1 Yesu ekarecheri vabaya, "Kweri nimubaya, helo vahe vahali veaha ii tevekaga vesinaakho Udilao wa Kiumbi ukulita kwa u."

2 Maaze sita areatakho, Yesu ekavadori Petro ne Yakobo ne Yohana, ekaso navo sari ana he lubwa lukulhe hodi veaha salaghini bi. Are Yesu ekakherii kuakhokana kuu, 3 gomae kuu jikaaku swe, tehelo neri mhe emurue kujifua jikaaku sato. 4 Naho vahina vakai vekavaakho Eliya ne Musa varoto va Kiumbi vekuyo ne Yesu. 5 Petro ekamba Yesu, "Mhinya ni kikulho nne kufufu ii! Tukwa vuminda vukai kawe ka kechi, kawe kakwe Musa na kawe kakwe Eliya." 6 Petro eeyoe to kwaite u na vahinya vaaro teveeilie chakuyo. 7 Niho hekaliijanya ilhareno likavaghubika, na kiome chikakoika kuli heka ilhareno ikuba, "Ya ni Muinyi gho nimudumuye, mlhahonhani." 8 Wato oto ka vahina vekamangawesia kira mlha, mira teveakhoe mhemhali eeaha hawe navo, mira Yesu bi.

9 Vareakhwa vedimi kuli he lubwa, Yesu ekavalhiija kwa kuvaba, "Musigali kumubaiya mhevigi muakhoe, sari Muinyi wa Muhe ekuraka kuli he kigame."

10 Hu vahina tevembaiye neri mhekigi chiboiike he lubwa, mira vekakhwa veyo salaghini vekakulhasu vekuba, "Kuga na kuka kuli he kigame niakhoni?" 11 Niho vahina vekamlhasu Yesu vekuba, "Kwaakhoni vahinya va miku yakwe Kiumbi emuoe Musa veba Eliya mroto wa Kiumbi niu edumuwe arongelita?"

12 Yesu ekavaba, "Ni kweri, Eliya mroto wa Kiumbi edumuwa arongelita nakuke mburi khabuna kikulho. Kwaakhoni iji he Magondo ya Kiumbi hegondiwe ite Muinyi wa Mhe enetakhoiya kharo kumure na kulhiwa? 13 Nimubaiya, Eliya mroto wa Kiumbi alitaa, navo vekamboiya sakigi vedumue, sacho egondiiwe mburi kuu."

14 Vareavaheiya hu vahina vahali, vekaakho ifyo igiru la vahe livajunguluke na vahinya vakuwe va miku yakwe Kiumbi emuoe Musa vekulhasuana navo. 15 Wato oto vahe vareamuakho Yesu, vekamakisha, vekamguguluiya naho vekamholu. 16 Yesu ekavalhasu, "Mweekulhasuana kiakhoni?"

17 Mhe muwe hehu ifyo la vahe ekamba, "Mhinya, nitekugeria muinyi gho, elo ipepo limboi asimuru kuyo. 18 kira madamo ka ipepo likumka, litamlhuku di, naka muinyi etaliwa ni mafuo hemuo, etasaho maiki naho msa mzime utadara. Naavagogo vahina kechi valigu ka ipepo mira vakwasiwa."

19 Yesu ekavaba, "Kune ikolwa lisidarisha! Nifufu na kune sari ami? Ninemulaiija sari ami? Nigeriani ka mburatu ii." 20 Kwato vekamtii ka mburatu he Yesu. Hu ipepo liremuakho Yesu, wato oto ka mburatu ekalholhoshi kugwegwekisha, kwato ekalhu di na kulholhoshi kunyagharika na kuliwa ni mapaye he muo. 21 Yesu ekamlhasu aba waka mburatu, "Muinyi kechi ekhwae to kuli ami?" Ekamba.

"Kuli eemgitutu."

22 Kagi kakumure limlhuku he mwalha, hile he mai kalo limgaa. Mira kai umuru kuboi kigi tukoiye mbalamija naho utulhaari! 23 Yesu ekamba, kwaakhoni uba "Kai umuru?" Makhabuna emuruika he mheedarisha.

24 Wato oto aba waka mburatu ekayoisha ekaba, "Nidarisha! Mira kudarisha gho nikughere unilhaari nidarishe!"

25 Yesu areakho ite ifyo la vahe litamangaburu ho eaha, ekalijoghoya ka ipepo ekuliba, "Ari ipepo umboi mheasiyo na kuko, nikuba umli ya mburatu na neri usireambuu kahali!"

26 Ata ka ipepo likaghalaa, likamboi ka mburatu agwegwekishe naho likamli. Hu mburatu ekaakhoika sa uraba etega, na kira mheekaba, "Aaga!" 27 Mira Yesu ekamdara muharegha ka mburatu, ekamlhaari kuuma naka mburatu ekauma.

28 Yesu areabuu minda vahina kuu vekamlhasu veeaha salaghe, "Kwaakhoni nne twakwasiwe kuligu hu ipepo?"

29 Yesu ekavaba, "Ipepo saya telimuru kuli mira bi kwa kuaresi."

30 Yesu na vahina kuu vekali ata, vekatakhoiya idi la Galilaya. Mira Yesu teedumue vahe vaile ho veaha, 31 kwaite ekutavahinya vahina kuu. Ekavaba, "Muinyi wa Muhe enedariwe na eneotiwe he vahe, navo venemgaa mira muaze wa kakai eneka kuli he kigame."

32 Mira vahina kuu teveeilie cho eekurota, vekabugheno kumlhasu mburi ya kigame kuu.

33 Niho Yesu na vahina kuu vekahe he muang'a wa Kaperinaumu. Vareabuu he minda yo Yesu eedie, Yesu ekavalhasu vahina kuu, "He mwekuyotiana akhoni twai kwalhi?"

34 Mira vahina kuu tevembaie kigi, kwaite kwalhi veekuyotiana ite niji elo ugiru kuro vakhabuna. 35 Yesu ekazokhodi, ekavabunguru hu vahina kuu vakhabuna ikado na vanu, ekavaba, "Kai mheekudumu kukhwa wa bosi, edumuwa akhwa wa mkhito naho akhwa mnyamalo wa vakhabuna." 36 Niho ekamdori muinyi mgitutu, ekamuumati hasi hevo naho ekamsamata, ekavaba, 37 "Muhe emdoria muinyi sa ya kwa ilhe gho, enidoria ani. Na enidoria ani mira emdoria Aba gho enisughae."

38 Yohana ekamba Yesu, "Mhinya, twamuakho mheekugu ipepo kwa ilhe kechi. Tukamlhiija kwaite teaha hawe na nne."

39 Mira Yesu ekaba, "Msimlhiije" Kwaite tehelo mheemuru kuboi vimako kwa ilhe gho naho waata ata ekaniyoiya kikusa. 40 Kwaite, mheesitulhi eaha hawe na nne. 41 Kweri nimubaya mheekumuo kikonho cha mai kwa ilhe gho kwaite kune muvahe vakwe Masia, kweri enedoria kigi kikulho kuu.

42 "Kai hekusa mheenemumboi muwe wa ya vainyi venidarisha aboi makusa, yeseekhwaye kikulho ka mheaorowe isahu igiru la kushaghia he waka kuu na kurabibiwe he bahari. 43 Kai muharegha kechi ukukuboi uboi makusa, upaa. Nikeba kubuu he uzime wa maaze kabuna weelo na muharegha muwe kuro kubuu na miharegha minu na kubuu jehanamu ya mwalha usiga. 44 Are helo vunyongole vusiga na mwalha usiga. 45 Kusame kechi kukuboi uboi makusa kupaa. Nikeba kubuu he uzime wa maaze khabuna na kusame kuwe, kuro kukhwa na masame manu na ukabibiwa he mwalha wa jehanamu. 46 Are helo vunyongole vusiga na mwalha usiga. 47 Kai iila kechi likukuboi uboi makusa, ling'ofule. Nikeba kubuu he Udilao wa Kiumbi ukukhwa na iila iwe kuro kukhwa na maila manu naho ubibiwe jehanamu. 48 Are helo vunyongole vusiga na mwalha usiga."

49 "Kiumbi enemtahonhi kira mhehe kharo jitotiye na mwalha, sakigi vahe velhomi mnaro he nihena vesinailhaha he mwalha."

50 "Mnaro ni mkulho, mira ukulahati unaro kuu unebutuwe kiahoni kalo ukoiye kahali? Kune Mukhwa sa mnaro ukoiya, mufufu na nhunguru kune salaghe."