1 Yesu na vahina kuu vareahe sina na Yerusalemu na kuhe Besefage he vijiji viaha sina na lubwa lwa Mizeituni, ekavasugha vahina kuu vanu, 2 ekavaba, "Soni he kijiji chiaha kara kaghu muneheiya mpunda iorowe hawe na muinyi kuu ata. Jigeni munigerie." 3 Kai muhe ekunemulhasu, mumba, "Dilao ejidumu," Nau enejikiriti madamo si makumure. 4 Ya mburi jeeboike kalo hu vyeeyowe ni mroto wa Kiumbi vilijanye, 5 vabaiyeni vahe va Yerusalemu ite, "Wesia, Dilao kaghu etalita, mnyulu wa swaho ekutue he muinyi wa mhunda." 6 Hu vahina vekaso vekaboi sakigi Yesu evasughae. 7 Vekazaigera hu mhunda hawe na muinyi kuu, vekanagha gomae ana hehu mhunda Yesu ekazokhodi ana heka mhunda. 8 Vahe vakumure vekanagha gomae kini he kwalhi, naho vahe vahali vekapu matambi magitutu ya mikhatu vekayanagha he kwalhi. 9 Vahe vakumure vemkaeye nahu veekumliha vekama gimbe vekaba, " Muinyi wakwe Daudi ekairiwe, nagimbikwe kaye elita kwa ilhe lakwe Dilao, eye kukairiwa ni Kiumbi are ana." 10 Yesu areakhwa ebuu Yerusalemu, vahe vakhabuna vaka muang'a vekamaka. Vekabubulhuka vekalhasu, "Ho niji ya?" 11 Vahe hehu ifyo vekaba, "Ya ni Yesu, hu mroto wa Kiumbi kuli Nazareti idi la Galilaya."

12 Yesu areabuu he minda ya Kiumbi, ekavaheia vahe veekuchuluja hawe vigi gahana he minda ya Kiumbi, ekajilhuku hu meza jahu veekukoranya mihaku, na vigi vyahu vahe veekudidi sua. 13 Ekavaba, "Hegondiwe he magondo ya Kiumbi ite, ‘Minda gho inesewe minda ya miaresi.’ Mira kune mwaiboi kukhwa mhanga ya vagwalo." 14 Vesiakho na vilemuna vahali vekamliaha Yesu are heminda ya Kiumbi, nau ekavauti. 15 Mira vagiru va muaresi na vahinya va miku yakwe Musa vareakho ka vimako vyo Yesu eboie, naho na vainyi cho veekubirikira he minda ya Kiumbi vekuba, "Nhogolo he Muinyi wakwe dilao Daudi," Vekasanuiwa, 16 Kwato vekamlhasu ite, "Ho, urako cho ya vainyi veyo?" Yesu ekavaba, "Ee nirako, Ho temuzemuru kusoma ya magondo yeba,

"Kuli he mio ya vainyi vagitutu, nahu vainyi vegosiwe venekukairi,

Waakudaia kitumulilo."

17 Niho iji, ekavaro, ekali gahana he muang'a ekaso Betania, ekai are.

18 Lhenu kuu chalhenu Yesu areakhwa eaha kwalhi ekirii he muang'a, ekako kela. 19 Ekauakho mkhatu usewa mtini khakhera he kwalhi, mira ekauheya teulo matunda ulo mahako bi. Iji, ekauba, "Useezasa kahali matunda maaze khabuna." Waata ata ka mtini ukanyuluka. 20 Vahina kuu vareakho to vekamaka vekamlhasu ite, "Kwaakhoni ya mkhatu wa mtini waamanganyuluka?" 21 Yesu ekavaba, "Kweri nimubao, kai mukukhwa na mdarisho ufurue, temukaboi bi yacho niboie heya mkhatu usewa mtini, mira sari mukuneluba ya lubwa ite ‘Kung'ofule uzekubibi he bahari,’ Chineboiika wato. 22 Naho mkudarisha, cho munelhawa kwa kuaresi, mneowe."

23 Yesu areabuu he minda ya Kiumbi, ekakhwa ehinya. Ilai ehinya, vagiru va muaresi, na madilao vekamlhasu, "Ya mburi ujiboi kwa umuruisho mina? Niji ekuoe ka umuruisho?" 24 Yesu ekavaba, "Naani ninemulhasu mburi we, mkunibaya, niho naani ninemubaya niboi ya mburi kwa umuruisho wakweji. 25 Ho, umuruisho wakwe Yohana wa kubatija weeliye hakweji? Ho, weelie ana he Kiumbi hile he vahe?" Mira vekayotijanya vo kwa vo vekaba, "Twaraaba, ‘Ulie ana he Kiumbi,’ enetulhasu, ‘Iji, niakhoni temudarishe?’ 26 Naho tukuba, ‘Ulie he vahe,’ Tubugheno ifyo la vahe kwaite vakhabuna veilie ite Yohana ni mroto wa Kiumbi." 27 Niho, vekamba, "Nne tetuilie." Yesu nau ekavaba, "Naani sikamubae niboi ya mburi kwa umuruisho mina."

28 Yesu ekayo kahali ekavaba "Kune muakho kimomo, muhe muwe eelo vaburatu vanu, ekamsugha hu wabosi ekamba, ‘Muinyi gho, wai uso uzeboi nyamalo he mbuva ya mizabibu.’" 29 Hu muinyi ekamba, "Aba ani sikaso" Mira kalufunda ekakheriti mitotire kuu, ekaso kuzaboi ka nyamalo. 30 Niho ka aba ekamsugha muinyi kuu wa kanu sacho emsughae hu wabosi, naka esughawe kakanu ekamba, "Ee aba nineso. Mira tezeso. 31 Ho, ni mhama heya vanu eboie hucho aba edumue?" Vekamba, "Nihu muinyi wabosi." Niho Yesu ekavaba, "Kweri nimubaiya vazadara kodi navadana venemukaeiya kubuu he Udilao wa Kiumbi" 32 "Kwaite Yohana mzabatija eelitie hakaghu ekamuhinya mifufuire mikulho, kune temumdarishe, mira vedara kodi na vadana vekamdarisha. Hawe na kuakho ka vikhabuna kune temuyoe nakuro makusa kaghu kalo mumdarishe."

33 Niho Yesu ekaba, "Lakhonhani mtotiano mhali. Muhe muwe elo mbuva eekuruye mbuva ya mizabibu, ekaikwauiya lugo, ekatu ihora lakuboiiya divai, naho ekakwa kiringo. Niho ekaikodisha ka mbuva he vakurume, ekaso bari ya uda. 34 Madamo ya kuloja yareahe, ekavasugha vanyamalo kuu hehu vakurume, kalo vazedori matunda kuu." 35 Mira hu vakurume vekavadara ka vanyamalo muwe vekamma, mhali vekamgaa na mhali vekamma masaheru. 36 Ka mzalombuva ekavasugha vanyamalo vahali, vakumure kutakho hu vabosi. Hu vakurume vekavaboiya mburi sawahuhu. 37 Niho iji mzalo mbuva ekazamsugha muinyi kuu ilai ekutoti ite "Ya ni muinyi gho venemko." 38 Mira hu vakurume vareamuakho muinyi kuu vekayotijana, "Ya niu mzapala, iji tumgaa kalo tudori vyo enepala" 39 Kwato, vekamdara, vekamgu gahana hehu mbuva ya mizabibu, vekamgaa. 40 "Iji, ka mzalo mbuva ya mizabibu ekuralita, enevasamo ka vakurume?" 41 Niho vekamba, "Enevagaa kikusa ka vakurume vakusa, nahu mbuva enevao vakurume vahali venemlhanu mihaku kuu he madamo yeye." 42 Ata Yesu ekavaba, "He, temusomie ya mburi he magondo ya Kiumbi? ‘Isaheru veelilhie vazakwa, waijiji laakhwa isaheru igiru la khakhera. Dilao niu eboiye mburi yayo, naho iji ni kimako kigiru hakanu.’ 43 Kwato namubao, Udilao wa Kiumbi unekaawe hakaghu na kuowe vahe vahali veboi kikulho." 44 Naho enelhu heka isaheru enepuikapuika, mira hu enelhuiwa nika isaheru, linemtighinha pere. 45 Vagiru vakuaresija na Mafarisayo vareako mitoyanire kuu vekaile ite evayo vo. 46 Kwato vekakhwa vedaa kwalhi ya kumdara, mira vekakhwa vebugheno vahe kwaite vo veemuilie Yesu ite ni mroto wa Kiumbi.