1 Niho, Yesu ekabuu kahali he minda yo vesahe Vayahudi, are heelo mhe elo muharegha uholoje. 2 Ataza vahe vakuwe veaha veekudaa mburi ya kumyoija, kwato vekamuwesia kai enemuuti mhe he Muaze wa kufufu. 3 Yesu ekamba ka mheelo muharegha uholoje, "Lita ii kalo vahe vakhabuna vakuakho." 4 Niho, Yesu ekavalhasu, "Ho miku kanu jidumu tuboi akhoni Muaze wa kufufu? Ho, nikuboi makulho hile kuboi makusa? Ni kuuti hile kugaa?" Mira vo vekataa. 5 Yesu ekavawesia ka vahe kwa malhaha, ekakuko kikusa he swaho kuu kwa kusadarisha kini. Niho, ekamba hu mhe, "Ukhuuru muharegha kechi!" Nau ekaukhuuru muharegha kuu, ukakhwa wau. 6 Waata ata, Mafarisayo vekali gahana, vekasahe na ifyo la vahe vakwe Herode vekadaa kwalhi ya kumgaa Yesu.

7 Yesu hawe na vahina kuu veesoe khakhera he iziwa la Galilaya na ifyo la vahe vekamliaha, ka vahe velie Galilaya, Yudea, 8 kuli Yerusalemu, Idumea, kuli hodi hahali hamlha wa kaaze keliiya wa mharaza Yoridani, he miang'a mikhabuna ijunguluka na Tiro na Sidoni. Ka maifyo makhabuna ya vahe veemliahe Yesu kwaite veekoie mburi khabuna jo ekujiboie. 9 Kwaite heelo vahe vakumure, Yesu ekavaba vahina kuu vamdaaye mashua we, kalo vahe vakumure vasire mfinhafinha. 10 Kwaite eevautie vahe vakumure, varukhao vakumure veekuhinkana kuso he Yesu kalo vamdara vautiwe marukho veekuru. 11 Vahe velo mapepo kira muwe areamuaho, eelhue mbere hei he Yesu ekakaa kiome ekuba, "Ari niu Muinyi wa Kiumbi!"

12 Mira Yesu ekavalhiija ite vasiregali kuvabaya vahe ite u niji.

13 Yesu ekakutu ana he lubwa, ekavase hu vo edumue, navo vekalita heu, 14 ekavalhoija vahe ikhado na vanu hehu vahe evasee, ekavase vazasughawa. Ekavaba, "Nimulhoije kune muzokho na ani, kalo nimuru kumusugha kurabirikiria vahe mburi Kikulho, 15 na kune ninemuo ugiru wa kugu mapepo."

16 Malhe ya vahe ikado na vanu velhoijwe ni Yesu, ne Simoni, ilhe ihali nee Petro, 17 Yakobo ne Yohana, vainyi vakwe Zebedayo Yesu evaoe ya vabahu vanu ilhe la Boanige, ite "Vainyi va Lubambala". 18 Vahali nee, Andrea ne Filipo ne Batolomayo ne Matayo ne Tomasi ne Yakobo muinyi wakwe Alfa ne Tadeo ne Simoni emaana kwa mburi idi kuu, 19 ne Yuda kuli muang'a wa Isikarioti, emlhiye Yesu.

20 Niho Yesu ekaso ho eekufufu. Ifyo igiru la vahe vekaburunguru kahali, sari Yesu na vahina kuu tevemuruye kua viaghu. 21 Vabahu vakwe Yesu vareako to vekaso kuramdori kwaite veekuba, "Etaberi!"

22 Vahinya va miku yakwe Kiumbi emuoe Musa velie Yerusalemu, vekaba, "Elo Belizebuli, mgiru wa mapepo, niu emuo ugiru wa kugu mapepo."

23 Niho Yesu ekavase vahe ekayo navo kwa mitotire ekuba, ho Shetani emuru kimomo kukuguluti salaghe? 24 Ikukhwa vahe va udilao muwe vakakaana naho kumaana wanga u, ka udilao teukafufu. 25 Ikukhwa bakhu ikakaana naho kumaana wanga u, ka ubakhu unega. 26 Kwato ikukhwa, udilao wa Shetani unekakaana wanga u udilao kuu teukafufu na unekhwa niu mkhito kuu.

27 "Tehelo mhe emuru kubuu he minda ya mhe elo u, naho amla mari kuu, ekudumu sari arongemuoro ka mhe, niho enemuru kumla mari kuu."

28 "Kweri nimubaiya, vahe venekaiwa makusa kini khabuna nahu vemuolhu Kiumbi, Kiumbi enevakaiya, 29 mira hekusa mhe emuolhu Saa wa Kiumbi neri tekakaiwe makusa kuu, kwaite Kiumbi tekamukaaiye ka makusa maaze makabuna." 30 Yesu eyoe to kwaite vahe veekuba, "Elo ipepo."

31 Niho lage mkini Yesu na vabahu vakwe Yesu vekahe ata, vekauma gahana, vekasugha mheaso minda aremse Yesu. 32 Ifyo la vahe vezokhodie kwa kumjunguluke Yesu, niho hu vahe vekamba, "Lage mkaghu na vabahu kechi veaha gahana, vekudaa ari."

33 Yesu ekavalhasu, "He lage gho ni ji? He, vabahu gho ni vaji?" 34 Ata ekavawesia ka vahe vemjunguluke, ekaba, "Ya nivo lage gho na vabahu gho. 35 Kira mheeboi mburi jo edumu Kiumbi nivo vainka na vaing'inha ne lage gho."