1 B̈ii nyíɛ ntɛ ŋkʉ̂ʉ ndə mbʉ Tie kʉ̀ʉ bʉʼʉ nə yɔŋ! Ŋkʉ̂ʉ-i tʉ bʉʼʉ nɔ yɔ́ŋ daa tə bə kə́ tíi bʉʼʉ nə vâa-Nyii, bɔŋ ndə ŋgie-shʉəŋ-kə, bʉʼʉ nɔ leʼ bɛ vâa-bi. Nukə ndə i chìi təmə bʉə-kəwʉʉnəmbi kínə bʉʼʉ fɛ, nɔ bɛ mbɔ bɔ̂ŋ kə kínə ɔŋ fɛ. 2 Mbʉətə bətieŋkɔŋ-bɔ̄ŋ, bʉʼʉ nɔ bɛ vâa-Nyii nduɔ, bɔŋ nukə ndə bʉʼʉ bu nə sɛŋ bɛ yɔŋ chʉʼ kɛ̀ʼnə fɛ. Bɔŋ nukə ndə bʉʼʉ kínə nɔ bɛ mbɔ ndʉʉ ndə ɔ bu yi gwè nɔ, bʉʼʉ bɛ ndə ɔ, bʉʼka bʉʼʉ bu yi nyíɛ ɔŋ kɛŋ ndə ntɛhə ndə ɔ bɛ yɔŋ. 3 Wotəmiyɔŋ ndə ɔ yʉ́əʼnə ndəŋ Klai nɔ kie ndə mətʉ́ʼ mu fyii-i, itʉ́ʉnə, haʼ ndə mbʉ Klai bɛ tʉ́ʉnə.

4 Wotəmiyɔŋ ndə ɔ tʉʼ fɔ̀ʼ bʉ̂ʼʉ mu məchimbi-i nɔ tʉʼ tɛ́ŋ nuʼ-Nyii, bʉʼka məfɔ̀ʼ bʉ̂ʼʉ nɔ bɛ mətɛ́ŋ nuʼ-Nyii. 5 Bii nɔ kínə mbɔ Klai nɔ nə gwè ndə məfyúhə bʉ̂ʼʉ, təmə bʉ̂ʼʉ bɔŋ bɛ mu mbʉə-ɔ fɛ. 6 Wo ndə ɔ káa mu njunə ghɔŋbə Klai mə kə́ chìi bʉ̂ʼʉ gɛ̀gɛ̀ fɛ. Bɔŋ wo ndə ɔ tʉʼ chìi bʉ̂ʼʉ gɛ̀gɛ̀ chʉʼ nyíɛ ɔŋ fɛ təmə bɔŋleʼ kínə ɔŋ fɛ.

7 Vâaŋgeŋge, kə wo mə fə́ʼhə bii fɛ. Wotəmiyɔŋ ndə ɔ tʉʼ chìi nubə-i ndyʉndyʉ, nɔ bɛ ndyʉndyʉ, haʼ ndə Klai bɛ ndyʉndyʉ. 8 Wotəmiyɔŋ ndə ɔ tʉʼ chìi bʉ̂ʼʉ gɛ̀gɛ̀ nɔ bɛ tʉ Debulu, bʉʼka Debulu nɔʼ kə́ chìi bʉ̂ʼʉ lʉ̀ hə ndəŋ ŋgwunə-mbi. Nukə ndə VaaNyii kə gwè bʉʼka yɔŋ, nɔ nə bɛ ndə məkùutə fɔ̀ʼ Debulu. 9 Wo kaa ghɔ ndə Nyii nɔʼ bí ɔ ndə ɔ mə-kə́-chìi bʉ̂ʼʉ gɛ̀gɛ̀ fɛ, bʉʼka nuʼ-Nyii nɔ bɛ mu mbʉə-ɔ. Ɔ bɔŋ-mə-leʼ-kə́-chìi bʉ̂ʼʉ gɛ̀gɛ̀ fɛ bʉʼka Nyii nɔʼ bí ɔ. 10 Bəkɔ, bə chèʼnə vâa-Nyii hə ndə vâa-Debulu ndə yɔ̄ŋ-yə, wotəmiyɔŋ ndə ɔ gòʼ təmə kə́ chìi nubə ndə i bɛ kʉ̀ʼnə tʉ Nyii fɛ byuunɔ kʉ̀ʉ bəliŋ-bi bʉə-Nyii fɛ, kaa vaa-Nyii fɛ.

11 Nɔ bɛ ntəŋ nɔ ndə bii nɔʼ kə yʉ́ lʉ̀ hə ndəŋ nchʉʉhə, mbɔ bii nɔ kie ndə məkʉ̀ʉ ŋwɔŋtə-ii. 12 Bʉʼʉ mə bɛ nə Kɛɛŋ ndə ɔ kə bɛ tʉ wo bʉəbʉə ndə bɛ Sata, yí liŋ-iŋ fɛ. Ɔ kə yí ɔ bʉʼka ka? Bʉʼka nchiinə bənu-i nɔ nə bɛ bʉəbʉə, yi-liŋ-iŋ-yə kə́ bɛ ndyʉndyʉ. 13 Kə i mə ghɔ́ʼ bii fɛ, bəliŋ-bɔŋ, kaʼ bʉə-kəwʉʉnəmbi bàa bii.

14 Bʉʼʉ nɔ kínə mbɔ bʉʼʉ nɔʼ fyú ndə via-kwú-kə, bɛ nduɔ ndə via-məchímbi-kə bʉʼka bʉʼʉ nɔ kʉ̀ʉ bəbɛʼbʉə ndə bɔ̂ŋ nɔʼ bɛ́ŋ Nyii. Wo ndə ɔ gòʼ təmə kie ŋkʉ̂ʉ tʉ liŋ-iŋ wo-Nyii fɛ, nɔ káa ndəŋ via-kwú-kə. 15 Wotəmiyɔŋ ndə ɔ bàa liŋ-iŋ, wo-Nyii, nɔ bɛ wo yí wo. Bii bɔŋleʼ kínə mbɔ wo yí wo kaa ghɔ ndə ɔ mə kie məchímbi təmə liʼ-i ghɔ fɛ. 16 Bəkɔ bʉʼʉ kínə ŋkʉ̂ʉ ndəŋ yɔ̄ŋ-yə, mbɔ Jiso Klai nɔ kə kɔ́ məchimbi-i tʉ kwú bʉʼka bʉʼʉ. Bʉʼʉ kie ghɔ ndə məkɔ́ məchimbi-yʉʼʉ tʉ kwú ghɔ bʉʼka bəliŋ-bʉʼʉ. 17 Bɔŋ kaʼ wo kie fɔ-kəwʉʉnəmbi-bə, nyíɛ liŋ-iŋ wo-Nyii ɔ kə́ kwú, ɔ kyʉ̀hə shʉ-i ndə fɔkə ndə ɔ tʉʼ byúu, bʉʼʉ bu ghɔ̀ŋ mbɔ ŋkʉ̂ʉ-Nyii bɛ mu məchimbi-ɔ tɛka?

18 Vâaŋgeŋge, kə bʉʼʉ mə kə́ kʉ́ʉ bʉə bə nə ŋgie-chu-kə fɛ, bʉʼʉ nɔ kie ndə məkʉ̀ʉ bʉə nə fɔ̀ʼ leʼnə shʉəŋ. 19 Nɔ bɛ ntɛ nɔ ndə bʉʼʉ bu yi kínə mbɔ bʉʼʉ nɔ bɛ ndə via-shʉəŋ-kə, nɔ bɛ ntɛ nɔ ndə bʉʼʉ bu yi kie fyii shʉ́əshʉ́ə ndə məbɛ bəshʉ-Nyii təmə tʉvyiikə fɛ. 20 Bʉʼka, kaʼ fyiihə-ʉʼʉ mɔ̀ʼ bʉʼʉ sê, bʉʼʉ kínə mbɔ Nyii nɔ chàa ŋkwɔʼtə-yʉʼʉ bɔŋleʼ kínə nubə inchəŋ.

21 Nɔ, mbʉətə bətieŋkɔŋ-bɔŋ, kaʼ fyiihə-ʉʼʉ gòʼ təmə mɔ̀ʼ bʉʼʉ sê fɛ, bʉʼʉ kie fyii shʉ́əshʉ́ə bəshʉ-Nyii. 22 Fɔkə təmiyɔŋ ndə bʉʼʉ bíʼtə tʉ ɔŋ, bʉʼʉ kie bʉʼka bʉʼʉ nɔ tʉʼ tʉ́ʼ bəŋkahə-bi bɔŋleʼ chìi nukə ndə ɔ kʉ̀ʉ. 23 Bɔŋ bɛ ŋkahə-i nɔ, mbɔ b̈ʉʼʉ mɔ̀ʼfyiihə-ʉʼʉ ndəŋ Vaa-ɛ Jiso Klai, bɔŋleʼ kʉ̀ʉ bəbɛʼbʉə, haʼ ndə ɔ kàhə bʉʼʉ. 24 Wotəmiyɔŋ ndə ɔ tʉ́ʼ bəŋkahə-Nyii, nɔ káa ghɔŋ Nyii, Nyii káa ghɔŋ ɔŋ. Nɔ bɛ ntɛ nɔ ndə bʉʼʉ kínə mbɔ Nyii káa bʉʼʉ bɔŋ bʉʼka Lyʉʉhəkə ndə Nyii nɔʼ kɔ́ tʉ bʉʼʉ.