1 Lhenu kuu ama ama, vagiru va kuaresija vakhabuna na vaagiru vazime, vekaiseko hawe mburi ya kumgaa Yesu. 2 Vekamuoro mhingu, vekamtii vekumuoti he Pilato, hu ee Dilao wa Kirumi.

3 Iji Yuda huye eemlhie Yesu areakho ite Yesu aazamiriwe pere, ekahiri swaho niho ekavakiritia hu magongolo mikado mikai vya zahabu vyo eowe ni vagiru vakuaresija na vagiru va Vayahudi. 4 Yuda ekaba, "Naaboi makusa, kwaite naikherii sako isionie kigi." Vekamba, "Kalo litulanga kiahoni nne? Uneile salaghe." 5 Kwato Yuda ekavibibi hu magongolo ya mihaku ya zahabu za he Minda ekahaka ekaso ekakurengesha. 6 Hu vagiru va muaresi vekadori hu mihaku vekaba, "Si kikulho kukwarianya ya mihaku na vivulu kwaite ya mihaku ilo sako." 7 Kwato vareafiriti kuiseko, vekaakho vawe mbuva he muhe eboi kore, ikhwa hodi ha mbira ja kukea vagalho vekuga. 8 Ya nicho chiroe hu mbuva ikasewe Mbuva ya Sako sari wai. 9 Niho vikafuru hu viome vyeegondiwe ni Yeremia mroto wa Kiumbi viba ite, "Veedorie hu vikhao mikado mikai vya mihaku, sacho Vaizraeli veeisekoe kumlhanu ka mzalo mbuva, 10 vekawea mbuva he muhe eboi kore, sacho Dilao Kiumbi eajie."

11 To Yesu eeumae he Pilato eemgiru wa mkoa eekeiwe ni Varumi. Ka mgiru wa mkoa ekamlhasu, "Ho ari niu Ngurumo wa Vayahudi?" Yesu ekaba, "Niari uba to." 12 Mira vagiru va kuaresija na vagiru va Vayahudi vareamyoija, teandue. 13 Niho Pilato ekamlhasu, "Ho, tuko ya maoghe makhabuna vekuyoijija?" 14 Mira Yesu teandue neri ioghe iwe, niho dilao ekamakisha.

15 He muaze wa elha ya Pasaka mgiru wa Kirumi eekuramlhamera mzaorowe muwe enelhojwa ni ifyo la vahe. 16 Heka madamo heelo mzaorowe eilikishe he vahe kwa makusa kuu, esewe Baraba. 17 Kwato Pilato ekavalhasu hu ifyo la vahe leekubungurue ite, "Mudumu nimulhamereie ji, Baraba hile Yesu hu esewe Kiristo?" 18 Kwaite eereile ite Yesu eetiiwe hakuu kwa mburi ya luiju. 19 To Pilato eezokhodie he kikire cha kuzamaria, mlage kuu ekamsughaya mburi iba, "Usimboi kigi neri kiwe ka muhe esionie kigi, kwaite wai naanyamarika kweri he makhala kwa mburi yaka muhe." 20 Mira vagiru va kuaresija na vagiru va Vayahudi vekusukuruia hu ifyo la vahe ite vagogo amlhamere baraba bi mira Yesu agaawe. 21 Mgiru wa Kirumi ekavalhasu kahali, "Ni mhama heya vanu mudumu nimulhamere?" Vekamba "Baraba." 22 Pilato ekavalhaasu, "Kwato mudumu nimsamo ya Yesu esewe Kiristo?" Vakhabuna vekayoisha. "Mma misumari he msaraba!" 23 Pilato ekavalhaasu, "Kwa kiakhoni? Eonie kiakhoni?" Mira vo vekamaisha gimbe, "Mma misumari he msaraba." 24 Pilato areakho ite temuru kuboi kigi, naho aku jeekutalholhoshi, ekadori mai ekaonhi miharegha kuu sina na hehu ifyo la vahe, ekaba, "Silo maoghe he sako yaya muhe, kwato ya ni mburi kaghu!" 25 Vahe vakhabuna vekaba, "Kigame kuu chikhwa ana kanu naho ana ya vainyi kanu!" 26 Kwato Pilato ekavalhamereia Baraba kuli he igereza, naho areafiriti ekaba Yesu amawe ndate naho ekamgu kalo amawe misumari he msaraba.

27 Wato oto vakilaaru vakwe Pilato vekamtii Yesu sari ang'a he mgiru wa Kirumi naho vekabunguru ifyo la vakilaaru vakhabuna vekamjunguluka Yesu. 28 Vekamgu gomae kuu nakumuoro gomae ibayu, 29 naho vekahi ankara ya milhae vekam'oro he m'a kuu. Vekamkeiya ndate he muharegha kuu wa sughano kalo akhwa se Ngurumo, vekama mamuro heu na kumfwa vekuba, "Tukuholu Ngurumo wa Vayahudi!" 30 Vekambusuiya mapae naho vekadori hu ndate ya mwanzi vekammaisha he m'a. 31 Vareafiriti kumfwa, vekamgu hu gomae, vekamuoro kahali gomae kuu. Naho vekamtii kalo varemma misumari he msaraba.

32 Ka madamo vekuso, vekasahe na muhe muwe esewe Simoni kuli muang'a usewa Kirene, navo vekamkungumija atii hu msaraba Yesu. 33 Vekahe hodi hesewe Goligota, nisakuba ite ni Hodi he Ifwara la m'a, 34 niho hu vaaku vekamuo Yesu divai ikwarijanywe na kigi chinyera kalo awaha, mira areaigali, ekalhi kuwaha. 35 Vareafiriti kumma misumari he msaraba vekakaana gomae kuu kwakuma simbi, kalo chifuru hu kiome cheeyoiwe ni mroto wa Kiumbi ite, "Veekakaane gomae gho naho gomae gho vekaimaia simbi" 36 Niho vekazokhodi vekakhwa vemlaaija. 37 Ana he mua kuu, to he msaraba, vekagonda maoghe kuu, yeba "YAYE NIU YESU NGURUMO WA VAYAHUDI." 38 Yesu emaiwe misumari sina na vagwalo vanu kira muwe he msaraba kuu, muwe mlha wa sughano kuu na mhali wa hina kuu. 39 Vahe veekutakho he kwalhi vekakhwa vebibi viome vya kuolhu ilai vekukusha mia kini 40 vekuba, "Ari weebae unepu Minda ya Kiumbi na kuikwa kwa maaze makai, kukaa salaghe iji he kharo. Kai kweri ari u Muinyi wa Kiumbi, iji dimi kuli he msaraba." 41 Wato oto, velo ugiru va kuaresija na vahinya va miku yakwe Musa na vagiru va Vayahudi vekamfwa vekumba, 42 "Eevakae vahali he kharo, mira temuru kukukaa he kharo salaghe! Uye ni Dilao wa Israeli. Nadimi iji kuli he msaraba, nanne tunemdarisha. 43 Eramdarisha Kiumbi, iji Kiumbi namdimiri he msaraba kai emdumu, kwaite eebae, ‘Ani ni Muinyi wa Kiumbi.’ " 44 Nahu vagwalo veemaiwe misumari he misaraba hawe nau vekam'olhu sato oto.

45 Kwato kuli kela sita chakhakho sari kela kenda chamagheti kidughu cheelighubike idi izime. 46 Ireahe kela kenda Yesu ekakaa lukalasu ekuzo ekuba, "Eloi, Eloi lama Sabakitani?" Nisa kuba ite, "Kiumbi gho, Kiumbi gho, kwaakhoni waaniro?" 47 Vahe vakuwe veeumae to vareako ekuyo to, vekaba "Etamse Eliya." 48 Wato oto muwe kini ekagugulu kuradori kikhao cha gomae, naho ekachiginha he kikonho chilo siki ekachike he ndate kulhe ekam'o awaha. 49 Vahali vekaba, "Mroni tuakho ite kai Eliya enelita kumlhaari." 50 Yesu areazo kahali kwa kiome kigiru, ekapaa swaho kuu ekaga. 51 Madamo waka aka ipazia la he Minda ya Kiumbi likakhaaika vikhao vinu, kulholhoshi ana sari di. Idi izime likakushika na maghamba yekapuu. 52 Mbira jikalhaika naho misa ya vahe vanyakhare veegae vekaka kuli he kigame. 53 Vekali he mbira na to Yesu areaka kuli he kigame vekabuu he Muang'a Mnyakhare usewe Yerusalemu na kuvalijanyia vahe vakumure. 54 Kwato hu mgiru wa vakilaaru nahu veaha hawe nau vekumlaaiija Yesu, vareakho hucho idi likushike nahu vikhabuna viliijanye, vekabughenu vekuba, "Kweri ya Yesu nee Muinyi wa Kiumbi!" 55 Ata hodi heelo valage veekuwesia kwa uda. Vo vemliahie Yesu kuli Galilaya naho veekumlhaari hucho eekudumu. 56 Heka valage eeaha Maria kuli Magidala ne Maria lage kini Yakobo ne Josefu ne mlage wakwe Zebedayo.

57 Hareahe chamagheri, ekalita muhe muwe mzuri kuli Arimatea esewe Josefu, nau nee mhina wakwe Yesu. 58 Ekaso he Pilato, kumlhawa adori msa wakwe Yesu. Pilato ekaba adumuijwe. 59 Josefu ekadori msa wakwe Yesu, ekauoro sanda, 60 naho ekarauke za he mbira kuu kua ya mhanga yo eiboie salaghe. Naho ekadongolosha isaheru igiru he luhige lwa mbira ekuka ekaso. 61 Maria kuli Magidala nahu Maria mhali veaha to hodi, veezokhodie kuwesiana nahu mbira.

62 Lhenu kuu he muaze wa kanu wa kuke kikulho mburi ja muaze wa kufufu, velo ugiru wa kuaresija na Mafarisayo vekamliaha Pilato, 63 vekamba, "Dilao, twaahulha ite hu mlame to esinaga eeyoe ite, ‘He muaze wakakai, nineka kuli he kigame.’ 64 Kwato usugha vakilaaru kalo vailaaije ka mbira sari muaze waakakai. Kai sito, vahina kuu vemuru valita vagwa msa kuu naho vavabae vahe ite aaka kuli he kigame. Ya lame inekhwa kusa kutakho hu yabosi." 65 Pilato ekavaba, "Kune mulo vakilaaru. Soni, mureikeiya ukilaaru ka mbira kacho munemuru." 66 Kwato vekaso na vakilaaru kalo varelaiija hu mbira kikulho, vekake ibalo hehu isaheru kalo mhe ekunelidongolosha vamuru kuile.