1 Heka maaze Yesu erecheri aha he idi la Nazareti, muhe muwe esewa Yohana mzabatija eelitie ekubirikira he roro ya Yudea, ekuvaba, 2 "Roni makusa kaghu mumkiriiye Kiumbi kwaite Udilao waare ana he Kiumbi waahe sina." 3 Ya Yohana niu hu eyoiwe ni Isaya mroto wa Kiumbi areaba,

"Kiome kigiru cha muhe chise are roro chikuba

‘Mboieni Dilao kwalhi kuu,

Ikuuruni balabala.’ "

4 Yohana eeoroe gomae iboiiwe na mafoya ya kimagheri chisewa ngamia, naho eoroe lumulhu lwa bulhe hasi ya msa. Naho viaghu kuu nee mahalala na naa ja maeza. 5 Niho vahe kuli Yerusalemu na kuli bwa khabuna ja Yudea na hodi hakhabuna hawe na miang'a iaha sina na muharaza wa Yoridani, vekamliaha. 6 Vekayo makusa kini he Kiumbi na kuyaro, nau ekavabatija he muharaza wa Yoridani, 7 Mira Yohana areavaakho Mafarisayo na Masadukayo vemliaha kalo avabatije, ekavaba, "Kune ikolwa la bome niji emung'ee ilama ite muyagugulu malhaha ya Kiumbi yenelita? 8 Kwato aijani kwa kuboi ite mwaayo na kuyaro makusa kaghu makhabuna. 9 Neri musitoti he swaho kaghu ite mumuru kubaiyana ite, nne tulo aba kanu Ibrahamu. Kweri nimubaya ite Kiumbi emuru kum'boiya Ibrahamu vainyi kuli heya masaheru. 10 Naho waijiji ihoya la zamaro laakewa he majindo ya mkhatu, kwato kira mkhatu usisa matunda makulho unetewe na kubibiwe he mwalha. 11 Ani nimubatija na mai kuaija ite mwaayo na kuyaro makusa kaghu mukamkiriiya Kiumbi. Mira helo elitie elo Ugiru kunitakho ani, naho ani siye neri kuge mulhu ja makwadoe kuu. U enemubatija kwa Saa wa Kiumbi na mwalha. 12 Naho lungo lwa kuhetia ngano luaha he miharegha kuu, nau enelhalhami minda hodi ngano ihetiiwa, naho enebunguru ngano he minda na kulhaha makanka he mwalha usiga."

13 Ka madamo Yesu ekali Galilaya ekahe he mharaza wa Yoridani, ekamliaha Yohana kalo abatijwe. 14 Mira Yohana ekagali kulhi ekumba, " Ho, naari unilitia? Ani niu nidumuwe nibatijwe niari." 15 Mira Yesu ekamba, "Dumu bi chikhwa to waijiji, kwaite nicho chiye tuyaboi hu makhabuna yo Kiumbi eyadumu." Ata Yohana ekadumu ekambatija. 16 Yesu areafiriti bi kubatijwa na kuli he mai, wato oto are ana he Kiumbi hekalhaika, ekaakho Saa wa Kiumbi ekudimi sa sula na kuuma ana he Yesu. 17 Niho kiome kuli ana he Kiumbi chikakoika chikuba, "Ya niu muinyi gho nimdumue, naagijwa niu."