1 Miaze tizu elha ya Pasaka isinaba kuhe, Yesu ekahe Betania, ang'a hakwe Lazaro, hu emkaie kuli he kigame. 2 Are Vemkeiye viaghu vya chamagheri, Mata niu eekuvageria viaghu, madamo ka Lazaro eeaha hawe ne Yesu to he meza. 3 Maria ekadori nyhupa ya nusu lita ilo malhoma ekusumu kikulho ya mihaku mikumure eboiwa kuli he mkhatu usewa nado, ekamsuia Yesu ka malhoma he masame kahali ekamsiki ka malhoma na alhu kuu. Minda khabuna yeekusumu kikulho kwa mburi yaka malhoma. 4 Niho Yuda Isikarioti, muwe wahu ikado na vanu enemlhi Yesu ekalhasu ekaba, 5 "Kwaakhoni ya malhoma ekusedidiwa kwa vikhao magana makai viagha na madini ya esewe feza , naka mhaku vekaowe vahuye?" 6 Yuda eeyoe to, siite eekuvatotia vahuye, mira nee mgwalo, nee u eekuzokho ibegila mihaku, naho kira madamo eekugwa ka mihaku. 7 Mira Yesu ekaba "Mroni ya mlage! teadidie ka malhoma kwa mburi ya muaze gho wa kukewe he mbira. 8 Vahuye muaha navo maaze khabuna, mira ani temkazoko na ani maaze khabuna."

9 Vayahudi vakumure vekakoia ite Yesu eaha Betania, Kwato vekaso are tevesoe kuramuaho Yesu bi mira nihawe na kumuakho Lazaro hu ekaaiwe ni Yesu kuli he kigame. 10 Kwaite Masadukayo teveekudarisha mburi ya kuka kuli he kigame, kwato vekadaa kwali ya kumgaa Lazaro, 11 kwaite kwa mburi yakwe Lazaro Vayahudi vakumure veemdarishe Yesu mira vekavakherii vagiru kini.

12 Muaze wa kanu, ifyo igiru la vahe leelitiye he elha ya Pasaka veekoie ite Yesu elitie Yerusalemu. 13 Kwato vekapu matambi ya mitende naho vekaramhungira kwa kumko, vekakaa viome vekuba, "Hosana, tumfaruie DILAO, tumfaruie hu etuboia makulho ka elita hakanu kwa ilhe la Kiumbi, aboiwe makulho ka elitie kukhwa Dilao wa Iziraeli." 14 Yesu ekaakho muinyi wa mhunda, ekamkutu sakigi magondo eba, 15 "Kune vahe va Yerusalemu msibughenu,

Wesia, Dilao kaghu elitie

ekutue he muinyi wa mhunda kwa nhunguru."

16 Madamo ka vahina vakwe Yesu teveilie ka mburi, mira Yesu areaka kuli he kigame ekaowa ugiru, niho vekahulha ite ka makhabuna yeegondiwe kumyoia u salaghe, navo veemboiie sacho cheegondiwe. 17 Vahe veaha hawe ne Yesu madamo Lazaro ekuli he mbira, vekuravabaiya vahali huyo veakhoe. 18 Ya niu chiboie ka vahe veekoie ite Yesu niu eboie ka kimako vekaso kuramdoria . 19 Kwato Mafarisayo vekabaiana , "Muraaho? Tetumuru kuboi neri kigi! Wesiani, vahe vakhabuna vetamliaha."

20 Heelo Vagiriki vakuwe hehu vahe vehee kuaresi madamo ya elha ya Pasaka. 21 Ka Vagiriki vekamliaha Filipo, eedie he muang'a usewa Betisaida are he idi la Galilaya, vekamba, "Dilao, tudumu tumuakho Yesu." 22 Filipo ekaso ekambaia Andrea, niho ka vanu vekaso kurambaia Yesu. 23 Yesu ekavaba, "Madamo a Muinyi wa Muhe kudaria ugiru yaahe! 24 Kweri nitamubaia, mhuluzi ya ngano irakhwa mhuluzi we bi ikusaalhu he mpulhe ikaga. Mira ikutuiwa he mpulhe na kubo itasa mpuluzi kumure. 25 Hu veudumu uzime kini, veneulahati, mira veusanuiwa uzime kini heya idi, veneuke uzime kini usikhita. 26 Edumu kukhwa mnyamalo gho edumuwe aniliahe, kwaite kira hodi nineso mnyalo gho nau eneso . Muhe enekhwa mnyamalo gho Aba enemko.

27 "Swaho gho yaahiri, iji nibamo? Iji, niba, Aba, unikaa heya madamo ya kharo? Mira niu chiro naalita kalo nitakho heya madamo ya kharo. 28 Aba, uuaije ugiru kechi. Kiome chikakoika kuli ana he Kiumbi chikuba, naauaija, naho nineuaija kahali." 29 Ifyo la vahe vakumure veeumae to veechikoie ka kiome, vakuwe vekaba, "Ni lubambala." "Mira vahali veebae, Mnyamalo wa Kiumbi aayo nau!" 30 Mira Yesu ekavaba, "Ka kiome techilijanye kwa mburi ya gho mira chilijanye kwa mburi kune. 31 Kwato ya niu madamo vaya idi kuzamariwa, Shetani mgiru waya idi eaha sina kulakha umuruisho kuu. 32 Na ani nikurarengeshwa ana he msalaba ninemkhuru vahe vakhabuna valite hagho." 33 Yesu eekuvabaia kigi vahe venemgaa. 34 Kwato ka vahe vekamba, "Miku kanu ituba ite Masia enezokho madamo khabuna. Umuru kimomo kuba ite Muinyi wa Muhe enegaiwa he msalaba ana? Ka Muinyi wa Muhe niji?" 35 Yesu ekavaba, "Luatame lucheri khwa hawe na kune kwa madamo maghere. Dahani mwerelo naka luatame, kalo kidughu chiseemumuru, kwaite muhe edaha he kidughu teila hodi eso. 36 Kwato, madamo mweelo ka luatame ludarisheni kalo mukhwa vainyi va luatame."

Yesu erefi kuyo to ekaso uda ekakumatu vahe vasimuaho. 37 Yesu hawe na kuboi vimako ikumure vekaviaho, mira tevemdarishe. 38 Kwaite mroto Isaya wakwe Kiumbi eyoe kweri ekuba,

" Dilao, niji eidarishe mburi kanu?

Naho umuruisho wa Dilao uakhoike heji?"

39 Kwato tevemurue kudarisha, niu chiro Isaya mroto wa Kiumbi nau eebae,

40 "Kiumbi ayagaa maila kini,

aboi kutoti kini kusiboi nyamalo;

kalo vasireakho kwa maila kini,

Naho vasireila kwa akiri kini,

Naho veseeyo makusa kini nakuyaro,

Kiumbi nau ekavauti."

41 Isaya mroto wa Kiumbi eyoe to azeto na azeto kwaite eeakhoe cho Dilao emgiru naho ekagonda mburi kuu. 42 Mira vagiru va Vayahudi vakumure veemdarishe Yesu, mira kwa mburi ya Mafarisayo tevemdarishe he maila ya vahe kwaite vekubughenu ite venegugulujwa hodi ha kusaheya Vayahudi. 43 Veekudumu kukoiwa ni vahe kuro kukoiwa ni Kiumbi.

44 Niho Yesu ekayoisha ekaba, "Muhe enidarisha ani, tenidarisha ani bi mira eramdarisha nahu enisughae. 45 Eniakho ani eramuaho nahu enisughae. 46 Ani nilitie he vahe va idi kalo nikhwa luatame lwa kweri, kalo vakhabuna venidarisha vasifufu he kidughu. 47 Ani simzamari muhe neri muwe ekoia mahinyo gho mira teako, ani sikamzamari kwaite ani silitie kulizamari idi, mira nilitie kulikaa he makusa. 48 Venilhi ani na kusaadara mahinyo gho helo enevazamari. Viome vyo niyoe nivyo vinekhwa niu yenevazamari he muaze wa mkhito. 49 Ani siyoe ya mburi kwa kudumu salaghe, mira Aba enisughae niu enibaie mburi ja kuyo naho nijiyo kimomo. 50 Ani nireila ite mburi enisughae nijiyo jenevaboi vahe vazokho maaze makhabuna. Kwato ani niyo hu mburi Aba enisughae niyo."