1 Yesu areakhwa etaho, ekamuakho muhe egae maila kuli kuahoika kuu. 2 Vahina kuu vekamlhasu, "Mhinya niji eboie makusa, niho ekaahoka teaho, niya muhe hile nihu vemsae?" 3 Yesu ekavaba, "Ya muhe teboie makusa neri hu vemsae teveboie makusa, mira eahoke to kalo nyamalo ya Kiumbi iahoike he mizokhore kuu. 4 Ikukhwa hecheri chakako tudumuwa tuboi nyamalo ja hu enisughaye, kwaite kiama chilitie tehelo enemuru kuboi nyamalo. 5 Ikukhwa nicheri aha heya idi, ani ni luatame lwa vahe va idi." 6 Arefi kuyo to, ekabusu mapae di he mpulhe, ekaboi kisalo kwa mapae, ekamlhomi hu muhe esiaho he maila. 7 Ekumba "So ureonhi vubasa he idibo lamai lisewa siloamu." nikuba "Esughawe." Niho hu muhe ekaso, ekaonhi, ekakirii eakho. 8 Vahe kuu vasina na vahe vahali veemuakhoe ekulhawa lhawa, vekalhasuana, "Ho ya sihu muhe eekuzokodi ii na eekulhawa lhawa?" 9 Vahe vakuwe vekaba, "Niu." vahali vekaba, "Siu mira etatotiana nau." Mira ka muhe ekaba, "Niani." 10 Kwato vekuramlhasu, "Iji, maila kechi eelhaike kimomo niho ukamuru kuakho?" 11 Nau ekavaba, "Hu muhe esewa Yesu eeboie kisalo, ekanilhomi he maila gho ekaniba, niso nireonhi vubasa he idibo la Siloamu. Naani nikaso, nikaonhi nikamuru kuakho." 12 Vekamlhassu, "Ka muhe u eaha le?" Ekavaba, "Siilie ani."

13 Vekamtii hu muhe elhaiwe maila he Mafarisayo. 14 Ka muaze Yesu areboi kisalo ekamlhomi ka muhe he maila, naho maila kuu ekalhaika nee Muaze wa kusaaboi nyamalo. 15 Mafarisayo vekamlhasu kahali ka muhe, "Umurue kimomo kuakho?" Ekavaba, "Etenilhomi kisalo he maila gho, nikaonhi vubasa naho waijiji niakho." 16 Mafarisayo vakuwe vekaba, "Muhe emuru kuboi to teli he Kiumbi, kwaite tedara miku ya Muaze wa kusaaboi nyamalo." Mira vahali vekaba, "Muhe elo makusa emuru kimomo kuboi vimako vitoe to?" Mafarisayo vekatakhoana viome. 17 Vekamlhasu kahali ka muhe elhaiwe maila, "Kwaite akulha maila, umyoia kimomo ka muhe ekulhae maila?" Nau ekavaba, "Ka muhe ni mroto wa Kiumbi" 18 Vagiru va Vayahudi tevedarishe ite ka muhe eegae maila, naho waijiji eakho, kwato vekamse abaghe ne alhii kuu. 19 Vekavalhasu abaghe ne alhii kuu, "Ho, ya ni muinyi kaghu, muba ite eakhoke eegae maila? Iji emurue kimomo kuakho?" 20 Abaghe ne alhii kuu vekaba, "Tureila ite ya ni muinyi kanu naho eeakhoike egae maila. 21 Mira tetuilie emurue kimomo kuakho, neri kuila niji emlhae maila. Mlhasuni kwaite ni muhe mzime, enemubaiya." 22 Abaghe ne lage kini veeyoe to kwaite veekuvabughenu vagiru va Vayahudi, kwaite ka vagiru veisekoe ite muhe eneba ite Yesu ni Masia enegugulutiwe hodi vesahea Vayahudi. 23 Niu chiro abaghe ne lage kini vekaba, "Mlhasuni u ni muhe mzime." 24 Vekamse kakanu ka muhe elhaiwe maila, vekamba, "Muo Kiumbi ugiru! Nne tureila ite ya muhe ekuutie elo makusa." 25 Ekavaba "Kai elo makusa ani siilie, kigi niilie ani ni kiwe bi, seekumuru kuakho mira waijiji niraakho." 26 Vekamlhasu, "Ekuboie kiahoni? Ekulhae kimomo maila kechi?" 27 Ka muhe ekavaba, "Naafi kumubaia, mira kune temudumu kunilahonha, kwahoni mudumu kukoia kahali? Tuba mudumu mukhwa vahina kuu?" 28 Mira vekamuolhu vekamba, "Ari umhina kuu mira nne tuvahina vakwe Musa. 29 Kigi tuilie ni ite Kiumbi eeyoe ne Musa. Mira tetuilie ya muhe elie nale" 30 Hu muhe ekavaba, "Ya ni mburi ya kububulusha! Kune temuilie elie nale, mira aanilha maila gho! 31 Tureila ite Kiumbi tevalakhonha vahe velo makusa, mira evalahonha vakhabuna vemlakhonha na kuboi mburi kuu edumu. 32 Kuli idi liboiwe teirakoika muhe emlhae maila muhe eakhoike na maila esiakho. 33 Kai ya muhe telie he Kiumbi, teseemuru kuboi neri kigi." 34 Vekamba, "Ari uahoike na kulherutiwe he makusa, umuru kimomo kugali kutuhinya nne?" Niho vekamguguluti ali gahana.

35 Yesu ekakoia ite vamguguluti ali gahana. Aremheia ekamlhasu "Uramdarisha Muinyi wa Muhe?" 36 Ka muhe ekaba, "Mgiru, nibaiya, ka niji, kalo nimdarishe." 37 Yesu ekamba, "Waafiriti kumuakho niu ya eyo na ari waijiji." 38 Ka muhe ekaba, "Dilao! niradarisha, ekama mamuro ekadudukhu na ekamuaresi." 39 Yesu ekaba , "Ani nilitie he idi kugu zamaro, kalo vesiakho vaakho, nahu veakho vaga maila." 40 Mafarisayo vakuwe veeaha sina nau vekakoia cho eekuyo, vekamba, "Ho, na nne tugae maila?" 41 Yesu ekavaba, "Kai mweegae maila, nangai temulo makusa, mira kune muba ite turaakho, kwato chiaija ite temukaiwe makusa kaghu ni kiumbi."