1 Mafarisayo na Masadukayo vekamliaha Yesu vekamgali kalo vamdarati vekamba avaaije lhaa kuli ana he Kiumbi. 2 Mira Yesu ekavaba, "Ikunehe chamagheri, kune mutaba ite, ‘Lhenu henelhe kikulho kwaite are ana he Kiumbi yaabayu,’ 3 Nakune he kela ja chalhenu muba, ‘Wai henesi mare, kwaite are ana ilhareno libayu naho are ana malhareno yehue.’ Mureiliisha kurota yenelijanya kwa kuwesia bi are ana he Kiumbi, mira kuwesia lhaa ja madamo temumuru. 4 Ikolwa ikusa lisidarisha, lidumu lhaa, mira telikaowe lhaa hali kutakho hu yakwe Yona bi." Kwato, ekavaro, ekaso.

5 Vahina kuu vareahe bwa wa kanu wa iziwa, vekakhwa vaazi kudori mikate. 6 Yesu ekavaba, "Muwesiishe naho mukhwa maila na hamira la Mafarisayo na Masadukayo." 7 Mira iji vekakhwa veyo salaghini vekuba "Eyo to kwaite tetudorie mikate." 8 Yesu eeilie cho vetoti, ekavaba, "Kune vahe mudarisha hagitutu! Niakhoni muyo mburi ja kusaakhwa na mikate? 9 Kwato temunaile? Ho, temuhulha nireaikhakhaanya hu mikate mikoi kwa mburi yahu vahe erufu koi? Ho, mweebungurue viteju vime vya mikate imerisie? 10 Hile hu mikate saba vekakaiwe hu vahe erufu hai, ho, mweebungurue viteju vime vya mikate vimerisie? 11 Chikhwae kimomo temuile ite seekuyo mburi ja mikate? Mukhwa maila na hamira ya Mafarisayo na Masadukayo." 12 Niho vahina vekaile ite teekuyoia mburi ya hamira la mikate, mira eekuyoia mahinyo ya Mafarisayo na Masadukayo.

13 Yesu areahe he idi la Kaisaria Filipi, ekavalhasu vahina kuu, "Vahe veba Muinyi wa muhe niji?" 14 Vekamba, "Vahali veba ite ni Yohana Mzabatija, vahali veba ni Eliya, vahali veba ni Yeremia hile muwe wa varoto va Kiumbi. 15 Yesu ekavalhasu, ho, na kune muba ani niji?" 16 Simoni Petro ekamba, "Niari Kiristo, Muinyi wa Kiumbi ezokho." 17 Yesu ekaba, "Lhamuiwa ari Simoni Muinyi wakwe Yona, Kwaite tehelo muhe neri ekughubulie ya mburi mira ni Aba gho eaha are ana. 18 Naani nakuba, ari ni Petro, naho ana heya ighamba ninelikwa ikanisa gho, naho u ja kidughu tejikamuru kulilhuku. 19 Ninekuo funguo ja Udilao waare ana he Kiumbi hucho unechilhatiya he idi, chinelhatiiwa are ana he Kiumbi, naho cho unelhaiya he idi, chinelhaiwa are ana he Kiumbi." 20 Naho Yesu ekavalhiija vahina kuu vasimbaiye muhe neri ite niu Kiristo.

21 Kuli ka madamo Yesu eekuravabaiya vahina kuu ite chidumuwa aso Yerusalemu, naho are eneowe kharo kumure ni velo ugiru na vagiru va muaresi na vahinya va miku yakwe Musa naho chinemdumu agaawe mira muaze wa kakai enekaawe kuli he kigame. 22 Niho Petro ekamse Yesu khakhera, ekalholhoshi kumjoghoya ite, "Dilao usiyo to, ya mburi teimuru kuliijanya" 23 Mira Yesu ekamwesia Petro , ekamba , "Haka he maila gho, Shetani. Ari u lugo he ani. Swaho kechi teitoti mburi ja Kiumbi mira utoti sa vahe." 24 Niho Yesu ekavaba vahina kuu, "Muhe ekudumu kuniliaha, chidumuwe aro mburi kuu khabuna kahali adori msaraba kuu naho aniliahe. 25 Kwaite muhe edumu kuuti uzime kuu salaghe, eneulahati, mira muhe elahati uzime kuu kwa mburi gho, eneyaakho. 26 Ho, muhe eneakho kitumulilo mina ekuowe udilao mkhabuna wa idi naho ekukhwa aalahati uzime kuu? Hile, muhe enegu kigi mina chiagha sa uzime kuu? 27 Kwaite Muinyi wa Muhe enelita he umuruisho wakwe Aba kuu hawe na vazasughawa kuu, naho ata niho enemlhanu kira muhe kuaghati na miboire kuu. 28 Namubayani kweri, helo vahe vahali wai ii tevekaga vesinamuakho Muinyi wa Muhe ekulita he udilao kuu."