1 Yesu na vahina kuu vekahe chaoju ya iziwa Galilaya he idi la vagerasi. 2 Yesu areadimi bi he mashua ekasahe na mheelo ipepo elie hodi helo mbira. 3 Ka mheeekuzokho helo mbira, tehelo neri mheeekumuru kumuoro kwa minyororo. 4 Madamo makumure vemkumuoro miharegha na masame kwa mhingu na minyororo mira kira madamo ekuorowe etapaa ka minyororo na mhingu, teheelo neri mheelo u emurue kumlhiija. 5 Chakhako na naama ekudaha are he mbira na he lubwa, ekukaa kiome na kukuteete na masaheru.

6 Areamuakho Yesu kwa uda, ekamguguluiya, ekammaya mamuro na ekamdudukhuia, 7 ekama lukhalasu, ekaba, "Ari Yesu Muinyi wa Kiumbi eaha Anasha, Udumu kunisamo ani? Nikugogo uke muo kwa ilhe la Kiumbi, nikulhawa usinio kharo!" 8 Eyoe to kwaite Yesu eembaye, "Ari ipepo, muli ya mhe."

9 Niho, Yesu emlhasu, "Ilhe kechi niji?" Nau ekaba.

"Ilhe gho ni ifyo kwaite nne tuvakumure." 10 Niho likamgogo Yesu asiaguguluti hehu idi.

11 Sina na ata hakudimi he lubwa heelo ifyo igiru la gua jeekua. 12 Kwato, mapepo ekagogoe Yesu vekuba, "Tudumuje turebuu heka gua." 13 Yesu ekaadumuja, ka mapepo ekali ekajibuia hu gua. Ifyo ikhabuna la gua jeerahe erufu nu likagugulu kudimi hehu lubwa sari he iziwa, jikabuu he iziwa jikafiri.

14 Vazemo vaka gua vekagugulu, vekayo ka mburi are he miang'a na vijiji. Vahe vekahe vareakho ka mburi jilijanye. 15 Hu vahe, vareahe he Yesu, vekamuakho wahuhu mheeelo ifyo la mapepo ezokhodie, eoroe gomae na elo akiri kulho vekabughenusha. 16 Vahe veeakhoye ka chilijanye, vekavabaya vahe vahali ka chimlianyije heka mheelo mapepo na mburi ya gua.

17 Niho, vekamba Yesu ahali he idi kini.

18 Yesu ekukutu he mashua, hu mheeelo mapepo ekamgogo vaso hawe.

19 Mira Yesu ekamlhiija. Ekamba, "So ang'a he vabakhu kechi, na urevabaya makhabuna yo Dilao ekuboiiye naho ekuakhoiye mbalamija."

20 Niho, ka mheekaso, ekalholhoshi kubirikira are Dekapoli mburi khabuna Yesu emboiiye, vahe vakhabuna vekoie vekamaka. Dekapo nikuba Miang'a ikhado.

21 Yesu ekaso kahali bwa mhali wa iziwa. Nau eeumae khakhera he iziwa ifyo igiru la vahe likamjunguluka. 22 Ata ekalita muwe wa vagiru va minda yo vesahe Vayahudi, esewa Yairo. Area muakho Yesu, ekakubibi he masame kuu, 23 ekamgogo ekuba, "Mualeta gho mgitutu elaishishishwa. Nikulhawa ulita uremkeiya miharegha kechi, amuru kuu naho akhwa mzime."

24 Kwato, Yesu ekaso nau. Ifyo igiru la vahe likamliaha ilai limfinhafinha.

25 Ata heelo mlage mrukhao eekuliwe ni sako kwa madamo amiko ikhado na minu, 26 Eehoiwe ni vakura vakumure. Ka mlage alahati vigi kuu vikhabuna, teuye mira urukhao ukasaisha. 27 Ka mlage areko mburi jakwe Yesu, ekashushumira he ifyo la vahe ekamliaha Yesu kwa mzunngure ekadoa gomae kuu, 28 Eeboie to kwaite eekutoti he swaho kuu, ite, "Nikudoa bi gomae yakwe Yesu, nineu."

29 Areadoa bi gomae yakwe Yesu, wato oto Sako ikaro kuli, ekakuko ite autiwe urukao kuu. 30 Wato oto Yesu ekaile ite u kuu jaamli, kwato ekakherii ekaliwesia ifyo la vahe ekalhasu, "Niji edoiye gomae gho?"

31 Vahina kuu vekamba, "Uaho cho vahe vekufinhafinha, kwaahoni ulhasu ite" "Niji enidoie?"

32 Mira Yesu ekakhwa erawesia kira mlha kalo amuakho ka mheemdoie. 33 Niho ka mlage, ekuile kigi chimlijanyie, kwato ekamliaha Yesu ilai ekusingiza kwa bughu, ekammaya Yesu mamuro naho ekambaya mburi khabuna jo ejiboie. 34 Yesu ekamba, "Mualeta gho kudaarisha kechi kwa kuuti. So kikulho waau urukao kechi."

35 Yesu areakhwa echeri yo, vekalita vahe kuli he minda ya Yairo mgiru wa minda ya kusahea Vayahudi, vekamba, "Mualeta kechi aaga. Kwaakhoni ucheri muo kharo Mhinya?"

36 Mira Yesu arekoiya kacho veyoe, ekamba mgiru wa minda ya kusahea Vayahudi, "Usibugheno, daraisha bi." 37 Kwato Yesu teedumue mhemhali emliaha, mira ekaso ne Petro, Yakobo ne Yohana mbakhu wakwe Yakobo. 38 Vereahe ang'a hakwe Yairo, Yesu ekako nkalasu naho ekavaakho vahe vekuzoisha kwa vukhuye. 39 Yesu ekabuu minda, ekavaba, "Kwaakhoni muma nkalasu nakuzo kwa vuhuye? Ya muinyi tegae, etebodi bi!"

40 Mira vekamsisi, kwato ekavagu vakabuna gahana, ekavadori aba ne lage kini waka mualeta nahu vahina kuu vakai, vekabuu su hodi ebodijwe ka mualeta. 41 Yesu ekamdara muharegha hu mualeta egae, ekamba, "Talita koumi!" Chitotie na kuba, "Mualeta, nikuba kaa!"

42 Wato oto ka mualeta ekauma, ekalholhoshi kudaha. Nau eelo miko ikado na minu. Ka mburi jirealijanya, vahe vekamakisha. 43 Yesu ekavalhiijisha vasimbaiye neri mheka mburi jilijanye, niho ekavaba "Muoni ka mualeta viaghu aa."