Filho de Deus

3 Ntɛhə-i nɔ dʉ̀ʼ ntɛ məgʉ́ə ndə Nyii kie, ɔ kɛŋ bɛ haʼ Nyii nchəŋnchəŋ-ɛŋ ndə nuʼ-i, ɔ nɔ bɛ̀ʼ wʉʉnəmbikə nchəŋnchəŋ-ɛŋ nə ŋgie-shʉ́əshʉ́ə-kə-i. Ndʉʉ ndə ɔ nɔʼ kə fɛ̀ʼndɛŋ ndə məsʉ̀ bʉ̂ʼʉ liʼ, ɔ gɛ̀ dùʼ kwiiləŋ Nyii ntoʼ-ɔ, ndə ɔ shʉ́ə chàa fɔbə inchəŋ.

4 Bə nɔ nə dùʼhə ɔŋ ndəŋ yʉʉ ndə i gʉ́ə chàa yi-bʉəntəŋNyii-yə, haʼ ndə mbʉ yie ndə Nyii kə kɔ́ tʉ ɔŋ gʉ́ə chàa yʉə-yə.

14 Nɔ, mbʉ Kəŋgie gwè bə̀ŋ woməsʉʉ chí kəwʉʉnəmbi-fɛ̄ŋ mu bʉʼʉ, bʉʼʉ bɔŋ-nɔʼ-leʼ nyíɛ məgʉə-e, məgʉ́ə ndə ɔ kie ndə mbyu Vaa imɔʼ kəghɔ Tie-e, ɔ kie buuŋjyu ghɔŋbə ŋgie-shʉəŋ-kə ilə́ŋnə.

18 Wo chʉʼ nə nyíɛ Nyii fɛ, bɔŋ yaʼkɛŋ mbʉ mbyu Vaa ndə bɛ haʼ ɔ ndə ɔ bɛ Nyii bɔŋ-kə́-leʼ bɛ mbʉə mbʉ Tie, ɔ nɔʼ chìi bʉʼʉ kínə mbʉ Nyii.

17 Bɔŋ Jiso bə̀ŋhə tʉ bɔŋ mbɔ, "Tie-ɔ nɔ tʉʼ fɔ̀ʼ tə gwè dàa nduɔ, mbəŋ-ɔŋ bɔŋ-kə́-leʼ fɔ̀ʼ." 18 Nɔ bɛ luu-i nɔ ndə bəntəŋbəshʉ-bʉə-Juu kə́ bìʼ kʉ́ʉ fia yɔ́ŋyɔ́ŋ ndə məyí ɔ, bʉʼka ɔ nɔ kə́ bə́ʼ bə haʼ Chîlɔʼkə fɛ, ɔ nɔ nə leʼ tíi Nyii nə Tie-e, i kə́ dʉ̀ʼ mbɔ ghɔŋ Nyii bɛ ndyʉndyʉ.

Bita núhə mbɔ Jiso la bɛ mbʉ Wo ndə Nyii Kùŋ Tə́ŋ

13 Ndʉʉ ndə Jiso kə gwè dàa mu bie Kasalia Filibai, ɔ bíʼtə tʉ vâafɔʼɔ-bi mbɔ, "Bʉə tʉʼ ghɔ̀ŋ mbɔ Vaa-Woməsʉʉ bɛ nda?"

14 Bɔ̂ŋ ghɔ̀ŋ mbɔ, "Bəbɛʼbə nɔ ghɔ̀ŋ mbɔ a la bɛ Jɔŋ ndə ɔ̃ kɔ́ muu, bəbɛʼbə kə́ ghɔ̀ŋ mbɔ a la bɛ Ɛlaja, bəbɛʼbə ghɔ̀ŋ mbɔ a la bɛ Jelimia byuunɔ mbyu yʉkəŋgieNyiibɛʼ." 15 Ɔ ghɔ̀ŋ tʉ bɔŋ mbɔ, "Bɔŋ bii tʉʼ ghɔ̀ŋ mbɔ mɔ bɛ nda?"

16 Samu Bita ghɔ̀ŋ mbɔ, "A nɔ bɛ mbʉ Wo ndə Nyii Kùŋ Tə́ŋ, mbʉ VaaNyii ndə mbʉ Nyii bɛ ghɔ."

16 Ndʉʉ ndə Jiso kə fí muu, haʼ ndʉʉmɛ ndə ɔ kóʼ muu, kə nyíɛ, yuo ŋɔ́ʼnə tʉ ɔŋ, ɔ nyíɛ LyʉʉhəNyiikə, ɔ kə́ shíʼ hə yuo ndə tambʉətə, kə́ gwè ndə mədùʼ ndəŋ ɔŋ, 17 kə yʉ́, gyʉʉ gìe hə yuo mbɔ, "Nɔ bɛ Vaa-ɔŋ nɔ ndə mɔ kʉ̀ʉ ɔ daa, ndə tʉʉ-ɔ bʉ̀ʉ ndəŋ ɔŋ jyujyu."

15 Wotəmiyɔŋ ndə ɔ ghɔ̀ŋ mbɔ Jiso bɛ VaaNyii, Nyii nɔ káa mu ɔŋ, mbəŋ-ɛŋ káa mu Nyii.

9 Nyii nɔ dʉ̀ʼ ŋkʉ̂ʉ-i tʉ bʉʼʉ ndə mətə́ŋ mbyu Vaa-ɛ imɔʼ kɔ́ mu kəwʉʉnəmbi, mbɔ b̈ʉʼʉ chʉʼ kie məchímbi tíŋ hə bɔ̌ŋ. 10 Nɔ bɛ nukə nɔ ndə ŋkʉ̂ʉ bɛ yɔŋ, kaa mbɔ bʉʼʉ kə fəŋ kʉ̀ʉ Nyii fɛ bɔŋ nɔ fəŋ kʉ̀ʉ ɔ kʉ̀ʉ bʉʼʉ, tə́ŋ Vaa-ɛ, ndə məgwè bɛ fɔ-fɛ̀ʼndɛŋ-bə ndə tíŋ hə bɔ̌ŋ ɔŋ bə sʉ̀fyii hə ndəŋ bʉ̂ʼtə-ʉʼʉ.

8 Wotəmiyɔŋ ndə ɔ tʉʼ chìi bʉ̂ʼʉ gɛ̀gɛ̀ nɔ bɛ tʉ Debulu, bʉʼka Debulu nɔʼ kə́ chìi bʉ̂ʼʉ lʉ̀ hə ndəŋ ŋgwunə-mbi. Nukə ndə VaaNyii kə gwè bʉʼka yɔŋ, nɔ nə bɛ ndə məkùutə fɔ̀ʼ Debulu.

12 Wo ndə ɔ kie mbʉ Vaa, nɔ kie məchímbi təmə liʼ-i ghɔ fɛ, wo ndə ɔ gòʼ təmə kie mbʉ VaaNyii fɛ, kie məchímbi fɛ.

16 "Bʉʼka Nyii nə kʉ̀ʉ wʉʉnəmbikə yɔ́ŋyɔ́ŋ mənɔ, ɔ kɔ́ mbyu Vaa-ɛ imɔʼ mbɔ wotəmiyɔŋ ndə ɔ bɛ́ŋ ɔŋ, bíeleʼnə kwú bɛ́ fɛ, bɔŋ bu kie məchímbi təmə liʼ-i ghɔ fɛ.

21 Bʉʼka ndə mbʉ Tie kie ghʉəʼkə ndə məbʉ̀nə kóʼhə bʉə ndə bɔ̂ŋ nɔʼ kwútə, kɔ́ məchímbi tʉ bɔŋ, nɔ bɛ haʼ nɔ, mbʉ Vaa nɔ kie ghʉəʼkə ndə məkɔ́ məchímbi tʉ bʉə ndə ɔ kʉ̀ʉ. 22 Mbʉ Tie kyinə kwɛ̀ fɛʼɛ wo fɛ, ɔ bɔŋ nɔʼ kɔ́ ghʉəʼkə nchəŋnchəŋ tʉ mbʉ Vaa ndə məkwɛ̀ fɛʼtə inchəŋ, 23 mbɔ bʉə bənchəŋ chʉʼ kɔ́ kuŋhə tʉ mbʉ Vaa haʼ ndə bɔ̂ŋ kɔ́ kuŋhə tʉ mbʉ Tie. Wotəmiyɔŋ ndə ɔ gòʼ təmə kə́ kɔ́ kuŋhə tʉ mbʉ Vaa fɛ, tʉʼ kɔ́ kuŋhə tʉ mbʉ Tie-e ndə ɔ tə́ŋ ɔŋ fɛ.

25 "M̈ɔ kɛŋ shyíi bii nə shʉəŋ mbɔ ndʉʉ tʉʼ gwè, bɔŋ-nɔʼ-leʼ buŋ gwè, ndʉʉ ndə bʉə ndə bɔ̂ŋ nɔʼ kə kwútə bu yʉ́ gyʉʉ VaaNyii, bʉə ndə bɔ̂ŋ yʉ́ bɔŋleʼ fɔ̀ʼ mbʉ kənu, bu kie məchímbi. 26 Bʉʼka mbɔ haʼ ndə mbʉ Tie kie məchímbi kəghɔ-ɔ, nɔ bɛ haʼ ndə ɔ nɔʼ kɔ́ ghʉəʼkə tʉ mbʉ Vaa ndə məkie məchímbi kəghɔ-ɔ.

12 Bɔŋ tʉ bʉə bənchəŋ ndə bɔ̂ŋ kə lʉ̀ ɔ mu fyii-bɔŋ, tʉ bʉə ndə bɔ̂ŋ kə bɛ́ŋ ɔŋ, ɔ kɔ́ ghʉəʼkə tʉ bɔŋ ndə məbɛ vâa-Nyii. 13 Təmə bə bí bɔŋ bə ndə məbí kəlɔŋ fɛ, byuunɔ ndə ŋkʉʉnə tʉʉ woməsʉʉ fɛ, byuunɔ ŋkʉʉnə tʉʉ woləŋ fɛ, bɔŋ bɛ nə ŋkʉʉnə-tʉʉ-Nyii.

20 Bə nɔʼ kə kwɛ̀ŋ baʼa Klai mɔʼɔ yi. Məchimbi-ɔ leʼbie ntɛ ndə i kə bɛ bəshʉ fɛ, mɔ nɔ tʉʼ chí mbi nduɔ bʉʼka Klai nɔ tʉʼ chí mu mɔ. Məchi-ɔ nduɔ ndə woməsʉʉ, mɔ nɔ tʉʼ chí bʉʼka mɔ mɔ̀ʼfyii-ɔ ndəŋ VaaNyii, ndə ɔ kə kʉ̀ʉ mɔ kɔ́ ŋwɔŋ-ɛŋ yie-mɔ.

4 Bɔŋ ndʉʉ ndə mbʉ ŋgwɔʼmbi kə kʉ̀ʼnə, Nyii tə́ŋ vaa-ɛ, woke bí ɔ, vɛʼ ndə bə nə kə́ bíe tʉ́ʼ nuʼ-Mushi, 5 mbɔ ɔ chʉʼ chʉ̀ʼ tʉ-bʉə-kə hə ndəŋ nuʼ ndə i tʉʼ yá bɔŋ, mbɔ Nyii chʉʼ lʉ̀ bʉʼʉ ndə vâanchinə-bi. 6 Bʉʼka bʉʼʉ bɛ vâa-bi, mbʉ Nyii nɔʼ tə́ŋ Lyʉʉhə-vaa-ɛ-kə kɔ́ mu mbʉə-bʉʼʉ, ɔ tʉʼ tíi mbɔ, "Baba, Baba-Tie-yaʼ."

10 Bʉʼka mbɔ, kaʼ bɛ ndʉʉ ndə bʉʼʉ kə bíe bʉə-bàa-Nyii, Nyii lìʼ ntuu-yʉʼʉ tíŋ hə bɔ̌ŋ məkwu-Vaa-ɛ, ɔ bu kwáa bʉʼʉ nduɔ ntyʉʉ təka tíŋ hə bɔ̌ŋ məchimbi-i, ndə bʉʼʉ bɔŋ nɔʼ lìʼ ntuu nɔ.