1 Niho Yesu areafiriti kuvabaya vahina kuu ikado na vanu, ekahali ata, ekaso kuhinya na kubirikira he miang'a ya Galilaya. 2 Yohana Mzabatija eeoroiwe heigereza, ekako mburi jakwe Yesu jo eekuboi, niho Yohana ekavasugha vahina kuu hakwe Yesu. 3 Vakamlhasu Yesu ite, "Ho, ari nihu Yesu eneralita, hile tumlaa mhali?" 4 Yesu ekavaba, "Kiriini muremba Yohana mburi jomko nakujiakho. 5 Velo maila esiakho veakho, vesimuru kudaha vedaha, na velo lukoma veutiwa, velo malama esiko veko, vegae vekaawe kuli hekuga na vahuye vebaiwa Mburi kulho. 6 Kiumbi Enemboiya makulho kira muhe esinilhi ani kwa mburi jo niboi."

7 Ka madamo vahina vakwe Yohana Mzabatija vareakhwa vehali, Yesu ekalholhoshi kuvabaia maifyo ya vahe mburi jakwe Yohana Mzabatija, ekavalhasu ite, "Mweesoe kurawesia kiakhoni twai roro? Ho, mwedumue kuakho mkhatu ukushwa ni saa?" 8 Kai sicho, mweesoe kurawesia kiakhoni? Mhe eoroe gomae kulho? Vahe veoro gomae kulho vezokho he minda ja madilao 9 Iji, mweesoe kurawesia akhoni? Ho, musoe kuramuakho mroto wa Kiumbi? Eee, niu chitoe Yohana niu mgiru kutakho mroto. 10 Ya niu eyowe hemagondo ya Kiumbi ite, "Kiumbi eebae, nnemsugha mzatii mburi gho akukaeye, enekuboia kwalhi kechi."

11 Kweri nimuba, he vainyi vakhabuna va vahe, tenaraalijanya emgiru kutaho Yohana Mzabatija. Mira emgitutusha he udilao wa are ana he Kiumbi, ni mgiru kumtakho Yohana Mzabatija. 12 Kulholhoshi he maaze yakwe Yohana Mzabatija eekubirikira sari maaze ya waijiji, Udilao wa are ana he Kiumbi urasahe na kharo ja velo u, naka velo u vetagali kuudori kwa u. 13 Yohana mzabatija esinalita, miku khabuna na varoto vakhabuna va Kiumbi verotie mburi jinelijanya heya madamo jiyoya Udilao wa Kiumbi. 14 Kwato kai mudarisha uroto kini nikuba ite Yohana niu Eliya hu varoto veebae ite eneralita. 15 Elo malama yeko, nako. 16 Mira, ya ikolwa la waijiji nilitoije na kiakhoni? Litoe sa vainyi vezokhodie kikhoja, vekuse vaaro kini, na kuvaba, 17 "Twaamumaiya mtaragha mira temlhalhahae, twaafaru faru ja vigato mira temzoe." 18 Kwaite Yohana eelitie, ekaro kua naho neri tewahae divai, navo vekaba, "U elo ipepo." 19 Muinyi wa Mhe eelitie, eekua nakuwaha divai, navo vekaba, "Muwesieni ya ni mhayo naho mzaengeli, msaho wa vazadara kodi na velo makusa. Mira iji, viugho vya Kiumbi viraakhoika kukhwa vikulho kutakhoia he miboire kuu."

20 Niho Yesu ekalholhoshi kuvajoghoia vahe va miang'a yo eboie vimako vikumure, kwaite tevekiriie na kuro makusa kini. 21 "Kuriuwa kaghu vahe va Korazini hawe na vahe va Betisaida, kwaite, kai vimako viboike hakaghu nanga vyeeteboika twai Tiro na are Sidoni, vahe kuu veseeoroe gomae jiboiwe na magunia azeto na kukulhomi maora na kuyo na kuro makusa kini." 22 Mira namubao, muaze wa kuzamari, kune muneowa kharo giru kutakho zamaro vezamariiwe vahe va miang'a ya are Tiro na Sidoni. 23 Naho vahe va Kapernaumu, ho mutoti ite Kiumbi unemukuturu sari are ana hakuu? Hai, unedimiriwe sari bamuza, kwaite, kai vimako viboike hake vyeeteboiika twai he muang'a wa Sodoma, ka muang'a weseekhwa ureaha sari wai. 24 Mira nimubaiya ite, muaze wa zamaro kune mneowe kharo giru kutakho Sodoma.

25 Niho Yesu ekaba, "Nikukairi ari Aba, Dilao wa are ana na idi, kwaite waavamatu ya mburi vahe velo viugho nahu vepitue waavaaija ya mburi vahe vesilo viugho nahu vesipitue. 26 Ee, Aba, nicho chikulhamuije." 27 "Aba gho aanio vigi vikhabuna. Tehelo mhe em'ilie Muinyi mira Aba bi, neri mhe em'ilie Aba mira ni Muinyi bi, Mira Muinyi edumu avabaie vahali mburi yakwe Aba, kwato navo venemuru kum'ila." 28 "Litani hagho kune vakhabuna munyamarika na kuyakhiiwa ni mimaru, naho ani ninemufufuija. 29 Boini hu nimuhinya kuboi, lakhonhani mahinyo gho yo nimuhinya, naho muhine kuli hagho, kwaite ani nimkulho neri sikuaija ite ani nimgiru, kwaite nnemulhaari, nakune munekhwa na nhunguru nakufufu. 30 Kwaite sikamuba ite muboi mburi ure, neri sikamuba ite muchii mimaru iyakhi."