1 Yesu ekahali he lwigo lwa Minda ya Kiumbi kalo aso, areakhwa elihali, vahinya kuu vekamliaha vamuaije minda ja Kiumbi. 2 Niho Yesu ekavaba, "Ee mumuru kujiakho ya minda cho jitoe kulho waijiji. Mira namubao, tehelo neri isaheru iwe ii linefufu ana he isaheru ihali, kwaite kira iwe lineoniwa."

3 Niho Yesu ekakutu sari ana helubwa lwa mizeituni ekazokhodi ata, vahinya kuu vekamliaha hodi hesilo vahe, vekamlhasu, "Tubaiye ni madamo mina ya mburi jineralijanya naho ni lhaa mina inetuaija ite kulita kechi na mkhito wa Idi kwaahe sina?" 4 Yesu ekavaba, "Kuwesiisheni neri muhe asimuta." 5 Kwaite vahe vakumure venelita vekuba ite "Vo niu Kiristo." Navo venevata vahe vakumure. 6 Muneko gimbe jaaku jimaanwa sina, na mburi ja aku jiaha uda, mira musibughenu, kwaite ka yedumuwa yaliijanye. Mira kayo teyeaija ite mkhito waahe. 7 Vahe va idi iwe venemaana na vahe va idi ihali, vahe va udilao muwe unekwekwe na vahe vaudilao mhali. Kira hodi henekhwa na kela na idi kuu. 8 Ka makhabuna yenekhwa nisa kulholhoshi kwa mlage elhaiwa eaha sina kuakho muinyi. 9 "Heka madamo vahe va madi makhabuna venemusanuiya venemudara kalo vamukharotije na kumugaa kune kwa mburi ya kukhwa vahina gho." 10 Kahali, vakumure venero kuniliaha ani, navyo venelhiana na kusanuiyana. 11 Kamadamo venelijanya varoto vakumure va lame venevata vahe vakumure. 12 Kwa mburi ya kususuika kwa makusa, vahe vakumure venero kudumuana. 13 Mira enegumirija sari mkhito Kiumbi enekombo. 14 Mkhito usinahe, Mburi Kulho ya Udilao wa Kiumbi inebirikirwa hevahe va idi ikhabuna kalo vahe va madi makhabuna vako Mburi Kulho kuli he Kiumbi. Niho Kiumbi eneboi mkhito waidi uhe.

15 Ka madamo muneakho kigi chibughenusha chigera kuoni na kusanuija, hu yeeyowe ni Danieli mroto wa Kiumbi, chiaha za he minda ya Kiumbi, kira muhe esoma ya mburi, aile. 16 Kwato hu veaha are Yudea na vaguguluye he malubwa. 17 Nahu eaha ana he minda kuu asidimi kudori vigi viaha are za he minda kuu mira agugulu. 18 Neri eaha he mbuva asikirii mzungure kuradori gomae kuu mira agugulu. 19 Tunevakoia mbalamija valage velo maso na vegosija heka maaze. 20 Muaresini Kiumbi kalo kugugulu kaghu kusirekhwa he maaze ya kiuho hile he Muaze wa kufufu. 21 Kwaite heka madamo vahe venekhwa na kharo giru jisinaralijanyaa kuli ho idi liboiwe sari wai, neri tejikazelijanya kahali. 22 Naho kai ka maaze teyete pungujwa, tehelo neri muhe eseeu mira Kiumbi enepunguja ka maaze kwa mburi ya vahe kuu evalhoije. 23 Kwato heka maaze muhe ekumubaya ite, "Kiristo eaha ii" Hile eaha to, musidumu. 24 Vahe vakuwe venemuba, ani ni Kiristo hile nitesughawe ni Kiristo, na vahe vahali veneba, "Ani ni mroto kuli he Kiumbi" Mira viome kini vinekhwa vya lame. Veneboi vimako vigiru na vigi vikumure vigalho he maila ya vahe vya kumuru kuvata naho chikumuruika venevata na vahe velhoijwe ni Kiumbi. 25 Lakhonhani, naafiriti kumukanya madamo yaka mburi jisinalijanya. 26 Kwato vekumuba, "Wesiani, aeha heilangwa," Musiso arai hile "Wesiani, ekumatue za heminda, musidarishe." 27 Muile ite kulita kwa Muinyi wa Muhe kunekhwa nakawe. Kunekhwa sa luatame lwa lubambala lumangadimi kuli kaaze ho keliia sari ho kefilia. 28 Kwaite kira hodi helo chigae, niho makunguru yenebunguru kua nihena.

29 Yekutakho bi maaze ya kunyamarika, Kiumbi eneboi kaaze kakhwa kidughu na mlhihe teukagu luatame, nhondwe jinelhu kuli ana, na u ja areana he Kiumbi jinehehejwa. 30 Niho henelijanya lhaa ya Muinyi wa Muhe ineakhoika ana, naho vahe vakhabuna va idi venezo, navo venemuakho Muinyi wa Muhe ekulita ana he malhareno ekukhwa na u na ekuuaija ugiru kuu. 31 Nau enevasugha vazasughawe kuu velo igunda lizoisha, naho venevabunguru vahe kuu velhoijwe kuli bwa khabuna hai ja idi, kulholhoshi bwa muwe waare ana he Kiumbi sari mkhito kuu.

32 Yesu ekakhwa echeri yo ekuba, "Muhine kuli he mkhatu wa mtini, to matambi kuu yekulholhoshi kukhwa makenye na kugu makhupi muile ite madamo ya uloji yaahe sina. 33 Watooto nakune mkuneakho ya mburi khabuna jikuboika, muile ite eaha sinasha. 34 Nimubaiya ukweri, ya ikolwa telikatakho, ka mburi khabuna jisinalijanya. 35 Are ana heilhareno henetakho, idi nau linetakho, mira viome gho neri tevikatakho."

36 Mira he mburi ya muaze hile kela Muinyi Kiumbi enelita, kavyo tehelo muhe eviilie ite vinekhwa ami, neri vazasughawe va are ana he Kiumbi neri Muinyi, mira Aba salaghe bi niu eilie. 37 Kwaite sahucho cheekhwae he maaze yakwe Nuhu, nicho chinezakhwa hehu madamo Muinyi wa Muhe ekuralita. 38 Kwaite ka madamo, mare girusha jisinalita nakugera mai kumure, vahe veekua na kuwaha, veekudori na kudoriwa sari Nuhu areabuu za he mashua giru isewa safina. 39 Ka vahe teveeilie kigi chineliijanya sari to mare girusha ireasi, ikavagaa vakhabuna. Nicho chinekhwa he madamo ya Muinyi wa Muhe ekuralita. 40 Heka madamo vahe vanu venekhwa he mbuva, Kiumbi enemdori muwe mhali enemro. 41 Naho valage vanu venekhwa vetu mhure, Kiumbi enemdori na mhali enemro. 42 Kwato, aleni kwaite temuilie muaze hile kela yo enelita Dilao kaghu. 43 Mira muhulha ya mburi, kai mzalo minda eereile muaze wo mgwalo enelita, eseraale, neri teseeroe minda kuu ipuwe. 44 Kwato iji, nakune mukuke kikulho, kwaite Muinyi wa Muhe enelita he kela yo musiilie.

45 Yesu ekavalhasu vahina kuu ekavaba, "Ni mnyamalo mhama mkweri naho elo viugho, mgiru kuu enemke avaumaie vahe kuu heminda kuu kalo akhwa evao viaghu he madamo yedumuwe? 46 Enelhamuiwa ka mnyamalo kwaite madamo mgiru kuu ekunelita enemhea eboi sato." 47 Kweri namubayani, ka mgiru enemke ka mnyamalo aumaiye uzuri mkhabuna waka mgiru . 48 Mira kai ka mnyamalo ni mkusa, nau ekatoti he swaho kuu ite, "Mgiru gho enehareti kulita," 49 Naho ekalholhoshi kuvama vanyamalo vaaro, ekalholhoshi kuaisha na kuwahaisha mala hawe na vazaengeli, 50 mgiru kuu enelita muaze esiuarire nahe kela esiilie, 51 ka mgiru enemkharotija kikusa ka mnyamalo na kumke hodi hawe na vekuboi vakulho kave nivakusa. Hodi henekhwa na manyamarisho makumure helo kizoi na kung'e maiki.