1 Yesu eevabae, "Musibughenu he swaho kaghu, kai mumdarisha Kiumbi, nidarishani na ani wato. 2 Ang'a hakwe Aba gho helo hakuzoko hakumure. Kai sito sesemubaie ite nitaso kuramuboia kikulho hakuzokho. 3 Naho nikufi kumuboia hodi hakuzoko, ninekhwaa kumudori kalo mukhwa hawe na ani to hodi niaha. 4 Kune mureila kwalhi iso are hodi niso." 5 Tomaso ekamlhasu, "Dilao, tetuilie hodi uso, tunemuru kimomo iji kuila ka kwalhi ya kuhe are?" 6 Yesu ekamba, "Ani ni kwalhi, na kweri na uzime. Tehelo emuru kuso hakwe Aba ekusekaetiwe ni ani. 7 Kai muniilie ani, munemuila ne Aba gho. Kulholhoshia waijiji muremuila Aba, kahali mwafi kumuakho." 8 Filipo ekamba, "Dilao, tuaije Aba ata niho swaho kanu jinetaa." 9 Yesu ekamba, " Filipo nazokho na kune madamo makhabuna mira tuniilie? Muhe eniakhoe ani amuakho ne Aba. Umuru kimomo iji kuba, tuaije Aba?" 10 Ho, tudarisha ite ani niaha za he Aba ne Aba nau eaha za gho? Viome nimubaia sivigho mira Aba ezokho za gho niu eboi ya nyamalo. 11 Mudumuwa kudarisha nikuba ite ani niaha za he Aba, Aba nau eaha za gho. Kai sito, nidarishani kwa lhaa mujiakhoe. 12 Kweri nitamubaia, hu venidarisha veneboi nyamalo nijiboi ani, kahali veneboi nyamalo giru kutakho ya, kwaite ani nitaso he Aba. 13 Kira kigi munelhawa chiaha he midumuire gho, ninemuo kalo Aba agimbikwe kutakhoia Muinyi kuu. 14 Kai mkunilhawa chiaha he midumuire gho, ninechiboi.

15 "Kai munidumu munedara miku gho. 16 Ninemlhawa Aba nau enemuo Mzalhaari mhali, enezokho na kune maaze makhabuna. 17 Ka ni Saa wa Kiumbi enemuaija ukweri. Hu vahe va idi tevemuru kumdarisha kwaite tevemuru kumuakho neri kumuila. Mira kune muremuila kwaite ezokho na kune nau eaha he swaho kaghu. 18 Nikuso, sikamuro sa vainyi vahuye, ninekhwaa kahali. 19 Hemerisie madamo maghere idi telikaniakho kahali, mira kune muneniakho, kwaite ani nilo uzime na kune munekhwa na uzime. 20 Ka muaze ukuhe muneila ite ani niaha za he Aba, na kune muaha za gho, na ani za kaghu. 21 Kira muhe edarisha miku gho nakujidara, ka niu enidumu. Naka enidumu ani enedumuwa ni Aba gho, na ani ninemdumu na kukuaija heu." 22 Niho Yuda mhali, sihu Yuda Isikarioti ekamba, "Dilao, kwaakhoni utubaiya ite unekuaija he nne naho si he vahe va idi?" 23 Yesu ekamba, Vahe vekunidumu venedara mahinyo gho, Aba gho nau enevadumu, naho ani ne Aba tunebale tuzokho navo. 24 Esinidumu tedara mahinyo gho. Naka mahinyo muakoie simagho, mira ni mahinyo yakwe Aba enisughae. 25 Nimubaie ya mburi madamo nicheri aha hawe na kune. 26 Mira ka Mzalhaari, niu Saa wa Kiumbi enesughawe ni Aba kutakhoia mburi gho, enemuhinya kira kigi na ekumuhulhati vikhabuna nimubaie. 27 Nitamuroiya nhunguru gho, ya nhunguru gho nimuroia teitoe nahu nhunguru muowa ni idi. Musihiri he swaho kaghu neri musibughenu. 28 Mwenikoie niremuba, Nitaso, mira ninekhwaa kahali he kune. Kai mweenidumue, mweseelhamuiwe kwaite nitaso hakwe Aba, ake u ni mgiru kutakho ani. 29 Nimubaie to waijiji esinaba kulijanya, kalo ekunelijanya mumuru kudarisha. 30 Sikayo na kune mburi kumure, kwaite Shetani, mgiru waya idi elitie. Mira telo umuruisho he ani, 31 mira vahe va idi vedumuwa vaile ite, nimdumue Aba, niu chiro niboi sa kigi Aba eniaji. Iji umani tuhali ii.