1 "Musivazamari vahali, kalo na kune museezamariwa ni Kiumbi, 2 kwaite cho munevazari vahali, nire wato Kiumbi enemuzamari, nacho munevaaghatia vahali nire wato muneaghatiwa ni Kiumbi." 3 Kwaakhoni uwesia kabasi keaha he iila la mbakhu kechi naho tuakho ibare liaha he iila kechi? 4 Hile umuru kimomo kumbaya mbakhu kechi, "Hakiro nikukaa kabasi keaha he iila kechi naho ari salaghe ulo ibare he iila kechi? 5 Ari muhe mkusa ukuakho mkulho, rongakaa ibare liaha he iila kechi niho unemuru kuakho kikulho kabasi keaha he iila la mbakhu kechi." 6 "Musiyao madie viaghu vikulho kalo yasiremukiriiya na kumuhiri, neri musijibibie gua vigi kaghu vikulho kwaite jinevidaha naho jinemukiriia nakumuhiri."

7 "Lhawani, naho muneowe, daaijani naho muneakho, bani mwuii, na kune munelhaiwa luhige. 8 Kwaite, elhawa etaowe nahu edaa eneakho, nahu eba muii enelhaiwa luhige." 9 Niji he kune enemuo muinyi kuu isaheru kai muinyi kuu ekumlhawa mkate? Hile enemo bome ekumlhawa samaki? 10 Hile muinyi kuu ekumlhawa samaki enem'o bome? 11 Kai kune bi vakusa mureile kuvao vainyi kaghu vigi vikulho. Kweri aba kaghu eaha are ana tekavao vigi vikulhosha huvo vemlhawa? 12 "Vaboiyeni vahe vahali sa hucho mudumu muboiiwe, kwaite ya nicho idumu hu miku yakwe Kiumbi emuoe Musa na mahinyo ya varoto va Kiumbi."

13 "Buuni kwa kutakhoya he luhige luchacho. Kwaite luhige luso bamuza ni lumpana na kwalhi iso bamuza ni mhana naka veitakho ka kwalhi ni vakumure. 14 Mira luhige ni luchacho na kwalhi iso he uzime ni chacho, navo veiakho ka kwalhi nivaghere."

15 "Khwani maila na varoto valame, vo velita naho ukuvawesia kwa gahana vetoe sa maalu, mira are za ni madie makusa ya maeza. 16 Munevaila bi kwa miboire kini." Ho, vahe vedaa zabibu he mikhatu ya milhae, hile he mhuti? 17 Wato oto, mkhatu mkulho usa matunda makulho, na mkhatu mkusa usa matunda makusa. 18 Mkhatu mkulho teumuru kusa matunda makusa, na mkhatu mkusa teumuru kusa matunda makulho. 19 Naho kira mkhatu usisa matunda makulho unetewe na kubibiwe he mwalha. 20 Kwato munevaile varoto va lame kwa hucho veboi.

21 "Si kira muhe enise, ‘Dilao, Dilao,’ niu enebuu he Udilao waare ana, mira nihu bi eboi hucho Abagho edumu. 22 Muaze wa zamaro ukuhe, vakumure venenise, Dilao, Dilao tetugue uroto na mapepo na kuboi vimako vikumure kwa ilhe kechi?" 23 Niho ninemuba ite, "Simuilie kune hakani ii nisimuakho kune muvahe vakusa."

24 Kwato, kira muhe eko viome gho na kuvidarisha, etoiane na muhe elo viugho, ekwae minda kuu ana he ighamba kalo minda isirelhu. 25 Mare ikasi, miharaza ikahu, nkunkunho giru ivumira ikalita naho ikaima hu minda. Mira teilhue kwaite yeekwawe ana he ighamba. 26 "Mira muhe eko viome gho naho teviboiya nyamalo, etoyane sa muhe esilo akiri ekwae minda kuu ana he msangalagala. 27 Mare ikasi naho miharaza ikahu, nkunkunho giru ikalita naho ikaima ka minda, naka minda ikalhu kwa msindo mgiru."

28 Yesu areafiriti kuyo ka viome, vahe vakumure vekamashwa ni mahinyo kuu. 29 Kwaite ehinyie sa muhe elo umuruisho neri tehinyie sahu vahinya kini va miku yakwe Musa.