1 Ka madamo, Yesu eekutatakho he mbuva ja ngano muaze wa Kufufu. Niho, vahina kuu vekako kela, vekalholhoshi kupu vireri vya ngano, vekaa mpuluzi. 2 Mafarisayo vareaakho to, vekamba Yesu, "Wesia, vahina kechi veboi mburi isidumuwa he miku ya Muaze wa kufufu." 3 Yesu ekavalhasu, "Ho, temsomie cho eboie Daudi hawe na vaaro kuu to veelo kela? 4 Daudi eebuuye he minda ya Kiumbi ekaa mikate yeeguwe kwa mburi ya minda ya Kiumbi. U hawe na vaaro kuu teveekudumujwa kua ka mikate mira vahe veekudumuijwa kua ka mikate ni vakirurumo vahe Minda ya Kiumbi bi. 5 Hile kune temuwesie chigondiwe he miku yakwe Musa ite muaze wa Kufufu vakirurumo veoni miku ya Muaze wa kufufu he Minda ya Kiumbi mira Kiumbi tevaakhoe ite veboie kikusa.?" 6 Kwato, nimubaiya ite ka emgiru kutakho minda ya Kiumbi ereaha ii. 7 Kai mweilie chiyoiwe heya Magondo ya Kiumbi ite, "Nidumuisha mbalamija neri sidumu kivulu," Temweseevazamari vahe vesilo makusa. 8 Kwaite Muinyi wa Mhe niu elo ugiru wa Muaze wa kufufu.

9 Yesu ekahali ata, ekaso he minda yakusaheiya Vayahudi, 10 Are heelo muhe muwe elo mheregha uholoje. Niho, vahe vekamlhasu Yesu, "Ho, chiraye kumuusi muhe Muaze wa kufufu?" Veemlhasue to kalo vaakho mburi ya kumbutu he maoghe. 11 Mira Yesu ekavaba, "Tuba ite muwe kaghu elo ialu kuu libuuye he ihora, ho temkalidare na kuligu ata Muaze wa kufufu? 12 Mira iji, muhe uzuri mkulho kutakho ialu. Kwato, chidumuwe kuboi makulho muaze wa kufufu." 13 Niho Yesu ekamba hu muhe, "Kuuru muharegha kechi ulhawa." Ka muhe ekaukuuru mharegha kuu, nawo ukakhwa mzime sahu mhali. 14 Mira Mafarisayo vekali gahana, vekaiseko cho venemgaa Yesu.

15 Mira Yesu areaila ka mburi, ekahali to hodi. Vahe vakumure vekamliaha, ekavauti varukhao vakhabuna, 16 ekavalhiija vasivabaye vahe ite u niji, 17 kalo yalijanye huyo Kiumbi kutakhoia Isaya hu eemroto ite, 18 "Wesia mzasughawa gho, ka nimlhoje, naho nimdumue enilhamuija he swaho."

"Nneke saa gho hakuu,

Nau enevabaia vahe va madi makhabuna ite

Nnevazamari sakigi chidumuwe.

19 Tekakwe neri tekama gimbe,

Neri tehelo eneko kiome kuu he kwalhi.

20 Tekavahiri vahe vahuye, enekhwa mkulho hevahe velo u,

Sari ekuneboi ukweri wa Kiumbi uilike.

21 Vahe va madi makhabuna venemuarira u ite enevakaa."

22 Niho vahe vekamgera muhe muwe hakwe Yesu esimuru kuwesia hile kuyo kwaite ebuuiwe ni ipepo. Yesu ekamuuti niho ekamuru kuyo na kuwesia. 23 Vahe vakhabuna vekamaka ilai vekulhasu ite, "Ho, chimuru chikakwa ite ya niu Muinyi wakwe Daudi?" 24 Mira Mafarisayo vareako to, vekaba, "Ya muhe eyagu mapepo kwa umuruisho wa Belizebuli, mgiru wa mapepo." 25 Yesu eereile cho veekutoti, kwato ekavaba, "Kira udilao ukukhakhaana wangau he maifyo ifyo emayana salaghe, teumuru kuzokho, naho ang'a hile mbari ikakhakhaana maifyo, inelhu. 26 Kai Shetani emgu Shetani, etakukweti salaghe. Ho, udilao kuu uneuma kimomo? 27 Kune mwaaba ite niyagu mapepo kwa umuruisho wakwe Belizebuli, ho, ka vemuliaha veyagu kwa umuruisho wakwe ji? Kwaka mburi nivo venemuzamari kune. 28 Mira kwaite niyagu mapepo kwa umuruisho wa Saa wa Kiumbi, iji muile ite Udilao wa Kiumbi waamuheya hakaghu." 29 "Hile, muhe emuru kimomo kubuu he minda ya muhe elo u na kumla vigi kuu, neri esimoroe ini ka muhe elo u kumure? Ata niho enemuru kumla vigi kuu." 30 "Muhe esikhwari hawe naani, ka ni mnkuru gho na esibunguru hawe naani etazarisha." 31 Kwato namubao, kira eyo kikusa nahu enem'olhu Muinyi wa Muhe enekaaiwa, mira mhe enem'olhu Saa wa Kiumbi tekakaaiwe. 32 Naho mhe eneyo kiome cha kum'olhu Muinyi wa Mhe enekaaiwa, mira eneyo kiome cha kumolhu Saa wa Kiumbi tekakaaiwe, neri heya idi, hile he idi lilitie.

33 "Mkhatu mkulho niu unesa matunda makulho, naho mkhatu mkusa, unesa matunda makusa. Kwaite mkhatu uneilika kwa matunda kuu." 34 Kune ikolwa la bome, mumuru kimomo kuyo mburi kulho naho kune muvakusa? Kwaite mhe eyo vigi viaha he swaho kuu. 35 Muhe mkulho eyo mburi kulho kuli hmitotire kuu mikulho, naho muhe mkusa eyo mburi kusa kuli he mitotire kuu mikusa. 36 "Kwato namubao, muaze wakuzamariwa kira muwe eneyo salaghe mburi khabuna kusa hujo eejiyoe. 37 Kwaite kwa viome kechi unedumuijwa kukhwa mhe mkulho naho kwa viome kechi unezamariwa kukhwa mhe mkusa."

38 Niho vahinya va miku yakwe Musa na Mafarisayo vakuwe vekamba Yesu, "Mhinya, tudumu kuakho vimako kuli heari." 39 Nau ekavaba, "Ikolwa ikusa lisidaraishwa mudumu lhaa, mira temkaowe lhaa mira hubi hu lhaa yakwe Yona mroto wa Kiumbi. 40 Sa hucho Yona ezokhoe maaze makai chakhakho na naama za he maso ya samaki, nirewato nahe Muinyi wa Muhe enezokho za he mpulhe maaze makai chakhakho na naama. 41 Vahe va Ninawi veneuma hawe na vahe vaya ikolwa muaze wazamaro, navo venelizamaria ka ikolwa ite lilo makusa. Kwaite Vaninawi veekirie nakuyaro makusa kini vareamko Yona mroto wa Kiumbi ekubirikira, naho kave ii helo mgiru kutakho Yona. 42 He muaze wa kuzamariwa, dilao wa kilage kuli idi la Sheba eneuma nau enemuzamaria ite mulo makusa. Kwaite u eelie mkhito wa idi, kalo kulakhona viome vilo viugho vyakwe Solomoni, naho kave ii helo mgiru kutaho Solomoni.

43 "Ipepo likumli muhe, litakhwa litakho hodi hesilo mai likudaa hodi hakufufu likusehaakho, 44 ata litakuyoia ite, ‘Ninekirii ang'a hagho ho niliye’. Niho iji likukirii na kuihelha heaha lheme, helhalhamiwe na kukewe kikulho, 45 litaso kuzadori mapepo hali saba, makusa kutakho lo, na makhabuna yetalita kumbuu ka muhe. Naho ka muhe enekhwa mkusa kutakho ata azeto. Nicho chinekhwa heya ikolwa la vahe vakusa."

46 Yesu areakhwa echeri yo na ifyo la vahe, ka madamo alhii kuu na vabakhu kuu vekahe na kuuma gahana, vekudumu kuyo nau. 47 Niho, muhe muwe ekamba Yesu, "Lage kechi na vabakhu kechi veaha gana, vedumu kuyo naari." 48 Mira Yesu ekamba ka muhe, "Lage gho niji? Na vabakhu gho ni vaji?" 49 Ekaaija mharegha kuu kuvawesia vahina kuu, ekaba, "Ya nivo lage gho na vabakhu gho. 50 Kwaite kira muhe eboi cho edumu Aba gho eaha are ana, ka niu mbakhu gho wa kiagiru na mbakhu gho wa kilage ne lage gho."