1 Maaze esi makumure aretakho, Yesu ekakirii Kapernaumu, vahe vekako ite eaha he minda yo ekufufu. 2 Niho, vahe vakumure vekabunguru za he minda, hekakhwa tehelo neri hakutakhoya kwaite vahe veehuye sari gahana. Yesu ekakhwa etavabirikiria Mburi Kulho. 3 Wato oto vekahe vahe vahai, vemtiiye mheeholoje kalo Yesu amuuti. 4 Kwaite vahe ne vakumure, vekakwasiwe kumtii hagi Yesu eaha. Vekabovora ana heminda vekambuija ka mheeebodie he mhasi hodi Yesu eaha . 5 Yesu areaakho kudarisha kini, ekamba ka mheeholoje, "Muinyi gho, wakaaiwa makusa kechi."

6 Vahinya vakuwe va miku yakwe Kiumbi emuoe Musa veezokhodie veekutoti he swaho kini, 7 "Ya mhe emuru kimomo kuyo to? Etamuolhu Kiumbi! Tehelo mhe emuru kukaa makusa ya muhe, kuro Kiumbi bi."

8 Wato oto Yesu ekaila chovetoti he swaho kini, ekavaba, "Kwakhoni mutoti to?" 9 Ho ni kihama chimanga muruika, kumbaiya mheya eholoje, "Wakaiwa makusa kechi, hile kumba, ka dori katandiko kechi uso. 10 Kwato, Yesu ekamba hu mheeholoje, nidumu muile ite heya idi, Muinyi wa Muhe niu emuru kuvakaiya vahe makusa kini."

11 "Nakubao ka, dori mhasi kechi uso ang'a kechi!" 12 Wato oto vahe vemuwesie ekauma ekadori mhasi kuu, ekaso, vahe vakhabuna vekamaka ilai vemfaruia Kiumbi, vekuba, "Neri tetunaraakho kimako saya."

13 Yesu ekaso kahali kakhera he iziwa la Galilaya. Ifyo la vahe vakumure vekamliaha, nau ekalholhoshi kuvahinya. 14 Areakhwa etakho, ekamuakho Lawi muinyi wakwe Alfayo, ezokhodie hagi hakudaraya kodi. Yesu ekamba, "Niliaha!" Lawi ekauma, ekamliaha.

15 Niho Yesu arekhwa ezokhodie ea viaghu ang'a hakwe Lawi, Vedori kodi vakumure hawe na velo makusa veekua hawe nau, kwaite vahe veekumliaha nee vakumure. 16 Vahinya vakuwe va miku yakwe Kiumbi emuoe Musa ne Mafarisayo, varemuakho Yesu ekua na velo makusa na vedaria kodi, vekavalhasu vahina kuu, "Kwakhoni ea na velo makusa na vedoria kodi?"

17 Yesu areako to, ekavaba, "Vahe vesiru tevedaa mkura, mira vedaa mkura nihu varukhao. Silitie kwamburi ya vesilo makusa, mira nilitiye kwamburi ya velo makusa."

18 Vahina vakwe Yohana na vahina va Mafarisayo veekulhati kua viaghu. Vahe vahali vekalita kumlhasu Yesu, "Kwakhoni vahina vakwe Yohana na vahina va Mafarisayo velhati kua viaghu, mira vahina kechi tevelhati kua viaghu?"

19 Yesu ekavalhasu, ho veiriwe he ela ya mzadori vemuru kimomo kulhati kua viaghu ilai veaha hawe na mzadori? Hai tevemuru kulhati kua viaghu. 20 Mira madamo enehe mzadori enekaawe he vo, ata niho venelhati kua viaghu.

21 "Tehelo mheepaa kilaka he gomae kuale na kuchihi he gomae ialalue, ekuboi to, kilaka kikuale chineoni gomae ya azeto, naka gomae ialalue inesaisha kukhaika. 22 Kahali tehelo mheebutu divai kuale he kishau cha ya bulhe ialalue. Kai ekuboi to, divai kuale ineibovora ka mifuko ya bulhe, divai inesuika na mifuko ya bulhe ineonika. mira divai kuale ibutuwe he mifuko ya bulhe mikuale."

23 Muaze muwe wa kufufu, Yesu na vahina kuu veekutakho he mbuva ja ngano. Vareakhwa vedaha, Vahina kuu vekalholhoshi kupu vireri vya ngano kalo vaa. 24 Mafarisayo vekamlhasu Yesu, "Wesia veboi mburi ilhiijwe kuboiwa Muaze wa kufufu?"

25 Yesu ekavakheriti, "Ho temusomie cho Dilao Daudi na vaaro kuu veboie to veelo kela, 26 ata Abiatari ee mgiru wa mzaaresija wa Kiumbi, Daudi ekabuu he minda ya Kiumbi, ekaa mikate iguwe he Kiumbi. Mikate ka yeedumuiwe iawe ni vagiru va muaresi va Kiumbi bi, mira Daudi ekaia kahali ekavao na vaaro kuu."

27 Niho, Yesu ekavaba, "Muaze wakufufu wekeiwe kwa mburi ya vahe si vahe kwa mburi ya Muaze wakufufu. 28 Kwato, Muinyi wa Muhe niu Dilao emuru vikhabuna neri kutakho Muaze wa kufufu."