1 Heka maaze, ifyo igiru la vahe vekabunguru kahali. Kwaite ka vahe tevelo kigi cha kua, Yesu ekavase vahina kuu ekavaba, 2 "Nivakoya mbalamija ya ifyo la vahe, kwaite veaha hawe na ani kwa maaze makai, neri tevelo kigi cha kua. 3 Nikuvasange vaso he miang'a kini vesiae, venelhu mshare are kwalhi, kwaite vahe vahali velie udasha."

4 Kwato vahina kuu vekamlhasu, "Mira ii ho tuaha ni roro, tuneakho le mikate vya kuvao ya vahe vakhabuna?"

5 Yesu ekavalhasu, "Mlo mikate mime?"

Vekamba, "Tulo mikate saba."

6 Ekavaba vahe vazokhodi di. Ekadori hu mikate saba ekamgimbika Kiumbi, ekaibendula, ekavao vahina kuu kalo vavakhakhaie vahe navo vekaboi wato. 7 Veerelo vusamaki esi vukumure, Yesu ekamgimbika Kiumbi kwaka vusamaki, ekavao vahina kuu vavakhakhaie ka vahe. 8 Kira mheekaa ekakhu. Niho vahina kuu Vekabunguru hu vimerisie vekahuti viteju saba. 9 Vahe veae veekurahe erufu hai. Niho Yesu ekavasange vaso, 10 nau ekabuu he mashua hawe na vahina kuu, vekatakho he iziwa nakuso hodi hesewe Dalimanuta.

11 Are Mafarisayo vakuwe vekalita he Yesu vekalholhoshi kumlhasu, kalo vakamgali, vekadumu aboi lhaa kuli ana he Kiumbi. 12 Yesu ekako vuhuye he swaho kuu nakuma miraro, ekalhasu, "Kwaakhoni ya ikolwa la maaze ya lidumu lhaa? Kweri nitamubaya neri telikaowe lhaa!"

13 Niho Yesu ekavaro, ekakirii he mashua, ekaso mlha wa kanu wa iziwa.

14 Vahina kuu veezie kudori mikate mikumure, naho veelo mkate muwe bi he mashua. 15 Yesu ekavalhiija ekavaba, "Wesiishani mukuke uda na mahinyo ya Mafarisayo na mahinyo yakwe Herode ka mahinyo yeshashija sa ishimbe cho lishashija mdufu wa mikate."

16 Vahina kuu vekalholhoshi kubayana, "Eyo to kwaite tetugerie mikate."

17 Yesu ekaile cho veekubayana, ekavalhasu, "Kwaakhoni mubayana ite temulo mikate? Ho, temuniilie neri? He akiri kaghu jilhatiiwe? 18 Ho, mulo maila mira temuakho? Mulo malama mira temuko? Ho, temuhulha? 19 nireaibendula hu mikate mikoi kuvao vahe erufu koi? He mweburungue viteju vime vya mikate vimerisiye?" Vekamba viteju, "Ikado na vinu." 20 Ekavalhasu kahali, nireikhakha hu mikate saba na kuvao vahe erufu hai, "Mwebungurue viteju vime vya samaki na mikate vimerisiye?" Vekamba "Tweebungurue viteju saba."

21 Niho Yesu ekavalhasu, "Ho temnaile ite ani niji?"

22 Yesu na vahina kuu varehe he muang'a mgitutu usewa Betisaida, vahe vakuwe vekamgera mheelo maila esiakho vekamgogo Yesu amdoe. 23 Niho Yesu ekamdara muharegha ka mheelo maila esiakho, ekali nau gahana ya kijiji. Ekambusuya mapae he maila na kumkeiya miharegha he maila kuu, niho Yesu ekamlhasu, "Ho ulo cho uakho?"

24 Ka mheelo maila esiakho ekawesia, ekaba, "Niakho vahe mira veakhokana sa mikhatu idaha."

25 Niho Yesu ekamkeiya kahali miharegha ka mhehe maila. Nau ekalha maila, ekamuru kuakho vigi vikhabuna kikulho. 26 Yesu ekamsange ekamba aso ang'a kuu, ekumba, "Usirekirii kahali heya kijiji."

27 Niho Yesu na vahina kuu vekakhwa verecheri so he vijiji vya sina na muang'a wa Kaisarea Filipi. Veaha kwalhi, Yesu ekavalhasu vahina kuu, "Ho vahe veba ani niji?"

28 Vekamba, "Vahali veba ari ni Yohana Mzabatija, vahali veba ite ari ni Eliya mroto wa Kiumbi na vahali veba ite umuwe wa varoto va Kiumbi."

29 Nau ekavalhasu, "Ho kune muba ani niji?"

Petro ekamba, "Ari niu Masia usughaiwe ni Kiumbi."

30 Niho Yesu ekavalhiija, "Musiregali kumbaiya mhemburi gho."

31 Niho Yesu ekalholhoshi kuvahinya vahina kuu ite, "Muinyi wa Muhe edumuwa aatakhoye kharo kumure na kulhiwe ni madilao va Vayahudi, vagiru va muaresi na vahinya va miku yakwe Kiumbi emuoe Musa. Edumuwa agaawe mira muaze wa kakai eneka kuli he kigame." 32 Yesu eevabaiye ka mburi neri kuvamatu, niho Petro ekamdori Yesu khakhera ekalholhoshi kumjoghoiya. 33 Mira Yesu ekakirii ekavawesia vahina kuu, ekamjoghoiya Petro ekuba, "So mzungure gho, Shetani" kwaite swaho kechi teitoti ya Kiumbi mira itotie ya vahe.

34 Niho Yesu ekalise hu ifyo la vahe hawe na vahina kuu, ekavaba, "Hekusa mheedumu kuneliaha, edumuwe akulhi salaghe, audori msaraba kuu aniliahe. 35 Kwaite mheedumu kuuokola uzime kuu salaghe, eneulhahati, mira mheelhahati uzime kuu kwa mburi gho na kwa Mburi Kulho, eneuokola uzime kuu. 36 Ho, mheeneloja akhoni neri ite eneloja mari khabuna ja idi mira ekalhahati uzime kuu wa maaze khabuna? 37 Ho mheeneowe akhoni kalo aotije uzime kuu? 38 Ikukhwa helo mheneri muwe eneniakhoiya susune ani na mahinyo gho heya ikolwa lilo kui na valage vavahe na makusa, Muinyi wa Muhe nau enemuakhoiya susune, ekuralita he luatame lwa Abaghe ekukhwa hawe na vanyamalo Vanyakhare va Kiumbi."