1 Niho Yesu ekalholhoshi kuyo na vahina kuu kwa mitotiano ekavaba, "Muhe muwe elhae mizabibu he mbuva kuu. Ekakwa lugo, ekatu ihora lakuulea zabibu, ekakwa kiringo. Ka mbuva ekaikodisha he vakurume, ekaso he idi la uda." 2 Madamo ya kudahula zabibu ureahe, elo mbuva ekamsugha mnyamalo kuu he hu vakurume, aremgeria zabibu kuli hehu evakodishe hu mbuva. 3 Mira hu vakurume vekamdara hu mnyamalo vekamma, vekamguguluti neri vesimuoe kigi. 4 Niho hu elo mbuva ekamsugha mnyamalo mhali, nau vekamma he mua na kumuboiya mburi ja susune jo vedumue. 5 Elo mbuva ekamsugha mnyamalo mhali, ka nau vekamgaa. Mzalo mbuva ekavasugha vanyamalo vahali vakumure,vanyamalo vakuwe vekavama, na vahali vekagaawe. 6 Elo mbuva eemerisiwe ni mhemuwe, ka nee muinyi kuu emdumue. Ekamsugha ilai eba, niraba venemko kwaite ni muinyi gho. 7 Mira areahe, vekabaiyana, ya niu enepala ya mbuva. Roni tumgaa, kalo ya mbuva ikhwa kanu. 8 Kwato vekamdara vekamgaa, naho vekambibi gahana yahu mbuva ya mizabibu.

9 Yesu ekavalhasu, "Kwato mzalobuva enesamo?" "Enelita kuvagaa ka vekodishe mbuva vakhabuna na enevao vekodisha vahali ka mbuva ya mizabibu. 10 Ho, temusomiye magondo manyakhare?

Isaheru lo velhie vazakwa

laakhwa isaheru igiru la msingi. 11 Dilao Kiumbi niu eboiye ya mburi,

naka limasha he maila kanu!"

12 Vaaresija vagiru na vahinya va miku yakwe Kiumbi emuoe Musa, na vaagiru vazime, veedumuye kumdara kwaite veeiliye ite mtotiano ka weekuvatakhoa vo. Mira vekako buku ka ifyo la vahe. Kwato vekamro vekaso.

13 Niho vagiru va Vayahudi vekavasugha Mafarisayo vakuwe na vahe va ifyo lakwe Herode vaso he Yesu kalo vamdara kwa hucho enechiyo salaghe. 14 Vekamliaha Yesu, vekamba, "Mhinya tureila ite ari u mhe uyo kweri bi, naho tumbugheno mhe kwaite tuwesia ite u niji. Mira ari uhinya hucho Kiumbi edumu vahe vajiboi. Tubaiye, ho ni miku kulho kumlhanu kodi Kaisari hile hai?"

15 Ho, tulhanu hile tusilhanu? Mira Yesu ereile ukusa kini veekutoti, ekavalhasu, "Kwaakhoni mutanitegha? Nigeriani ka igongolo la mahaku wa dinari niliakho."

16 Vekamgeria ka igongolo la mhaku wa dinari, Yesu ekavalhasu, "Ya basa iaha heya igongolo naya magondo niyakweji?"

Vekamba, "Ni vwakwe Kaisari dilao mgiru wa Roma."

17 Yesu ekavaba, "Yakwe Kaisari muoni Kaisari, na yakwe Kiumbi muoni Kiumbi."

Navo vekamakishwa niu.

18 Niho ifyo la Vayahudi lisewa Masadukayo veba ite tehelo kuka kuli he kigame vekamliaha Yesu, vekamlhasu, 19 vekuba "Mhinya, Musa mroto wa Kiumbi etungodie ite, kai mheekuga naho teroe muinyi, mbahu kuu edumuwe amdori ka mlage egaiwe ni muagiru, kalo amusaiye mbahu kuu vainyi. 20 Iji heelo vabahu saba. Wabosi ekadori mlage mira ekaga esiroe muinyi. 21 Niho mbahu wa kanu ekampala ka mlage egaiwe ni muagiru nau ekaga esinasa muinyi. Na wato oto he mbahu kuu wa kakai ekaga esinasa muinyi. 22 Hehu vabahu vakhabuna saba tehelo neri eroe vainyi. Kalufunda hu mlage nau ekaga. 23 Iji tubaiye muaze vahe vekuraka kuli he kigame, ka mlage enekhwa mlage wakweji? Tulhasu to kwaite vakhabuna saba veedie nau sa mlage kuu?"

24 Yesu ekavaba, "Kune mwaaoni kwaite temuilie Magondo Manyakare neri umuruisho wa Kiumbi. 25 Kwaite vegae vekuneka kuli he kigame tevekadori neri kudoriwa, venekhwa sa vanyamalo va are ana he Kiumbi. 26 Mira mburi ya vaho kuka kuli he kigame, ho temsomie he kitabu chakwe Musa mburi ya kasusuma to kekukha mwalha? Kiumbi embaye Musa, ani ni Kiumbi wakwe Ibrahimu, Kiumbi wakwe Isaka naho Kiumbi wakwe Yakobo. 27 Kiumbi si Kiumbi wa vegae mira ni Kiumbi wa vesigae. Kune mwaaoniisha."

28 Mhinya muwe wa miku yakwe Kiumbi emuoe Musa ekalita, ekavako vekulhasuana. Ekaakho Yesu cho evabae kikulho Mafarisayo ekamlhasu, "He heya miku khabuna, ni hama giru kutakho khabuna?" 29 Yesu ekaba, "Miku giru niyo ya, lhakhonhani kune vahe va Iziraeli! Dilao Kiumbi kanu, niu Dilao muwe bi. 30 Mdumuishe Kiumbi kechi kwa swaho kechi khabuna, na saa kechi khabuna, kwa akiri kechi kukhabuna na u kechi kukhabuna. 31 Mihake ya kanu niu ya mdumu muaro kechi sakigi ukudumu salaghe. Tehelo mihake mihali migiru kutakho ya minu."

32 Hu mhinya wa miku yakwe Kiumbi emuoe Musa ekamba Yesu, "Mhinya waayo kikulho! Ite Kiumbi ni muwe bi neri tehelo mhali mira nireu bi." 33 Kiome ya ni kikulho, kumdumu Kiumbi kwa swaho kechi khabuna na kwa akiri kechi khabuna na kwa u kechi khabuna na kumdumu muaro sakigi ukudumu salaghe ni kikulho kutakho kumguya Kiumbi vivulu vya kulhahawe he mwalha.

34 Yesu areakho ite ka mheeyoe kwa viugho, ekamba, "Ari tuaha uda na Udilao wa Kiumbi." Kuli madamo ka, tehelo neri mheegalie kumlhasu Yesu mburi hali.

35 Kalufunda Yesu areakhwa ehinya he Minda ya Kiumbi, ekavalhasu "Chikwae kimomo vahinya va miku yakwe Kiumbi emuoe Musa veba ite Kiristo ni Muinyi wakwe Daudi?" 36 Kwaite Daudi salaghuu, ekukaetiwe ni Saa Mnyakhare eebae,

DILAO Kiumbi eembae Dilao gho,

Zokhodi mlha gho wa sughano,

sari nikuravake vankuru kechi di he masame kechi. 37 "Kai Daudi salaghe emsee Dilao. Kwato, chimuruika kimomo Kiristo kukhwa muinyi wakwe Daudi?"

Ifyo igiru la vahe leekumlhakhonha Yesu kwakulhamuiwa.

38 Yesu erekhwa ehinya ekavaba, "Khwani maila na vahinya va miku yakwe Kiumbi emuoe Musa, vo vedumue kudaha ilai veoroe gomae kulhe na kuholuwe ni vahe kwa miharegha minu hodi hevikhoja, 39 naho vedumu kuzokhodi he vikire vya ugiru he minda ja kusahea Vayahudi na kuowe ugiru hodi he elha. 40 Vetavatati valage vegaiwe ni vaagiru kini kalo vadori vigi kini, kalo kuakhokana vakulho kwa kuaresi kieza. Vahe saya veneowa zamaro kini inekhwa girusha."

41 Niho Yesu ekazokhodie heminda ya Kiumbi, hewesiana na hodi hekeiwa vivulu, ekaakho cho vahe vegu vivulu kini. Velo mari vakumure veekuke mihaku mikumure, 42 niho ekalita mlage mhuye egaiwe ni muagiru kuu ekagu vigongolo vinu vya shaba tevyeekuye kuweiya kigi kikulho. 43 Yesu ekavase vahina kuu, ekavaba, "Kweri nimubaiya, ya mlage mhuye egaiwe ni muagiru ebutue kivulu hekikholhe kigiru kutakho vakhabuna vahali. 44 Kwaite vahali vegue kuli hehu vimerisie he mari kini, mira ya mlage mhuye egaiwe ni muagiru, egue vikhabuna vyo elo nau vimlhaari afufu."