1 Heka madamo, Herode mgiru wa idi la Galilaya ekako mburi jakwe Yesu. 2 Iji ekavabaya vanyamalo kuu, "Ya muhe ni Yohana Mzabatija, aaka kuli hekigame, niu chiro umuruisho wa kuboi vimako jiaha za kuu." 3 Kwaite Herode esughae vaaku kuu ite Yohana adarawe na kubutuwe he igereza, kwa mburi yakwe Herodia, mlage wakwe Filipo mbakhu kuu. 4 Kwaite Yohana eekumbaya Herode ite, "Techiye he Kiumbi ari kumdori mlage wa mbakhu kechi esinaga." 5 Herode eedumue kumgaa Yohana, mira ekavabughenu vahe kwaite veemilie ite Yohana ni mroto wa Kiumbi. 6 He muaze wa elha ya kuhulha kuakhoika kwakwe Herode, mualeta wakwe Herodia ekara kikulho he vagalho. Herode ekalhamuishwa, 7 niho ekake muo ekamba "Nilapa ite ninekuo kira kigi cho unelhawa." 8 Ka mualeta ilai eotirijwe ni alhii kuu, ekamba Herode ite, "Nio mua wakwe Yohana Mzabatija waijiji he isinia." 9 Mgiru Herode ekabuuwe ni vuhuye, mira kwa mburi yahu muo kuu naho kwa mburi ya vagalho veaha he elha, ekaba aowe. 10 Kwato Herode ekasugha muhe he minda ya kulhatia vahe arempaa Yohana mua. 11 Mua kuu ukagerawe he kihanka, vekamuo hu mualeta, nau ekamtiiya alhii kuu. 12 Vahina vakwe Yohana mzabatija vekalita, vekaudori msa kuu, vekauke he mbira. Naho vekaso kuzambaiya Yesu.

13 Yesu areako mburi ya kigame chakwe Yohana, ekahaka na mashua, ekaso hodi hesilo vahe ekazokho salaghe. Mira vahe vekako ka mburi, vekamliaha kwa masame kuli he miang'a kini. 14 Yesu areahe kakera he idi lisilo mai ekali he mashua, ekaakho vahe vakumure, ekavakoiya mbalamija, ekavauti varukao kini. 15 Hareakhwa chamagheri, vahina kuu vekamliaha vekamba, "Hodi ii ni roro bi, na kela ja chakako jaataho. Iji, uvasange vahe vaso he miang'a vazewe viaghu." 16 Yesu ekavaba, "Techimuruika ya vahe vaso bi vesiae, kune vaoni viaghu." 17 Mira vo vekamba, "Tulo mikate mikoi bi na samaki nu." 18 Yesu ekavaba, "Vigerani ii." 19 Ekavaba vahe vazokhodi he mahako. Niho Yesu ekadori hu mikate mikoi nahu samaki nu, ekawesia ana, ekamuaresi Kiumbi. Naho ekaibendula hu mikate, ekavao vahina kuu, navo vekavao vahe. 20 Vahe vakhabuna vekaa, vekakhu. Naho vahina vekabunguru vimerisie, vekahuti viteju ikado na vinu. 21 Vakhabuna veae veekurahe vaagiru arufu koi ukaa valage na vainyi.

22 Niho Yesu ekavaba vahina kuu vakutu he mashua, vamkaeye kuso chauju ya iziwa to eracheri vasange vahe. 23 Areafiriti kuvasange vahe, ekakutu he lubwa salaghe kuaresi. Yesu eereaha salaghe bi sari chamagheri. 24 Hehu madamo mashua yeesoe uda kuli idi lisilo mai, mira ikaheiwa ni nkunkunho giru ya mai ikaihinkahinka. 25 Kiamaama, Yesu ekavaliaha vahina ekudaha ana he mai. 26 Vahina kuu vareamuakho ekudaha ana he mai vekabughenusha, vekaba, "Ni mbamuza," vekama lukalasu kwa bughu. 27 Niho Yesu ekayo navo, "Taani, niani, musibughenu." 28 Petro ekamba, "Dilao, kai niari kweri, niba nidaha ana he mai nikuliahe." 29 Yesu ekamba, "Haya, lita." Niho, Petro ekadimi kuli hehu mashua, ekadaha ana he mai, ekamliaha Yesu. 30 Mira areaakho kunkunho ya mai, ekabughenu, ekalholhoshi kufili he mai, ekazo kwa kuse, "Dilao, nilhaari nisifili." 31 Niho iji Yesu ekakuuru mharegha kuu, ekamdara ekamba, "Ari udarisha hagitutu, nikiakhoni ukabughenu?" 32 Niho vekakutu he mashua, na kunkunho ikataa. 33 Vakhabuna veaha za he mashua vekammaiya mamuro na kumdudukuiya, vekuba, "Kweri ari u Muinyi wa Kiumbi."

34 Vekatakho he iziwa vekahe he idi la Genesareti. 35 Vahe vahu muang'a vareamuile ite niu, vekabaiyana miang'a mikhabuna iaha sina. Niho vekamgeria Yesu varukao vakhabuna. 36 Vekamgogo ite avaro vadoe bi he gomae kuu. Naho vakhabuna veemdoie vekautiwe.