuija ari unionhi ani masame?" 7 Yesu ekamba, "Tuilie waijiji kigi mina niboi mira uneila kalufunda." 8 Petro ekamba, "Ari tukanionhi masame neri!" Yesu ekamba, "Nikusaakuonhi masame tukakhwa hawe na ani kahali." 9 Niho Simoni Petro ekamba, "Dilao, nionhi, mira usinionhi masame bi, unionhi miharegha na mua." 10 Yesu ekamba "Muhe eonhie msa mzime chidumuwa aonhi masame bi kwaite msa uakhue. Kune muakhue mira temuakhue vakabuna." 11 Yesu eeyoe to kwaite eemuilie hu enemkherii, niu chiro ekaba, "Kune muakhue, mira sivakhabuna." 12 Arefi kuvaonhi masame kini na kuoro kahali gomae kuu ya ana, ekakhwaa kahali to hakuaia viaghu nau gomae kuu ya ani ekavalhasu, "Ho, mwaila kigi ni cho muboie? 13 Kune munise Mhinya kahali Dilao, kwato muyo kweri kwaite niu kigi nitoe. 14 Kwato, ikukhwa ani ni Dilao kaghu kahali Mhinya kaghu naamuonhi kune masame, na kune mudumuwa muboiane sacho nimuboiie. 15 Nimuaije to, kalo na kune muboiiane sakigi nimuboie kune. 16 Kweri nitamubaia ite, vanyamalo sivagiru kutakho hu vevanyamarikia, neri vazasughawa sivagiru kutakho hu vevasughae. 17 Kwato kai mukuila ya mburi, Kiumbi enemuboi makulho mukuyaboi. 18 Simuyoiya kune vakhabuna, mira hu ni valhoje nirevaila. Mira ro magondo ya Kiumbi yafuru sakigi yeyo, hu ea viaghu gho akhwa mkusa gho. 19 Ani nimubaia ya mburi waijiji jisinalijanya, kalo jikunelijanya, mudarishe ite Ani Niu. 20 Kweri nitamubaia, kira emdoria hu enisughae enidoria ani. Kira enidoria ani emdoria hu enisughae."

21 Yesu erefi kuyo to, ekahiri swaho, ekayo ekaba "Kweri nimuba, muwe kaghu enenikherii!" 22 Vahina vekawesiana mira teveekuila ite Yesu emyoiya ji. 23 Mhina muwe hehu vahina, hu eekudumuishwa ni Yesu, ezokhodie sina ne Yesu. 24 Simoni Petro ekamkairia mharegha ekaba, "Mlhasu ite emyoia ji." 25 Ka mhina eaha sina ne Yesu, ekamlhasu, "Dilao, umyoiya ji?" 26 Yesu ekaba, "Nihu nnemuo kikhao cha mkate nikurafi kuginha he kikhonho." Kwato ekadori kikhao cha mkate ekachiginha he kikhonho, ekamuo Yuda, muinyi wakwe Simoni Isikarioti. 27 Yuda areaa bi ka kikhao cha mkate, Shetani ekambuu. Kwato Yesu ekamba Yuda, "Kigi udumu kuboi chiboi nakawe." 28 Mira hu veezokhodie to tehelo neri muwe eilie kwakhoni Yesu eeyoe to. 29 Kwaite Yuda neeu eekutii ibegi la mihaku, vahina vakuwe veeilie ite Yesu etemba erewe vigi vyekudumuwa he elha, hile arevao kigi vahuye. 30 Yuda arefi bi kua hu kikhao cha mkate, ekamangali gahana . Nee madamo ya naama.

31 Yuda arehali, Yesu ekaba, "Iji Muinyi wa Muhe aowe ugiru kuu wa kweri, Kiumbi nau aowe ugiru kuu wa kweri heka Muinyi. 32 Kwaite Muinyi aaija ugiru wa Kiumbi, Kiumbi nau eneaija ugiru wa Muinyi naho Kiumbi eneuaija ugiru wa Muinyi nakawe. 33 Vainyi gho, niaha na kune kwa madamo maghere. Munenidaa, mira iji nitamubaia hu nivabaie vagiru va Vayahudi, ite, hodi niso ani kune temumuru kuso. 34 Nitamuo miku kuale, dumuanani. Sa kigi nimudumue kune, kwato na kune, mudumuane . 35 Kai mukudumuana, vahe vakhabuna veneila ite kune muvahina gho."

36 Simoni Petro ekamlhasu Yesu, "Dilao uso le?" Yesu ekamba, "Hodi niso ani tumuru kuniliaha waijiji, mira uneniliaha madamo elitie." 37 Petro ekamba, "Dilao, kwaahoni iji simuru kukuliaha waijiji? Nikeba nilhahati uzime gho kwa mburi ya ari." 38 Yesu ekamba, "Ho kweri umuru kuga kwa mburi ya ani? Kweri nitakubaia, nkuruve isinaba kuzo unekhwa unenilhi kagi khai."