1 "Ka madamo Udilao wa ana he Kiumbi unetoijwa sa vaaleta ikado vedorie vijari kini, vekaso kuramdaria muagiru mzadori. 2 Vakoi kini veekwae vivile na vakoi veelo viugho. 3 Hu vivile vakaoi vekadori vijari kini, mira tevedorie malhoma mahali kakera, 4 mira hu velo viugho vekadori vijari vilo malhoma na malhoma mahali he nyhupa. 5 Muagiru mzadori ereahareti kulita, hu vaaleta vakhabuna vekai luireno." 6 Mira hareahe kiama kigiru hekakhwa nagimbe, "Wesiani muagiru mzadori aalita," Lini gahana muremdaria. 7 Niho iji hu vaaleta vakhabuna vekaka, vekakati vijari kini. 8 Mira hu vaaleta vivile vekavaba hu vaaleta velo viugho, "Tukakaieni malhoma kaghu maghere kwaite vijari kanu vitaga." 9 Mira hu velo viugho vekavaba, ya malhoma teyekatuagha nne na kune, keba muso murewe he vave vedidi malhoma. 10 Iji, hu vaaleta vivile vareaso kurawe malhoma mzadori ekahe, nahu vaaleta veelo vijari vilo malhoma vekabuu hawe na mzadori he minda yeekuboiika elha ya kudori, niho luhige lukalhatiwe. 11 Kalufunda, vekalita hu vaaleta vivile, vekase, "Mgiru, mgiru, tulhaiye luhige." 12 Mira ka mgiru ekavaba, "Nimubaia kweri, simuilie kune." 13 Niho Yesu ekaba, "Kualeni, kwaite temuilie muaze hile kela Muinyi wa Mhe enelita."

14 "Kahali Yesu ekaba, Udilao waare ana he Kiumbi utoe sa muhe eso bari ya uda, nau esinaso ekavase vanyamalo kuu na kuvaroa mari kuu kalo vajiumaiye. 15 Ekamuo wabosi magongolo makoi, wakanu ekamo magongolo manu nahu wakakai ekamo igongolo iwe la zahabu, naho eemoe kira muwe kuwesia na umuruisho wa kira mnyamalo, niho u ekabari." 16 Hu eoiwe magongolo makoi ya zahabu ekaso ekaraboia nyamalo ya uchuluji ekasusu magongolo mahali makoi ya zahabu. 17 Hu eoiwe magongolo manu ya zahabu ekasusu magongolo mahali manu ya zahabu. 18 Mira hu eoiwe mhaku wa igongolo iwe ekaso, ekatu ihora he mpulhe, ekamatu ka igongolo ugiru kuu. 19 "Yareatakho madamo makumure hu dilao ekakirii, ekavaso vanyamalo kuu kalo awesie cho vesusue." 20 Mnyamalo eoiwe mhaku wa magongolo makoi ya zahabu ekalita adarae magongolo mahali makoi yesusuike ekamba, "Mgiru, weenioe magongolo makoi ya zahabu, wesia ii helo magongolo makoi yo nisusue." 21 Mgiru kuu ekamba, "Waaboi kikulho, mnyamalo uye kudaraishwa. Waakhwa mkweri he vigi vighere, ninekuo vigi vikumure. Lita ulhamuiwe hawe na mgiru kechi." 22 Mnyamalo eoiwe magongolo manu ya zahabu ekalita, ekagu magongolo manu mahali eyasusue ekaba, "Mgiru, weenioe talanta nu, doria talanta hali nu jo nisusue." 23 Mgiru kuu ekamba, "Kikulho, mnyamalo uye kudaraishwa. Waakhwa mkweri he vigi vighere, ninekuo vigi vikumure. Lita ulhamuiwe hawe ne mgiru kechi." 24 Mira hu eoiwe mhaku wa igongolo iwe la zahabu ekalita, ekaba, "Mgiru, nireila ite ari umuhe mkusa, ari uloja to hodi usilhae, naho ubunguru to usizarishe. 25 Kwato naabughenu nikaso kumatu mhaku kechi he mpulhe. Iji dori mhaku kechi yaawo." 26 Mgiru kuu ekamba, "Ari umnyamalo mkusa naho umvizu usidumu kuboi nyamalo, uilie ite ani nloja ho nisilhae, naho nibunguru to nisizarishe mbeyu. 27 Ni kikulho kai weeterake mhaku gho he vahe vechuluja mihaku, naani nikukirii neseeradori mhaku gho weeukee nahu ususuike kuu." 28 Iji, "Mlani ka mhaku murem'o hu elo magongolo ikado. 29 Kwaite elo kigi eneowa na kususuwe vikumure. Mira esilo kigi, enelawe sari kigitutu elo nacho." 30 Niho ka mgiru eneba, "Ya muhe teye, mbibini are gahana he kidughu, are enezo na kung'e maiki."

31 Muinyi wa Muhe ekunelita sa mgiru hawe na vazasughawe vaare ana he Kiumbi vakhabuna vekukhwa nau, ata enezokhodi he kikire kigiru cha udilao, 32 Vahe va madi makhabuna venekubunguru heu, nau enekakaanya vahe he maifyo manu sa mzemo cho ekakaanya maalu na afa. 33 Sakigi mzemo eyake maalu mlha wa sughano na afa mlha wa hina nirewato ani Muinyi wa Muhe ninevake vahe veekuboi mburi jo Kiumbi edumu mlha wa mharegha gho wa sughano, nahu veboie makusa ninevake mlha wa mharegha gho wa hina. 34 Niho Dilao enevaba hu veaha mlha gho wa sughano, "Litani kune muboiiwe kikulho ni Aba gho, buuni he udilao wo mweekeiwe kuli azeto he kuboiwe kwa idi. 35 Kwaite neelo kela kune mukanio viaghu, neelo kasu kune mukanio mai naho neekhwae mgalho na kune mkanidoria he minda kaghu, 36 madamo hu neealaluje mkanioroija nee mrukao na kune mukanirukuti, neeoroiwe naho kune mukalita kuniwesia." 37 Niho iji ka vahe vakulho venemba "Dilao, niami tweekuakhoe ulo kela na nne tukakuo viaghu, hile weelo kasu na nne tukakuo mai ya kuwaha? 38 Naho niami tweekuakhoe mgalho na nne tukakudoria, hile ualaluje tukakuo gomae? 39 Naho tukuakhoe weekhwae mrukao tukakurukuti hile mzaorowe na nne tukalita kukuwesia?" 40 Mgiru enevaba, "Nimubaya kweri, kigi cho mweemboiie muwe heya vabakhu gho vagitutu, mweeniboiie ani." 41 Niho mgiru enevaba hu veaha mlha wa hina kuu, "Hakani ii kune mubusuiwe lupae, soni he mwalha usiga maaze khabuna wo eekeiwe shetani na vazasughawe kuu. 42 Kwaite neelo kela na kune temunioe viaghu, neelo kasu kune temnioe mai ya kuwaha. 43 Nee mgalho kune temunidoriie he minda kaghu naho neealaluje temunioe gomae, nee mrukhao mira temnirukutie naho nee mzaorowa temulitie kuniwesia." 44 Ata niho venemba, "Mgiru niami tweekuakhoe weelo kela hile kasu, wee mgalho hile ualaluje hile umrukao hile mzaorowe na nne tetukulhaarie?" 45 Naka mgiru enevaba, "Kweri namubao, sacho mulhie kumlhaari muwe waya vabakhu gho, mweelhiye kunilhaari ani. 46 Kwato, yavo venebuu he kharo ja maaze makhabuna, mira hu vakulho venebuu he uzime wa maaze khabuna."