1 Yesu erefiriti kuyo to, ekawesia ana he Kiumbi ekaba, "Aba madamo gho yaahe, aija ugiru wa Muinyi kechi kalo Muinyi nau avaaije ugiru kechi. 2 Kwaite Aba um'oe Muinyi ugiru he vahe vakhabuna huvo um'oe, kalo avao uzime wa maaze makhabuna huvo umuoe. 3 Uzime wa maaze makhabuna niu ya, vahe vakuile ite ari ni Kiumbi wa kweri uaha salaghe, naho vaniile Yesu Masia unisughaye. 4 Naakugimbika heya idi, kwa kuifiriti hu nyamalo unisughaye niboi. 5 Aba nikulhawa unio ugiru hu neelo nawo madamo neaha naari idi lesinaba. 6 Navaaija hu vahe wenioe kuli he idi cho utoe. Nee vahe kechi na ari ukavanio ani vakhwa vagho, navo vaaboi hucho uvabae vaboi. 7 Kwato vaile ite vikhabuna unioe vilie ha kechi, 8 kwaite hu unibaiye navahinya, navo vaavidoria, kahali vaile ite kweri nilie he ari, naho vaadarisha ite ari niu unisughae. 9 Nivaaresia vo. sivaaresia vahe vesinidarisha, mira nivaaresia huvo unioe, kwaite ka nivahe kechi. 10 Vahe gho vakhabuna nivakechi na vahe kechi ni vahe gho, naani naaowe ugiru kwa mburi ya mifufure kini. 11 Ani siaha kahali he idi, mira vo vecheri aha he idi, naani nitalita he ari. Aba ufurue salaghe, ya vahe unioe uvalaaru kwa umuruisho ulo nau, kalo vakhwa kigi kiwe sa kigi nne cho tukigi kiwe. 12 Madamo neaha navo, neevalaarue kwa kuvabaia hu ukweri unioe wa mitore kechi. Neevalaarue vasidarwe ni ukusa, simlahatie neri muwe kuro bi hu ekeiwe kuoniwa, kalo yalijanye hu magondo ya Kiumbi yegondiwe ite yamlijanyie. 13 Iji nitalita hakechi, mira nirayo viome ya nikukhwa nicheri aha he ya idi, kalo vakhwa na mlhamuisho ufurue sakigi ufurue ya mlhamuisho nilo nawo ani. 14 Ani naavahinya huyo udumue nivahinye, vahe va idi vekavasanuiya kwaite vo si vahe va idi, sahu kigi ani nisi muhe wa idi. 15 Sikulhawa ite uvagu he idi, mira nikulhawa uvake uda nahu mkusa Shetani. 16 Vo si vahe vaya idi, sahu kigi ani nisiwaidi. 17 Nikulhawa uvaboi vakhwa vahe kechi kwa kwalhi ya ukweri, kwaite mahinyo kechi niya kweri. 18 Sahu kigi unisughae he vahe va idi, na ani nitavasugha ya vahe he vahe va idi. 19 Nitakuke kukunyamarikia ari kwa mburi kini kalo navo vakuke he ari kwa kwalhi ya kweri. 20 Sivaaresia waya bi, mira nivaaresia nahu vakhabuna venedarisha kutakhoiya viome venebaiwa niya venidarishe. 21 Niaresi kalo vakhabuna vakhwa kigi kiwe, sa kigi ari Aba! uaha za hagho na ani cho niaha za kechi, navo vakhwa za kanu, kalo vahe va idi vadarishe ite ari niu unisughae. 22 Ani nivaoe ugiru sahu unioe ani, kalo vakhwa kigi kiwe sa kigi ari na ani tuaha kigi kiwe. 23 Ani nikhwa za kini, sa kigi ari uaha za gho, kalo swaho kini jiisekoishe, niho vahe va idi veneile ite ani nilie he ari, naho uvadumue sa kigi unidumue ani. 24 Aba, kise gho ni ite hu vahe unioe vakhwa hawe na ani to ninekhwa, kalo vamuru kuakho lugimbiko lugiru na luatame gho unioe, kwaite weenidumue kuli idi leesihaaha. 25 Aba Mzalo Ukweri, neri ite vahe va idi tevekuilie, mira ani nikuilie. Ya navo vereile ite ni ari unisughae. 26 Naavaaija kigi utoe, naho nineraboi to, kalo ludumuisho kechi ulo nau he ani ukhwa za kini, naho ani nikhwa za kini."