1 Yesu arefiriti kumlhawa Kiumbi, ekatakho hawe na vahina kuu bwa wa kanu wa kaseu kesewa Kedroni. Vekabuu he mbuva ya mikhatu ya mizeituni. 2 Yuda, enemkirii Yesu eerehaile to hodi kwaite Yesu eemanyere kusahe ata na vahina kuu kira madamo . 3 Kwato, Yuda ekalita he mbuva ya mikhatu ya mizeituni. ekukhwa ekaetijane na vaaku va Kirumi, vakilaaru va minda ya Kiumbi veesughaiwe ni vagiru va Muaresi na Mafarisayo, navo veedarae vijari, vibune vilo mwalha na vigi vya aku. 4 Niho Yesu ekuile makhabuna yenemlianyija, ekakuguanya hevo ekavalhasu, "Mumdaa ji?" 5 Navo vekamba, "Tumdaa Yesu kuli Nazareti" Yesu ekavaba, "Niu ani." Yuda enemkirii Yesu nau eeumae hawe naka vahe. 6 Yesu areavaba, "Niu ani," vekakhwaa mzungure, na kulhu di. 7 Yesu ekavalhasu kahali, "Mumdaa ji?" Vekamba, "Yesu kuli Nazareti!" 8 Yesu ekavaba, "Naamubaiyaa ite ani niu, kwato kai munidaa ani, varoni ya vaso kini. 9 Eeyoe to kalo hu viome vyo eeyoe vifuru, simlahatie neri mhe muwe he hu unioe." 10 Niho Simoni esewa Petro eelo sime ekaigu naho ekampaa ilama la sughano hu mhaye wa mgiru wa muaresi. Ka mhaye eekusewa Malko. 11 Yesu ekamba Petro, "Re sime kechi he iala. Ho, utoti ite siye kudoria kharo jo Aba gho edumu nijitakhoiye?"

12 Niho hu vaaku na vagiru kini na vakilaaru va Minda ya Kiumbi, vekamdara Yesu vekam'oro. 13 Mgiru wa bosi ho vemtiiye Yesu nee Anasi. Anasi nee mkora wa kiagiru wakwe Kayafa. Kayafa neeu mgiru wa muaresi heka mko. 14 Kayafa neeu eevaajie Vayahudi ite chidumuwa muhe muwe aga kwa mburi ya vahe vakhabuna.

15 Simoni Petro hawe na mhina mhali vekamliaha Yesu. Kwaite ka mhina mhali eekuiliana na mgiru wa muaresi, kwato ekabuu hawe ne Yesu za he kivanda chiaha zaya lugo lwa minda ya mgiru wa muaresi. 16 Mira Petro eeumaye gahana sina na luhige lwa kubuuya he kivanda, kwato hu mhina mhali veeiliane na mgiru wa muaresi ekali gahana ekayo na mualeta nee mkilaaru he luhige, ekamdumuija Petro abuu za. 17 Ka mualeta ekamlhasu Petro, "Ho, na ari u muwe wa vahina va ya muhe?" Petro ekamba, "Hai ani si mhina kuu" 18 Ka nee madamo ya saa vahaye na vakilaaru veekhaije mwalha wa makale navo veujunguluke vekukakati, Petro nau eeumaye hawe navo ekukakati.

19 Niho Anasi hu eekhwae mgiru wa muaresi ekamlhasu Yesu mburi ya vahina kuu na mahinyo kuu. 20 Yesu ekamba, "Neekuhinya lheme mbele ja vahe vakhabuna, kira madamo neekuhinya hakusahea Vayahudi na he Minda ya Kiumbi, hodi ho Vayahudi vesahea. Tehelo kigi cho nihinyie kwa kumatu. 21 Kwakhoni unilhasu? Valhasu hu vekoie ka mahinyo ite nivabae mo. Vo vereila cho nivabaiye." 22 Areafiriti kuyo to mkilaaru muwe eumae hesina nau ekamma izoghera ekaba, "Ka nicho umuru kumba mgiru wa muaresi?" 23 Yesu ekamba, "Kai niyoe kigi chisiye kuyo, chiyo he vahe, mira kai niyoe kweri kwakhoni unima?" 24 Niho Anasi ekamtii Yesu he mgiru wa muaresi esewa Kayafa, Yesu ekukhwa erecheri orowe mulhu.

25 He ka madamo Petro eumae ekakati mwalha nahu vahe vekumlhasu, "Ho, ari sire muwe wa vahina kuu?" Petro ekalhi ekuba, "Hai ani si muwe kini" 26 Mnyamalo muwe wa mgiru wa muaresi, mbahu wahu eteiwe ilama ni Petro, ekamlhasu, "Ho, sikuahoe ari hawe ne Yesu twai he mbuva ya mikhatu ya mizeituni?" 27 Petro ekalhi kahali, wato to ikuruve likazo.

28 Madamo ka he kutalholhoshi kulhe, niho vekamdori Yesu kuli hakwe Kayafa vekamtii he iminda la kidilao lakwe Pilato ee dilao wa Varumi mira Vayahudi tevebuiye za kalo vamuru kudumuijwa he miku ya kumuaresi Kiumbi, naho vamuru kua viaghu vya Pasaka. 29 Kwato Pilato ekali gahana ekavalhasu, "Mulo maoghe mina naya muhe?" 30 Vekamba, "Kai ya muhe see mzaboi makusa, tetwesee mgera he ari." 31 Pilato ekavaba, "Haya mdorini wa kune muremzamari kuli he miku kaghu."Vayahudi vekamba, "Nne tetudumuijwa kumzamari muhe kigame neri muwe." 32 Cheeboike to kalo vilianye viome Yesu eeyoe kuaija ite enega kigame mina. 33 Kwato Pilato ekabuu kahali he iminda ya kidilao ekamse Yesu ekamlhasu, "Ai ari niu dilao wa Vayahudi?" 34 Yesu ekamlhasu, "Ho, ari uyo to kwa mitotire kechi hile vahe vahali vetekubaiya mburi gho?" 35 Pilato nau ekamlhasu, " Ho, ani ni Myahudi? Vahe kechi na vagiru va muaresi vetekugera he ani. Ho, uonie kigi mina?" 36 Yesu ekamba, "Udilao gho teuaha heya idi. Kai udilao gho ne waya idi, vahe gho veniliaha veseenilhaari nisibutuwe he miharegha ya Vayahudi. Mira iji udilao gho teuli he ya idi. 37 Pilato ekamlhasu, kwato ari udilao?" Yesu ekamba, "Niari uyoe ite ani nidilao. Ani niakhoike na kulita he ya idi kwaka mburi we bi, kalo nimubaiye ukweri. Kira muhe edumu ukweri ereile ite yo niyo niya kweri." 38 Pilato ekamlhasu, "Ukweri ni kigi mina?"

Pilato arefiriti kuyo to, ekali gahana kuvaliaha Vayahudi, ekavaba, "Ani siaho kigi eonie ya muhe. 39 Mira kune muraboii to ite kira madamo ya elha ya Pasaka mumgu muhe muwe eeorowe. Ho, mudumu nimmgu Dilao wa Vayahudi?" 40 Niho vekayo kwa kuma gimbe vekuba, "Hai siu, tumdumu Baraba!" Ka Baraba nee mzala.