1 Yesu areila ite Mafarisayo vaako ite ebunguru na kubatija vahina vakumure kutakho Yohana. 2 Ukweri niite Yesu salaghe siu eekubatija, mira vahina kuu neevo veekubatija. 3 Kwato Yesu na vahina kuu vekali he idi la Yudea vekakirii Galilaya. 4 Mira he bari kuu eekudumuwe atakhoie Samaria. 5 Ekahe hodi hesewa Sikari he muang'a wa Samaria, ata nee sina nahu mbuva yo Yakobo emuoye muinyi kuu Josefu. 6 Kisima chakwe Yakobo cheaha ata. Yesu nau eekwahie kwa bari, kwato ekazokhodi sina nahu kisima. Madamo ka nee chakako kaaze keekukhaisha. 7 Niho mlage muwe kuli Samaria ekaso kurabukhu mai, Yesu ekamba, "Nio mai niwaha." 8 Madamo ka vahina kuu veesoye he muang'a kurawe viaghu. 9 Hu mlage Msamaria ekamba ari , "Chimuruika kimomo ari u Myahudi na ani ni Msamaria kwaakhoni utanilhawa mai?" Eembaie to kwaite Vayahudi teveekuboi vigi kini hawe na Vasamaria. 10 Yesu ekamba, "Kai uteila kitumulilo cho Kiumbi eseekuo, na kuila ite niji ekuba nio mai niwaha, waari wesemlhawa akuo mai enekuboi ukhwa na uzime." 11 Hu mlage ekamba Yesu, "Dilao ya kisima nkikulhe mira tulo neri kikholhe chakubukhuia mai kuli he kisima. Ka mai ya uzime uyagu nale? 12 Tuba ari umgiru kumtakho kaka mkanu Yakobo etuoe ya kisima? Yakobo salaghe na vamilo kuu hawe na wa kuu veekubukhu na kuwaha mai yaya kisima." 13 Yesu ekamba, kira ewaha mai kuli heya kisima enekhwa na kasu kahali. 14 Mira vakhabu na venewaha mai ninevao ani, tevekakhwa na kasu neri. Mai ninevao ani inekhwa shoko inevao uzime usikhita. 15 Hu mlage ekamba, "Dilao nio ka mai niwaha kalo nisikhwa na kasu kahali, naho nisilita kahali kubukhu mai ii!" 16 Yesu ekamba, "So uremse muagiru kechi, ulite nau ii." 17 Ka mlage ekamba "Ani silo muagiru." Yesu ekamba "Wayo kweri, ite tulo muagiru. 18 Kwaite weelo vaagiru vakoi, naka udie nau waijiji simuagiru kechi. Ata wayo kweri." 19 Ka mlage ekamba, "Dilao niakho ite ari umroto wa Kiumbi. 20 Vakaka kanu vearesie heya lubwa, mira kune muba ite hodi hakumuaresia Kiumbi ni twai Yerusalemu." 21 Yesu ekambaya hu mlage, "Nidarisha ani, madamo elitie munemuaresi Aba mira si ii heya lubwa, neri twai Yerusalemu. 22 Kune vahe Vasamaria mumuaresi hu msimuilie, mira nne Vayahudi tumuaresi Kiumbi tumuiliye, kwaite lukombo lulie he Vayahudi. 23 Mira madamo elitie, naho yaahe, hu vaaresi va kweri, venemuaresi Aba kuli he swaho ilai vekuuma he kweri. Kwaite Aba evadaa vahe saya vamuaresi. 24 Kiumbi ni Saa, na vahe vakhabuna vemuaresi vedumuwa vamuaresi kuli he Swaho na kuuma he kweri." 25 Ka mlage ekamba, "Nireila ite Kiristo elhoijwe ni Kiumbi elitie." Niu Kiristo elhoijwe ni Kiumbi. U ekuralita enetubaia mburi khabuna. 26 Yesu ekamba, "Ani niyo naari, niu Masia elhoijwe ni Kiumbi." 27 Madamo waka aka vahina kuu vekakirii, vekamaka kumuakho ekuyo na mlage. Mira tehelo muhe embaye, "Udumu kiakhoni heya mlage? Hile emlhasue, Kwaakhoni uyo nau?" 28 Ka mlage ekaro sange kuu to, ekaso he muang'a kuravabaia vahe, 29 "Litani mremuakho muhe enibaiye mburi khabuna jo niboie! Hile, imuru kukhwa niu Masia elhoijwe ni Kiumbi?" 30 Kwato vahe vekali he muang'a, vekaso hodi Yesu eaha. 31 Madamo waka aka vahina kuu veekumgogo, "Mhinya a viaghu." 32 Mira Yesu ekavaba, "Ani nilo viaghu vyo kune musiviilie." 33 Niho vahina kuu vekalhasuana, "Hile, helo muhe emgerie viaghu?" 34 Yesu ekavaba, "Viaghu gho ni kuboi hucho Kiumbi edumu na kuifiriti nyamalo kuu enisughae." 35 Kune muba, "Imerisie milhihe mihai bi kuhe madamo ya kuloja." Mira ani nimubao, "Wesiani vahe cho veliti he ani vetoe sa mbeyu jiaha sina kulojwa." 36 Mzaloja eralhanuwa, nau enebunguru ulojo naka ulojo ni vahe velaa uzime wa maaze khabuna, kwato elhae nahu elojie velhamuiwa hawe. 37 Kwato ya kiome chiba "Muwe elha mbeyu mhali eloja, ni kwerisha." 38 Ani neemusughae mureloja ulojo wo musilhae, vahali veeuboie nyamalo ure, mira kune mulhanuwa kuli he nyamalo kini.

39 Vasamaria vakumure hehu muang'a veemdarishe Yesu kwaite hu mlage eevabae "Ya muhe aanibaiya kira kigi neeboiye." 40 Kwato hu Vasamaria vemliahe vekamgogo afufu hakini, Yesu nau ekafufu navo miaze minu. 41 Madamo ka vahe vakumuresha vekamdarisha Yesu kwa mburi ya viome kuu. 42 Niho vekamba ka mlage, "Waijiji tudarisha mira si kwa viome kechi bi utubaie, mira nikwaite twaamko nne salaghe, naho tureile ite niu Mzakaa idi he kharo."

43 Hu maaze manu areatakho Yesu ekali ata Samaria, ekaso Galilaya. 44 Yesu salaghe eeyoe ite, "Mroto wa Kiumbi tekoiwa he muang'a kuu salaghe." 45 Kwato areahe Galilaya, vahe vakumure vekamdoria. Kwaite navo veereaha he elha ya Pasaka naho veeakhoe mburi khabuna Yesu eejiboiye are Yerusalemu madamo yaka elha. 46 Yesu ekahe kahali are he muang'a usewa Kana, are Galilaya, hodi eekheritie mai ikakhwa divai. Are heelo dilao muwe elo muinyi kuu mrukhao are Kapernaumu. 47 Ka dilao areakoia ite Yesu elie Yudea nakulita Galilaya, kwato ekaso hodi eaha ekamlhawa aso nau Kaperanaumu kalo aremuuti muinyi kuu eeaha sina na kuga. 48 Yesu ekamba, "Kune vahe mukusaakho lhaa na vimako neri temudarisha." 49 Ka dilao ekamba "Dilao tuso hawe, muinyi gho esinaga." 50 Yesu ekamba, "Sobi, muinyi kechi aau pere." Ka muhe ekadarisha viome vyakwe Yesu, ekalholhoshi kukhwaa ang'a. 51 Areakhwa echeri aha kwalhi, vanyamalo kuu vekamdaria vekamba, muinyi kechi ni mzime. 52 Hu dilao ekavalhasu mburatu gho eue madamo mina? vekamba "Osa kela saba ha chakhakho, ihoma likamro." 53 Ka dilao ekahulha ite ni wahuhu madamo Yesu embaiye, "Muinyi kechi eneu." Ata u na vahe kuu vakhabuna edie navo vekamdarisha Yesu. 54 Ya ni kimako cha kanu Yesu eeboiye arehe Galilaya areali Yudea.