1 Heka muaze, Yesu ekahali hehu minda, ekaso ekazokhodi khakhera he iziwa. 2 Vahe vakumure vekabunguru heu sari ekakutu he mashua, ekazokhodi, na vahe vakhabuna vekazokhodi khakhera he iziwa, 3 Niho Yesu ekavabaiya mburi kumure kwa mitotire ekuba, "Mzabibi mbeyu eesoe kurabibi mbeyu he mbuva kuu. 4 Ka madamo ekubibi mbeyu, hali jikalhu khakhera he kwalhi, mahimeno yekalita yekajia. 5 Hali jikalhu he masaheru hesilo mpulhe mkumure. Jikamangali kwaite mpulhe nee mghere. 6 Kaaze kareali, mbeyu jikanyuluka na kuhala kwaite majindo kuu teyeesoe di. 7 Mbeyu hali jikalhu he mhuti ja milhae, naka mhuti jikalheeru na kujifinha ka mbeyu. 8 Hali jikalhu helo mpulhe mkulho, jikali, jikasa, hali jikasa mhuluzi igana na hali jikasa mikado sita na hali jikasa mikado mikai." 9 Niho Yesu ekavaba, "Elo malama yeko nako."

10 Niho vahina vekaso he Yesu, vekamlhasu, "Kwaakhoni uyo na vahe kwa mitotiano?" 11 Yesu ekavaba, "Kune mwaaboiwe muile hu vimatuwe he Udilao waare ana he Kiumbi, mira vahali teveoiwe ka umuruisho wa kuile." 12 Kwaite muhe elo kigi eneowe na kususuwe, mira hu esilo kigi, sari hucho elo nacho enechilawe. 13 Nicho chiro niyo navo kwa mitotiano, kwaite vewesia yo niboi mira teveyaakho, veko kayo niyo mira teveyaile. 14 Ya yeboike hakini kalo vifuru viome vyakwe Isaya mroto wa Kiumbi vibae ite,

Kweri munelakhonha mira temkaile, naho

Munewesia mira temkaakho.

15 Kwaite swaho kini ni ure,

Naho kwa malama kini teveko, naho

Vaalhati maila kini.

Mira kai sicho, veseeakho na maila kini,

Veseeko na malama kini,

Veseeile na swaho kini na

Kuyo nakuro makusa kini, naani neseevautie.

16 "Mira iji lhamuiwani, kwaite maila kaghu yeakho na malama kaghu yeko. 17 Kweri nimubao, varoto va Kiumbi na vahe vakumure vakulho veedumue kuwesia yo muyaakho mira teveyaakhoe na kuko huyo muyako mira teveyakoie.

18 " Iji, lakhonhani naho muko chitotie na mzabibi mbeyu. 19 Mhe eko ya mburi ya Udilao wa Kiumbi mira teile, ni sahu mbeyu jilhue he kwalhi nahu Mkusa etalita na kuchidori hucho chilhawe he swaho kuu . 20 Nahu mbeyu ilhue helo ighamba, nisa muhe ekoe mburi ya Udilao wa Kiumbi ekaudoria kwa kulhamuiwa. 21 Mira kwaite telo majindo yeso di, etadarisha mburi ya Kiumbi kwa madamo maghere, manyamarisho yekumheya hile kharo kwa mburi ya Kiumbi, etamanga gawe ni swaho. 22 Nahu mbeyu ilhue he mhuti nahe milhae, itotijwa na mhe ekoe ka mburi ya Kiumbi mira bughu jaya mifufure he idi na uzuri vitahinka ka mburi, nau etakwasiwe kuboi huyo Kiumbi edumu. 23 Nahu mbeyu ilhue he mpulhe mkulho itotijwa na mhe ekoe ka mburi ya Kiumbi na kuile nau enesa matunda, muwe igana, mhali mikado sita na mhali mikado mikai."

24 Yesu ekavao mtotiano mhali ekuba, "Udilao wa are ana he Kiumbi utotie na mhe ebibie mbeyu kulho he mbuva kuu. 25 Mira kiama kiwe vahe veeie, mnkuru kuu ekalita, ekabibi mahako za he ngano naho ekahaka. 26 Kwato, mbeyu jireali na kulholhoshi kuasi na mahako yekalholhoshi kuakhoika." 27 Vanyamalo vahu mzalo mbuva vekamliaha niho vekamlhasu, "Mgiru, tetweelhaye mbeyu kulho heya mbuva kechi? Iji mahako yelinale?" 28 Ekavaba, mnkuru niu eboie to. Niho vanyamalo kuu vekamlhasu, "Ho, udumu tuso tureyang'ofula?" 29 Nau ekavaba, "Hai, musing'ofule, kwaite to mkuyagu mahako mumuru mung'ofule hawe na ngano. 30 Roni bi ngano na mahako vilheru hawe sari he madamo ya ulojo. Ka madamo ninevabaiya vazaloja vayagu mahako vayake khakhera ini, vayaoro he mafumbe kalo yalhahawe. Mira ngano ibunguruni mureike hakukeya ngano."

31 Yesu ekavabaiya vahe mtotiano mhali ekuba, "Udilao waare ana he Kiumbi utotie sa mbeyu isewa haradali yeedoriwe ni muhe muwe, ekarailha he mbuva kuu. 32 Neri ite ni gitutu kutakho mbeyu khabuna, mira yaraali itakhwa mkhatu mgiru kutakho mikhatu mikhabuna ya hembuva. Ilheru kukhwa mkhatu, na mahimeno yaare ana yetalita na kukwa mashasha kini he matambi kuu."

33 Yesu ekavabaiya mtotiano mhali, "Udilao waare ana he Kiumbi utoiane na hamira idoriwe ni mlage muwe, ekavikwarianya za he madebe makai ya mdufu mkhabuna ukayakhi."

34 Yesu eyoe navo mburi khabuna kwa mitotiano. Teyoe neri kigi esigue mtotiano. 35 Kalo mburi iyoiwe ni mroto wa Kiumbi ilijanye iba,

"Nineyo navo kwa mitotiano,

Ninehinya mburi jo vesijiilie kuli azeto cho idi lireaboiwe."

36 Niho Yesu ekavasange vahe, ekabuu minda. Vahina kuu vekamliaha, vekamba, "Tubaiye maana yahu mtotiano wa mahako yeeaha hembuva." 37 Yesu ekavaba, "Elhae hu mbeyu kulho ni Muinyi wa Mhe. 38 Hu mbuva ni idi, nahu mbeyu kulho ni vahe va Udilao. Mira hu mahako nihu vahe vahu mnkuru. 39 Hu mkusa elhae mahako ni Shetani. Ulojo ni mkhito wa idi na vezaloja ni vazasughawe vaare ana he Kiumbi. 40 Sahucho mahako yebunguruwe hawe na kulhahawe, nicho chinekhwa he muaze wa mkhito" 41 Muinyi wa Muhe enevasugha vazasughawa vaare ana he Kiumbi vavagera kuli he udilao kuu hu ugera vahe vakhabuna velahati vahe na vakhabuna veboi makusa, 42 naho vazasughawa venevabibi he itanuri igiru la mwalha lisiga maaze makhabuna, naho are venezo na kung'e maiki. 43 Naho hu vahe veboie yo edumu Kiumbi veneaku sa kaaze he Udilao wakwe Aba kini. Elo malama yeko nako.

44 "Udilao waare ana he Kiumbi utotiane na uzuri umatuiwe he mbuva. Mhe muwe ekauakho, ekaumatu kahali. Ekalhamuishishwa niho ekaso kuradi vigi kuu vikhabuna eelo navyo ekaraiwe hu mbuva."

45 "Naho Udilao waare ana he Kiumbi utotiane na mzuri muwe edaa lulu kulho. 46 Areaakho lulu we ilo uzuri mgiru, ekaso ekaradi vigi vikhabuna vyo eelo naho ekaiwe hu lulu."

47 "Kahali, Udilao waare ana he Kiumbi utoyane na lwavu lubibiwe he bahari, ukadara samaki ja kira mbari. 48 Lwavu lurehu, vahe vekauhuru kakera hesilo mai, vekazokhodi vekadori samaki kulho vekajibutu za heviteju kini, nahu kusa vekajibibi." 49 Nicho chineraakhwa he maaze ya mkhito. Vazasughawa va Kiumbi, venelita, venevakakaanya vahe vakusa na vakulho. 50 Navo venevabibi ka vazaboi makusa he itanuru lilo mwalha usiga maaze makhabuna, are venezo na kung'e maiki.

51 Niho Yesu ekavalhasu, "Ho, mwaaile ya mburi khabuna?" Vekamba, "Eee." 52 Nau ekavaba, "Kwato iji kira mhinya wa miku ehinyijwe mahinyo ya Udilao waare ana he Kiumbi nisa mzalo minda egue vigi kuu vikulho vikuale navya azeto."

53 Yesu areafiriti kuyo ka mitotiano ekahaka ata hodi, 54 ekaso ang'a hakini. Are ekakhwa evahinya vahe he minda jo vesahea Vayahudi sari vekamaka, vekaba, "Ya egunale ya viugho na ugiru wa kuboi vimako? 55 Ho, ya sihu muinyi wakwe mzape? Ho, alhii kuu tesewa Maria, na vabakhu kuu siya Yakobo ne Josefu ne Simoni ne Yuda? 56 Naho vaing'inhii kuu vakhabuna veaha ii hawe na nne. Iji, egunale ya makhabuna?" 57 Niho iji vekalhi kumdarisha. Mira Yesu ekavaba, "Mroto vemko hodi hakhabuna mira tekowe he muang'a kuu nahe vahe va ang'a kini." 58 Kwato iji, tereboi vimako vikumure kwa mburi kini ya kusaadarisha.