1 Yesu ekakutu he mashua, ekatakho iziwa nakukirii kuhe he muang'a kini usewa Kaperenaumu. 2 Niho vahe vekamgeria muhe muwe eholoje msa, ebodijwe he kamhasi. Yesu areakho kudarisha kini, ekamba ka muhe eholoje, "Muinyi gho kuo swaho, waakaaiwa makusa kechi." 3 Niho vahinya wa miku ya Kiumbi eemoe Musa vekalholhoshi kutoti he swaho kini ite, "Ya muhe etamfwa Kiumbi." 4 Yesu areaila cho vetoti he swaho kini, ekaba, "Kwaakhoni mutoti makusa he swaho kaghu? 5 Ni kihama chimangamuruika, kuba, ‘Waakaaiwa makusa kechi,’ Hile kuba, ‘Uma, udaha?’ 6 Kwato iji, nidumu muile ite Muinyi wa Muhe elo ugiru he idi la kukaaya vahe makusa." Niho Yesu ekamba hu muhe eholoje, "Ka, udori mhasi kechi, uso ang'a hakechi." 7 Hu muhe eeholoje ekaka na kuso ang'a hakuu. 8 Vahe vakhabuna hehu ifyo vareakho kayo, vekamaka na kubugheno, vekamkairi Kiumbi evaoye vahe ugiru saka.

9 Yesu ereakhwa eso, ekamuakho mhe muwe mzadara kodi esewa Matayo, eezokhodie hodi hakudoria kodi. Niho Yesu ekamba, "Niliaha." Niho Matayo ekaka, ekamliaha. 10 Ata Yesu eaha minda, ezokhodie kua viaghu, vazadara kodi vakumure na velo makusa vekalita kua viaghu hawe nau na vahina kuu. 11 Mafarisayo vareakho to, vekavaba vahina kuu, "Kwaakhoni mhinya kaghu ea hawe na vazadara kodi na velo makusa?" 12 Yesu ekavako, ekavaba, "Vahe vazime tevedumu mkura, vemdaa mkura nihu varukhao. 13 Kwato mrehina mburi jaya viome, ‘Nidumu mbalamija, neri si vivulu.’ Kwaite silitie kuvase vahe vakulho, mira nilitie kuvase velo makusa."

14 Niho vahina vakwe Yohana Mzabatija vekaso hakwe Yesu, vekamlhasu, "Kwaakhoni nne na Mafarisayo tulhati kua, mira vahina kechi tevelhati kua kigi?" 15 Yesu ekavaba, "Verarikwe he elha tevedumuwe kulhati kua to mzadori eaha hawe navo? Hai, neri, mira madamo yenehe mzadori enekaawe hakini, ka madamo niho venezalhati kua kigi." 16 "Vahe tevehi kilaka cha gomae kuale hegomae ialalue. Kwaite ka kilaka kikuale chineiboi ka gomae ialalue isaishe kukhaika, na to heekhaaike henekhwa hagirusha. 17 Neri vahe tevebutu divai kuale he mfuko wa bulhe ialalue. Kai vekuboi to, vishau vya bulhe vinekhaaika na divai inesuika, naka mfuko wa bulhe uneonika. Mira vahe vebutu divai kuale he vishau vya bulhe vikuale, vishau vya bulhe na divai, vikhabuna vinu vitakhwa kikulho."

18 Ka madamo Yesu areakhwa echeri yo, wato oto mgiru muwe Myahudi ekalita, ekamgogo Yesu kwa kumaya mamuro ekamba, "Mualeta gho aaga waijiji to. Mira nikugogo tuso uremkeia miheregha kechi nau akhwa mzime." 19 Yesu hawe na vahina kuu vekamliha hu mgiru. 20 Mlage muwe, mrukhao wa kuliwe ni sako he madamo ya miko ikado na minu, ekamliaha Yesu kwa mzungure, ekadoa gomae kuu. 21 Ka mlage eekutotie he swaho kuu ite, "Nikunedoa bi gomae kuu, nineu." 22 Niho, Yesu ekawesia aremuakho, ekamba, "Mualeta, kuo swaho, kudarisha kechi kwakuuti." Ka mlage ekau madamo waka aka. 23 Yesu ekabuu he minda yahu mgiru wa Kiyahudi. Areaakho vazama firimbi na ifyo la vahe vezo, 24 Yesu ekavaba, "Halini ii! Ya mualeta tegae, etebodi bi." Navo vekamsisi kwa kumfwa. 25 Niho ifyo la vahe lireakaawe, Yesu ekabuu hehu minda ekamdara mharegha ka mualeta, nau ekaka. 26 Ka mburi ikaparaa hehu idi ikhabuna.

27 Yesu ereakhwa eli ata, vahe vanu velo maila esiakho vekamliaha ilai vema nkalasu, "Muinyi wakwe Daudi, tukoe mbalamija!" 28 Yesu areabuu he minda, ka vahe vanu vesiakho kwa maila vekamliaha nau ekavalhaasu, "Ho, mudarisha ite nimuru kumuboi muakho?" Navo vekamba, "Ee, mgiru." 29 Niho Yesu ekayadoa maila kini, ekaba, "Nachikhwa to hakaghu sacho mudarisha." 30 Waata ata maila kini yekalhaika. Yesu ekavalhiija kwa kuvajoghoiya, "Museerambaya neri muhe ya mburi." 31 Mira vo vekaso na kuraparati mburi jakwe Yesu hodi hakhabuna.

32 Heka madamo vahe vekuhali, vahali vekamgeria Yesu muhe muwe esimuru kuyo kwaite eedaraiwe ni ipepo. 33 Mira hu ipepo lireaguwe ka muhe eesimuru kuyo ekalholhoshi kuyo. Hu ifyo la vahe likamaka nakuba "Mburi saya teinaraalijanya he idi la Izraeli." 34 Mira Mafarisayo vekaba, "Ya egu ipepo kwa lumuruisho lwa mgiru wa ipepo."

35 Yesu edahae he miang'a mikhabuna nahe vijiji, ekuhinya hodi hakusaheiya Vayahudi kini ilai ekubirikira Mburi Kulho ja Udilao wa Kiumbi na kuuti marukhao makhabuna yeaha he vahe. 36 Iji, areaakho vahe vakumure, ekavakoiya mbalamija kwaite vekua kharo neri kulhaariwe. Vetoe sa maalu yesilo mzemo. 37 Niho ekavaba vahina kuu, "Ulojo ni mkumure mira vanyamalo ni vaghere. 38 Kwato mlhawani elo ka ulojo kalo asugha vanyamalo he mbuva kuu ya ulojo."