1 Yesu arefiriti ata ekatakho kuso bwa mhali wa iziwa la Galilaya, kwa ilhe ihali lisewa iziwa Tiberia 2 Ifyo igiru la vahe leekumliaha kwaite veakhoe lhaa eekujiboi ja kuvauti varukhao. 3 Niho Yesu ekakutu he lubwa ekazokhodi hawe na vahina kuu. 4 Heka maaze elha ya Vayahudi isewa Pasaka ye hee sina. 5 Yesu arewesia ekaakho ifyo la vahe vakumure vemlitia, ekamlhasu Filipo, "Tunewe le mikate kalo ya vahe vaa?" 6 Eelhasue to kwaite ekumgali bi Filipo, kwaite ereila cho eneboi. 7 Filipo ekamba, "Neri vikhao magana manu vya madini ya mihaku teviagha kuweia mikate kalo vahe khabuna vaa." 8 Mhina kuu mhali, mgitutu wakwe Simoni Petro esewa Andrea, ekamba, 9 "Helo mburatu muwe elo mikate mikoi ya shairi na samaki nu, mira ya teviagha neri he vahe vakumure saya." 10 Ata heelo kibanda chilo mahako makumure mahilhe. Yesu ekaba, "Vabani vahe vazokhodi." Niho ka vahe vekazokhodi, veerahe vaagiru erufu koi. 11 Yesu ekadori hu mikate, ekamuaresi Kiumbi, ekavakhakhaya vahe veezokhodie; ekaboi watoto nahu samaki, kira muhe ekasiki sakigi edumuye. 12 Vahe vareakhu, Yesu ekavaba vahina kuu, "Dodolini ka vikhao vimerisie, hasilakha neri kiwe." 13 Niho, vekavibunguru ka vikhao vya mikate ya shayiri vimerisiwe, vekahuija viteju ikado na vinu. 14 Vahe vereakho ka vimako vyo Yesu eboiye, velholhoshi kuba, "Kweri ya niu mroto wa Kiumbi elitiye he idi." 15 Yesu areaila ite vahe vedumuye vamboi akhwa dilao esidumuye u salaghe kwato ekaazaghana ekaso he lubwa salaghe.

16 Hareakhokwa, vahina vakwe Yesu vekadimi kuso he iziwa, 17 vekabuu he mashua kalo vatakho kuso Kafaranaumu. Kidughu cheebuiye, Yesu ekakhwa tenavaheiya. 18 Iziwa likakhwa na nkunkunho kwaite saa giru ya mai yeekuvumira. 19 Vahina vareakhwa vesoe na mashua uda urahe kilomita koi hile tizu, vekamuakho Yesu ekudaha ana he mai, naho ekulita sina na mashua, vekabughenusha. 20 Mira Yesu ekavaba, "Niani musibugheno!" 21 Niho vekadumu Yesu abuu he mashua kini, waata ata mashua ikahe hodi veekuso.

22 Muaze wa kanu ifyo la vahe vakumure veemerisie mlha wakanu wa iziwa veeakhoe mashua we imerisie. Naho veeakhoe ite Yesu teebuie he mashua we na vahina kuu, mira ka vahina niu vesoe salaghini. 23 Mashua hali kuli Tiberia jikahe sina nato hodi vahe veeaie hu mikate, Dilao arefiritii kumgimbika Kiumbi. 24 Wato oto ifyo la vahe vareaila ite Yesu na vahina kuu vaahali to hodi, vekabuu he mashua kini vekaso Kaperanaumu varemdaa.

25 Hu vahe varemheia Yesu bwa wakanu wa iziwa vekamlhasu, "Mhinya, uhee ami ii?" 26 Yesu ekavaba, "Nitamubaiya ukweri, temunidaa kwa mburi yahu lhaa mujiakhoe nikujiboi, mira munidaa kwaite mweeae mikate mukakhu. 27 Musinyamarikie viaghu vionika, munyamarike kwa viaghu vinefufu maaze makhabuna. Ka niu viaghu Muinyi enemuo kwaite Kiumbi Aba aaija ite ani niu." 28 Niho navo vekamlhasu, "Ho, tusamo kalo tumuru kujiboi nyamalo ja Kiumbi?" 29 Yesu ekavaba, "Ya niu nyamalo Kiumbi edumu muiboi niu ya, kumdarisha hu emsughaye." 30 Vekamba, "Ho, uneboi lhaa mina tujiaho kalo tumuru kukudarisha? Ho, Uneboi kimako mina?" 31 Vakaka kanu veeae mana are he ilangwa, sakigi magondo ya Kiumbi eyo, Eevaoe viaghu kuli ana he Kiumbi. 32 Yesu ekavaba, "Kweri nitamubaya, Musa siu emuoe viaghu kuli ana he Kiumbi, mira Aba gho niu emuo viaghu vya kweri kuli ana he Kiumbi. 33 Kwaite viaghu vya Kiumbi emuo nihu edimi kuli ana he Kiumbi na kuvao vahe va idi uzime wa maaze makhabuna." 34 Vekamba, "Dilao, utuo ka mkate kira muaze." 35 Yesu ekavaba, "Ani niu viaghu vya uzime. Eneniliaha ani tekakoie kela neri, nahu enidarisha tekakoiye kasu neri. 36 Kwato neemubaie ite, mwaniaho mira temunidarisha. 37 Hu vakhabuna Aba enio venelita hagho, neri muhe muwe eneniliaha sikambibi, 38 kwaite nidimiye kuli ana he Kiumbi, silitie kalo nikuboi midumure gho salaghe, mira nilitie kuraboi kigi edumu hu enisughaye. 39 Hu enisughae edumu niboi to, hehu vahe enioye nisimbibi neri muwe, mira muaze wa mkhito wa idi nivakaa vakhabuna kuli he kigame. 40 Kwaite kigi Aba edumu niya, kira emuaho Muinyi ekumdarisha akhwa na uzime wa maaze makhabuna. Na ani ninemkaa kuli he kigame he muaze wa mkhito wa idi." 41 Kwato Vayahudi vakuwe vekalholhoshi kumyo, kwaite ebaye, "Ani ni viaghu vidimie kuli ana he Kiumbi." 42 Vekaba, "Ho ya muhe si muinyi wakwe Josefu? Tumuiliye abaghe ne alhii kini. Emuru kimomo kuba, Nidimie kuli ana he Kiumbi?" 43 Yesu ekavaba "Roni kung'ung'urikiana." 44 Tehelo muhe emuru kulita hagha, Aba enisughaye ekusaamgera hagho, naho ani ninemkaa ka muhe kuli he kigame muaze wa mkhito wa idi. 45 Varoto va Kiumbi veegondie ite, "Vahe vakhabuna venehinywa ni Kiumbi." Kira muhe ekoie na kuhina kuli he Aba, enelita hodi niaha. 46 Tehelo neri muhe emuakhoe Kiumbi Aba , mira hu bi edimie kuli ana he Kiumbi, ka niu emuahoe Aba. 47 Nitamubaia ukweri, hu enidarisha enekhwa na uzime usikhita. 48 Ani niu viaghu vya uzime. 49 Vakaka kaghu veeae mana he ilangwa, mira vekaga. 50 Mira ya niu viaghu vilie ana he Kiumbi kalo kira enea asiga. 51 Ani niu viaghu vya uzime vidimie kuli ana he Kiumbi. Muhe enevia ya viaghu enefufu maaze khabuna. Viaghu ninemuo ni msa gho, niugu kwa mburi ya uzime wa vahe va idi. 52 Niho Vayahudi vekalholhoshi kutakhoana viome kwa malhaha, "Ya emuru kimomo kutuo msa kuu, tuua?" 53 Yesu ekavaba, "Kweri nitamubaia mukusa a msa wa Muinyi wa Muhe na kuwaha sako kuu, temkakhwa na uzime wa maaze makhabuna za kaghu. 54 Muhe ea msa gho na kuwaha sako gho, elo uzime wa maaze khabuna, kwato ninemkaa kuli he kigame muaze wa mkhito. 55 Kwaite msa gho ni viaghu vya kweri, na sako gho ni chakuwaha cha kweri. 56 Ea msa gho na kuwaha sako gho, enezokho za gho, na ani ninezokho za kuu. 57 Sa kigi Aba enisughaye elo uzime naani nizokho kutakhoia he Aba, nire wato hehu enenia enezokho kwa kwalhi gho 58 Ya niu viaghu vilie ana he Kiumbi, tevitotie nahu vakaka kaghu veae navo vekaga. Kira enea ya viaghu tekaga mira enezokho maaze khabuna." 59 Yesu eeyoe viome ka, to eekuhinya are he minda veekusahea Vayahudi are Kaperanaumu.

60 Vahina vakumure vareako to vekaba, "Ya mahinyo ni maure! Niji emuru kuyadoria?" 61 Yesu eiliye e ite vahina kuu veekung'ung'urika kwa ka mahinyo, ekavalhasu, "Ho, ya mahinyo emuboi muro kunidarisha? 62 Inekhwa kimomo iji mukumuakho Muinyi wa Muhe ekukutu kuso twai hodi eeaha azeto? 63 Swaho wa Kiumbi niu egera uzime, msa teumuru kuboi kigi kwa u kuu bi. Viome nimubaie niu viboi mukhwa na Saa wa Kiumbi emuo na uzime. 64 Mira he kune helo hu vesinidarisha." Yesu eyoe to kwaite madamo khabuna eilie ite nivaji vesidarisha, kahali niji enemkherii. 65 Kwato ekaba, "Niu chiro neemubae ite tehelo emuru kulita hagho sari Aba amdumuije." 66 Kwa mburi ya, Vahina kuu vakumure vekagawe ni swaho vekaro kumliaha naho tevesoe nau he barime kuu. 67 Kwato ekavalhasu hu vahina ikado na vanu eevalhoije, "Ho, na kune mudumu kuso?" 68 Simoni Petro ekamba, "Dilao, tuneso hakweji? Ari ulo viome vituo uzime wa maaze makhabuna. 69 Nne twaadarisha na kuile ite ari uwa Kiumbi naho usughawe ni Kiumbi" 70 Yesu ekavaba "Ho, seemulhoije kune ikado na vanu? Mira muaro kaghu muwe ni Shetani!" 71 Yesu eekumyo Yuda, Muinyi wakwe Simoni Isikarioti, kwaite ,neri ite nee muwe wahu vahina ikado vanu mira niu eneramkherii.