1 Yesu areakhwa eli he minda ya Kiumbi, muwe wa vahina kuu ekamba, "Mhinya, wesia masaheru magiru na minda choe makulho!"

2 Yesu ekamba, "Uraakho maminda cho e magiru? Tehelo isaheru linerowe ana he isaheru ihali, mira makabuna yenelhukuwa di."

3 Yesu eezokhodie he Lubwa lwa Mizeituni luwesiana na minda ya Kiumbi, Petro ne Yakobo ne Yohana ne Andarea vekamliaha hesilo vahe vekamlhasu. 4 "Tukugogo utubaye, mburi ya jinelianya ami? Ni lhaa mina ineaija ite ya mburi jaahe sina."

5 Yesu ekavaba, khwani maila, hasisa mheemuta. 6 Vahe vakumure, venelita kwa ilhe gho vekuba, ani niu Kiristo! Navo venevata vahe vakumure. 7 Kune mukurako mburi ja aku, msibugheno. Ya mburi jidumuwe jiliijanye, mira hu mkhito unekhwa teunahe. 8 Vahe va idi iwe venekwe na vahe vaidi ihali naho udilao muwe unekwe na udilao wa idi ihali. Henekhwa na kukushika kwa idi hodi hakumure na kubuu kela giru. Ya ni kulholhoshi kulhawa kutoe sa mlage ehee sina kusa muinyi.

9 Mira kune wesiishani. Kwaite venemudara vamuchii Mahakani. Venemuma na ndate ja bulhe are he minda ja kusaheya Vayahudi, munezamariwa he vakaaeti na vadilao kwa mburi gho, kalo muvabaye Mburi Kulho. 10 Naka Mburi Kulho idumuwe irongebirikirwa he madi makhabuna hu mkhito usinahe. 11 Mwaradarawe nakuyoijwa, musikuo kharo ite nikiakhoni muneyo. Madamo ekunehe, Mira yoni bi cho muneyo heka madamo, kwaite sikune muneyo mira ni Saa wa Kiumbi eaha za kaghu. 12 Mbakhu enemkhirii mbakhu kuu kalo aga, ne aba enemkhirii muinyi kuu. Muinyi nau enevalhi aba kini ne lage kini nakuro vagaawe. 13 Vahe vakhabuna venemusanuiya kwa mburi ya ilhe gho. Mira enemuru kugumurija sari mkhito eneokoka.

14 Mukuraakho Kigi chisanuija chiaha hodi hesihakuu naho chiboi vahe vali heminda ya Kiumbi! Niho veaha idi la Yuda vaguguluiye he lubwa esoma naile ya aile ya mburi. 15 Muhe eaha ana he minda asidimi kubuu minda kuzadori kigi. 16 Muhe eaha he mbuva asikirii ang'a kuradori gomae kuu. 17 Ni kharo giru he valage velo maso na valage vegosija vainyi he ka maaze! 18 Aresini ka mburi jisiraa lijanya he madamo ya kiuho! 19 Kwaite madamo ka henekhwa na kharo isiile kuliijanya kuli azeto Kiumbi ereboi ya idi sari waijiji, neri teekalijanye. 20 Kai Dilao teetepunguja ka maaze, tehelo mheesemuru kuokolwa. Mira kwamburi ya velhoijwe kuu, Dilao aapunguja ka maaze.

21 Heka maaze, mheekumuba, Wesia, Kiristo! Eaha ii, hile eaha twai! Musimdarishe. 22 Kwaite veneliijanya vahe vekuse kiristo na varoto va lame. Veneboi lhaa na mahirimo kalo vevatati, na ikumuruika na nahu velhoijwe ni Kiumbi. 23 Kwato wesiishani! Nafiriti mubaiya ka mburi khabuna jisinaliijanya.

24 Mira ka maaze ya kharo ikuratakho, kaaze kenebutuwe kidughu, na mlhihe teukagu luatame, 25 nhondwe nau jinelhu kuli ana, na u jiaha are ana jinekushika. 26 Niho ata vahe vakhabuna venemuakho Muinyi wa Muhe ekudimi he malhareno ekukhwa na u kumure na luatame lwa ugiru wa Kiumbi. 27 Nau enevasugha vanyamalo kuu va are ana he Kiumbi kuvabunguru vahe evalhoje kuli milha mihai ya idi, kuli mkhito wa idi sari mkhito wa are ana he Kiumbi.

28 "Kwato hinani ya kiome kutahoya mkhatu wa mtini. Matambi kuu yekulholhoshi kushuka na kugu mahupi, niho mutaile ite madamo ya buure yaahe sina. 29 Wato oto, mwaraakho ka mburi khabuna jikulijanya, ileni ite Muinyi wa Mhe eaha afeta. 30 Kweri nimubaya ikolwa laka madamo telikakhite sari ya mburi khabuna jilijanye. 31 Ana he Kiumbi na idi vinetakho, mira viome gho techikatakho neri."

32 "Kwa mburi ya muaze hu na kela tehelo neri eilie, neri vanyamalo vaare ana he Kiumbi, neri Muinyi, mira Aba salaghe. 33 Wesiishani naho mkuke kikulho, kwaite temuilie ka madamo enekhwa ami. 34 Kulita gho kunekhwa sa mhe elie ang'a kuu kuso uda ekuvaroya vanyamalo kuu kuiwesia minda, kira muwe ekumuroiya nyamalo kuu. Niho etamuaji mkilaaru wa luhige akuke kikulho kulaija minda. 35 Kwato, kukeni kikulho kwaite temuilie ite niami mzalo minda enekirii, imuruika ikakwa chamagheri hile naama hile kiamaama, nkuruve ikuzo hile chalhenu. 36 Ekunemangalita, asimuheie muie. 37 Huyo nimubaya kune, nivabaya vakhabuna, kukeni kikulho!"