1 Maaze sita yareatakho, Yesu ekavadori Petro ne Yakobo ne Yohana mjunawa wakwe Yakobo esewa, ekavatii sari ana he lubwa lugiru salaghini. 2 Are Yesu ekakirii vubasa hevo, vubasa kuu vukaaku sa kaaze na gomae kuu jikakhwa jiakhu sari kuhiri maila. 3 Wato oto vekalijanya Musa ne Eliya, vekakhwa veyo ne Yesu. 4 Niho Petro ekamba Yesu, "Dilao, kai unedumu nne tuzokho ii, ninekwa vuminda vukai, Kawe kakechi, kawe kakwe Musa na kawe kakwe Eliya." 5 Petro arekhwa echeri yo, wato oto malhareno yeaku swe yekavaghubika, naho kiome chikakoika kuli heka malhareno chikuba, "Ya ni Muinyi gho nimdumue. Nilhamuishwa niu. Mlakhonhini." 6 Vahina vareako to vekalhu kwa kubodiya maso kini ilai vebughenu. 7 Yesu ekavasusughuia sina, ekavadoa ekavaba, "Umani, musibughenu." 8 Vareakaa maila ana vekamuakho Yesu eaha salaghe bi. 9 Niho vareakhwa vedimi kuli he lubwa, Yesu ekavaaji ekaba, "Museerambaiya neri muhe ya mburi jo muakhoe ii sari Muinyi wa Mhe ekuneka kuli he kigame." 10 Niho vahina kuu vekamlhasu ite, "Kwaakhoni vahinya va miku yakwe Musa veba chidumuwa Eliya arongelita ini?" 11 Yesu ekavaba, "Ni kweri, Eliya enelita kuke mburi khabuna kikulho. 12 Mira nimubao, Eliya aalita pere navo teveemuilie, mira vekamboiya kikusa hucho vedumue. Wato oto venemboiia kikusa Muinyi wa Muhe." 13 Niho vahina vekaila ite eekuyo navo kwa mburi yakwe Yohana mzabatija.

14 Vareakirii hehu ifyo la vahe, muhe muwe ekamliaha Yesu, ekammaya mamuro, 15 ekaba, "Dilao, mkoie mbalamija muinyi gho kwaite elhu kifafa naho enyamarikisha, kagi kakumure elhuu he mwalha nahe mai madamo makumure. 16 Neemgerie he vahina kechi mira tevemurue kumuuti." 17 Yesu ekavaba, "Kune ikolwa lisidarisha naho lilahae, ninezokho nakune sari ami? Ninemugumirija kune sari ami? Mgerani ii ka muinyi." 18 Niho Yesu ekaliba ka ipepo lili nalo likamli ka mburatu, madamo wakaaka hu muinyi ekau. 19 Niho vahina vekamliaha Yesu vekukhwa salaghe, vekamlhasu, "Ni kwaakhoni nne tetumurue kuligu hu ipepo?" 20 Yesu ekavaba, "Kwa mburi ya kudarisha kaghu kugitutu. Nimubaiya kweri, kai kudarisha kaghu ni kugitutu bi sa mbeyu isewa haradali, munemuru kuluba lubwa, ‘Haka ii uso to,’ Nalwo luneso. Tehelo neri linekwasi hakaghu. 21 Ipepo saya telimuru kuli sari kwa kuaresi na kulhati kua kigi."

22 Vahina kuu vareakhwa veaha hawe are Galilaya, Yesu ekavaba, Muinyi wa Muhe enelhiwe na kuotiwe he vahe. 23 Navo venemgaa, mira muaze wa ka kakai eneka kuli he kigame. Vahina kuu vekadarawe vuhuyesha.

24 Yesu na vahina kuu vareahe Kapernaumu vahe vedoria kodi ya minda ya Kiumbi vekamliaha Petro na kumlhasu, "Ho mhinya kaghu eralhanu kodi ya Minda ya Kiumbi?" 25 Petro ekavaba, "Ee eralhanu." Petro areabuu za he minda, Yesu ekakhwa wa bosi kuliyoiya, ekamlhasu, "Simoni ari uakho kimomo? Vadilao va idi vedoria ushuru hile kodi kuli he heji? Kuli he vahe kini hile kuli he vagalho?" 26 Petro ekamba, kuli he vagalho vebuu he idi. Yesu ekamba, kwato vahe kini tevedumuwa kulhanu kodi. 27 Mira kalo tusivasanuije, so he iziwa uzebibi ndoana. Idori samaki ya bosi uneivula. Lha muo kuu naari uneakho mihaku, dori urelhanu kodi gho hawe na kechi.