1 Mafarisayo vakuwe na vahinya va miku yakwe Kiumbi emuoe Musa velie Yerusalemu vekabunguru ho Yesu eaha. 2 Vekavaakho vahina kuu vakuwe veekua viaghu na miharegha isidumuwe hekuaresi, sa kigi miku ya Vayahudi yekudumu.

3 Kwaite Mafarisayo na Vayahudi vakhabuna veliaha hucho vehinyiwe ni vakaka kini, tevea kigi sari vaonhi miharegha kini kikulho sakigi chidumuwa he miku ya kumuaresi Kiumbi, 4 vekukhwaa kuli kikhoja tevea kigi neri sari vaonhi miharegha kini. Veekuliaha miku hali, sa chidumuwe kuonhi vikhonho, khore, na vikholhe vya shaba.

5 Niho, hu Mafarisayo na vahinya va miku yakwe Kiumbi emuoe Musa vekamlhasu Yesu, "Kwaakhoni vahina kechi teveliaha mahinyo ya vakaka kanu? Mira vea viaghu na miharegha isidumuwa he miku ya kumuaresi Kiumbi?"

6 Yesu ekavaba, "Isaya Mroto wa Kiumbi eeyoe kweri arearota mburi kaghu. Sakigi igondiwe he Magondo ya Kiumbi ekuba ite kune valame."

"Ya vahe, veniko kwa viome kini bi,

mira he swaho kini veaha uda na ani.

7 Kuniaresi kini ni tekuvalhaari,

kwaite vehinya miku kini salaghe jo nisivaoe."

8 "Kune mwaro miku ya Kiumbi, na kuliaha miku ja vahe."

9 Yesu eerecheri kuvabaya, "Kune mulo kwalhi kulho ja kulhi miku ya Kiumbi kalo kuliaha mahinyo kaghu. 10 Miku yakwe Musa yeebae, mko abaghe ne lage kaghu, naho kira enemuolhu abaghe hile lage kini, chidumuwe agaawe. 11 Mira kune muhinya ite, kai mheelo kigi cha kumlhaari aba kini hile lage kini, mira eba ite ya kigi ni Korubani," nisakuba "Kigi ya ni kwa mburi ya kumuo Kiumbi", 12 mwavaboi ka mhevasivalhaari aba kini ne lage kini. 13 Kanicho muoni miku ya Kiumbi kwa kwalhi ya mahinyo kaghu muyadariye. Kahali helo mburi kumure sakajo muboi.

14 Niho Yesu, ekalise kahali hu ifyo la vahe, ekavaba, "Nilakhonhani, kune vakhabuna, muile ya mburi jo niyo. 15 Tehelo kigi chibuu za he mhekuli gahana chimuru kumboi mheasidumuijwe kumuaresi Kiumbi. Mira, hucho chimli kuli za mhenicho chimboi asidumuijwe he kumuaresi Kiumbi." 16 Muhe elo malama yeko, nako!

17 Yesu na vahina kuu vareliro hu ifyo la vahe na kubuu minda, vahinya kuu vekamlhasu avabaie mburi yaka mtotire. 18 Yesu ekavaba, "Ho, neri kune temuilie? Ho, temuilie ite tehelo kigi chibuu za he mhekuli gahana chimuru kumboi asidumuijwe he kumuaresi Kiumbi? 19 Kwaite mheekua kigi techimbuu he swaho kuu mira chibuu he maso, naho chitaguwa gahana ya msa kuu." Kwakuyo to, Yesu ekavitakhoja viaghu vikhabuna ite viraye kuawa naho mheadumuijwe kumuaresi Kiumbi.

20 Niho Yesu ekacheri yo ekuba, "Hu kigi chili za he mhenicho chimboi mheasidumuijwe kumuaresi Kiumbi. 21 Kwaite he swaho ya mheheli mitotire mikusa, sa kui na valage va vahe, ugwalo, kugaa, kui na mlage esimke, 22 udana, ukusa, mhayo wa mari, lame, luizu, kuolhu, kiburatu, uivile. 23 Ya makusa makabuna yeli za he swaho ya muhe, naka niu yemboi mheasidumuijwe kumuaresi Kiumbi."

24 Niho Yesu ekahali ata ekaso sina na muang'a wa Tiro. Are ekabuu he minda we nau tedumue neri hasa mheaile ite eaha ata. Mira temurue kukumatu. 25 Ata heelo mlage eelo mualeta kuu elo ipepo, ka mlage areako mburi jakwe Yesu wato oto ekamangaso ekammaya Yesu mamuro he masame. 26 Ka mlage see Myahudi, eakhoike he muang'a wa Foinike uaha he idi lisewa Siria. Ekamgogo Yesu amgu mualeta kuu ipepo. 27 Yesu ekamba, "Varo vainyi varongeku. Kwaite si kikulho kudori viaghu vya vainyi na kuyao madie yaa."

28 Mira hu mlage ekaba, "Dilao, madie nau, eraa viaghu vimerisiwe ni vainyi vekua."

29 Kwato Yesu ekamba hu mlage, "Kwa kudarisha kechi, gale ang'a, unemuheia mualeta kechi aliwa ni ipepo."

30 Niho hu mlage ekagale, ekamuheiya mualeta kuu ebodie he mhasi, hu ipepo laamli.

31 Niho Yesu ekali sina na muang'a wa Tiro, kutakhoya Sidoni, kuso Dekapoli ite ni miang'a ikhado kutahoya iziwa Galilaya. 32 Are vahe vakuwe vekamgera mheesimuru kuyo na kuko he Yesu, vekamgogo Yesu amkeye miharegha ka mhena amuuti. 33 Yesu ekamsusughuti ka mhekhakhera hesilo vahe, ekake visatu he malama heka muhe, ekabusu mapae he kisatu na kudoa luanda lwaka muhe. 34 Niho Yesu ekawesia ana he Kiumbi, ekakhuru saa kwa za ekamba ka muhe, "Efata," ni sakuba "Lhaika."

35 Wato oto ka mheekalholhoshi kuko na luanda kuu lukalhamera, ekalholhoshi kuyo. 36 Yesu ekavalhiija vasimbaye neri mhemuwe ka mburi. Mira cho evalhiije, nirecho vesaishe kuyo ka mburi. 37 Vahe vakabuna vekoiye vekamakisha. Vekaba "Eboi kira kigi kikulhosha!" Etavaboi vesiko vako, na vesimuru kuyo vayo!