1 Vâaŋgeŋge-bɔŋ, mɔ nɔ tʉʼ nyɔ̀ʼ nubə-ɔ̄ŋ tʉ bii bʉʼka bii mə yi chìi bʉ̂ʼʉ. Bɔŋ kaʼ wo mu bii yi chìi bʉ̂ʼʉ, bʉʼʉ nɔ kie wo ndə ɔ tʉʼ fʉ̀ʉtə mbʉ Tie yie-bʉʼʉ, kə́ bɛ Jiso Klai mbʉ wo ndə ɔ bɛ ndyʉndyʉ. 2 Ɔ nɔ bɛ fɔ-fɛ̀ʼndɛŋ-kə ndə tíŋ hə bɔ̌ŋ ɔŋ bə sʉ̀fyii hə ndəŋ bʉ̂ʼtə-ʉʼʉ, i bɛ te haʼ bʉ̂ʼtə-ʉʼʉ tətɛʼ bʉʼʉ fɛ, i nɔ bɔŋleʼ bɛ te bʉ̂ʼ-kəwʉʉnəmbi-tə inchəŋ ghɔ.

3 Nɔ bɛ ntɛ nɔ ndə bəkɔ bʉʼʉ kínə mbɔ bʉʼʉ nɔʼ kínə Nyii, kaʼ bʉʼʉ tʉ́ʼ bəŋkahə-bi, i dʉ̀ʼ mbɔ bʉʼʉ nɔ kínə ɔŋ leʼ shʉəŋ. 4 Wotəmiyɔŋ ndə ɔ ghɔ̀ŋ mbɔ, "Mɔ nɔ kínə ɔŋ," təmə bɔŋleʼ kə́ yʉ́ chu-i ndə mə-kə́-tʉ́ʼ bəŋkahə-bi fɛ, nɔ bɛ wo kəlɛɛŋhə təmə ŋgie-shʉəŋ-kə kə́ bɛ mu mbʉə-ɔ fɛ. 5 Bɔŋ wotəmiyɔŋ ndə ɔ tʉ́ʼ ŋgieNyiikə nɔ wo ndə ŋkʉ̂ʉ-i tʉ Nyii nɔʼ kɛŋ bɛ tə kùu. Nɔ bɛ nɔ ndə bəkɔ bʉʼʉ kínə mbɔ bʉʼʉbə Nyii nɔ bɛ mɔʼɔ, 6 kaʼ wotəmiyɔŋ ghɔ̀ŋ mbɔ ɔ bɛ mu Nyii, ɔ nɔ kie ndə mə-kə́-tòʼ haʼ ndə Jiso kə́ bɛ kəwʉʉnəmbi-fɛ̄ŋ.

7 Mbʉətə bətieŋkɔŋ-bɔŋ, ŋkahə-ɔ̄ŋ ndə mɔ tʉʼ nyɔ̀ʼ tʉ bii nɔ kaa yi-fefe-yə fɛ, nɔ bɛ yi-kənduɔŋ-yə ndə bii nɔʼ kə kie lʉ̀ hə ndəŋ nchʉʉhə. Mbʉ nduɔŋ ŋkahə nɔ bɛ ntəŋ ndə bii nɔʼ kə yʉ́. 8 Bɔŋ ndə, mbʉ ŋkahə ndə mɔ tʉʼ nyɔ̀ʼ tʉ bii nɔ bɛ yi-fefe-yə ghɔ. Bəkɔ bə nyíɛ leʼ shʉəŋ mbɔ i nɔ bɛ fefe ndə ntɛ ndə Klai tʉʼ chí mbi leʼnə ntɛ ndə bii tʉʼ chí mbi. Bʉʼka njəŋkə nɔ tʉʼ tíŋ, ŋkɛŋ kɛʼɛ nɔʼ chʉ́ʉhə kə́ báa.

9 Wotəmiyɔŋ ndə ɔ ghɔ̀ŋ mbɔ ɔ bɛ mu kɛʼɛ bɔŋ kə́ bàa liŋ-iŋ nɔ bíe mu kənjəŋ. 10 W̃otəmiyɔŋ ndə ɔ kʉ̀ʉ liŋ-iŋ nɔ káa mu kɛʼɛ, nɔ, təmə nubɛʼkə bɛ mu mbʉə-ɔ ndə bəkɔ i tʉ́ʉhə ɔŋ, ɔ chìi bʉ̂ʼʉ fɛ. 11 Bɔŋ wotəmiyɔŋ ndə ɔ bàa liŋ-iŋ nɔ bɛ mu kənjəŋ bɔŋleʼ kə́ tòʼ mu kənjəŋ təmə kínə yəŋkə ndə ɔ tʉʼ gɛ̀ chɔ fɛ bʉʼka njəŋkə nɔʼ fʉ̀əŋtə shʉ-i.

12 Mɔ nɔ tʉʼ nyɔ̀ʼ tʉ bii, vâaŋgeŋge,

bʉʼka bə nɔʼ sʉ̀fyii hə ndəŋ bʉ̂ʼtə-ii bʉʼka Jiso.

13 Mɔ nɔ tʉʼ nyɔ̀ʼ tʉ bii, bətie vâa,

bʉʼka bii nɔ kínə ɔŋ ndə ɔ nə bɛ lʉ̀ hə ndəŋ nchʉʉhə.

Mɔ nɔ tʉʼ nyɔ̀ʼ tʉ bii, vâakəyɔwo,

bʉʼka bii nɔʼ ghɔ́ʼ wo bʉəbʉə ndə bɛ Sata.

Mɔ nɔ kə nyɔ̀ʼ tʉ bii, vâambuɔ,

bʉʼka bii nɔ kínə mbʉ Tie.

14 Mɔ nɔ kə nyɔ̀ʼ tʉ bii, bətie vâa,

bʉʼka bii nɔ kínə ɔŋ ndə ɔ nə bɛ lʉ̀ hə ndəŋ nchʉʉhə.

Mɔ nɔ kə nyɔ̀ʼ tʉ bii, vâakəyɔwo,

bʉʼka bii nɔ bɛ shʉ́əshʉ́ə,

ŋgieNyiikə káa mu mbʉə-bii,

bii nɔʼ ghɔ́ʼ wo bʉəbʉə ndə bɛ Sata.

15 Kə bii mə kʉ̀ʉ wʉʉnəmbikə byuunɔ fɔbə ndə i bɛ muŋgɔ fɛ. Kaʼ wo kʉ̀ʉ wʉʉnəmbikə, təmə ŋkʉ̂ʉ mbʉ Tie káa mu mbʉə-ɔ fɛ. 16 Bʉʼka mbɔ fɔbə nchəŋnchəŋ-ɛŋ ndə i bɛ mu kəwʉʉnəmbi, fɔbə ndə mbʉə-a kʉ̀ʉ ghɔŋbə fɔbə ndə shʉ-a kʉ̀ʉ leʼnə məgʉ́ə ndə i gwè hə ndəŋ nchuɔ, gwè hə kəghɔ mbʉ Tie fɛ, i nɔ gwè hə mu kəwʉʉnəmbi. 17 Wʉʉnəmbikə nɔ tʉʼ tíŋtíŋ ghɔŋbə fɔbə ndə i kʉ̀ʉ, bɔŋ wotəmiyɔŋ ndə ɔ tʉʼ fɔ̀ʼ nubə ndə Nyii kʉ̀ʉ, bu kie məchímbi təmə nə lìʼ fɛ.

18 Vâambuɔ, bʉʼʉ nɔ bɛ nduɔ ndə ndyiʼtə-mbi-kə. Bii nɔʼ kə yʉ́ mbɔ Wobàa Klai tʉʼ gwè, bɔŋ nduɔ, bʉə-bàa-bi buŋmbi nɔʼ fyú, nɔ chìi yɔŋ bʉʼʉ kínə mbɔ nduɔ bɛ ndyiʼtə-mbi-kə. 19 Bʉə-bɔ̄ŋ kə bɛ nuɔ-bʉʼʉ fɛ, nɔ chìi yɔŋ bɔ̂ŋ fyú hə mu bʉʼʉ. Bɔ̂ŋ kʉ̌ʉ bɛ nuɔ-yʉʼʉ, təmə bɔ̂ŋ nɔ káa mu bʉʼʉ. Bɔ̂ŋ bɔŋ fyúhə ŋwɔŋtə-ʉə mbɔ i chʉʼ kɛŋ bɛ itʉ́ʉnə mbɔ bɔ̂ŋ bənchəŋ la kaa nuɔ-bʉʼʉ fɛ. 20 Bii bɔŋ nɔʼ kə kie kuŋbə* ndə i bɛ LyʉʉhəNyiikə ndə mbʉ Wo kəchɔŋ ndə bɛ Klai nɔʼ kə kùŋ bii nə yɔŋ, nɔ, bii bənchəŋ bɔŋ kínə shʉəŋ. 21 Mɔ tʉʼ nyɔ̀ʼ tʉ bii bʉʼka mbɔ bii gòʼ təmə kínə shʉəŋ fɛ, bɔŋ bʉʼka bii nɔ kínə shʉəŋ, bɔŋleʼ bʉʼka mbɔ lɛɛŋkə kyinə fyú hə ndəŋ shʉəŋ fɛ. 22 Mbʉ wo chʉ̀ə kəlɛɛŋhə bɛ nda ndʉʉghɔfii? Nɔ bɛ wo ndə ɔ tɛ́ŋ mbɔ Jiso la kaa mbʉ Wo ndə Nyii Kùŋ Tə́ŋ fɛ. Nɔ bɛ mbʉ Wobàa Klai nɔ, wo ndə ɔ tɛ́ŋ mbʉ Tie ghɔŋ mbʉ Vaa. 23 Wo kaa ghɔ ndə ɔ tɛ́ŋ mbʉ Vaa ndə ɔ bɛ ghɔŋbə mbʉ Tie mɔʼɔ fɛ. Wo ndə ɔ bɛ́ŋ mbʉ Vaa bɔŋleʼ kə́ fʉ̀ʼtə, nɔ bɛ ghɔŋbə mbʉ Tie mɔʼɔ.

24 Nɔ, ŋ̈giekə ndə bii nɔʼ kə yʉ́ lʉ̀ hə ndəŋ nchʉʉhə káa mu mbʉə-bii. Kaʼ ŋgiekə ndə bii kə yʉ́ lʉ̀ hə ndəŋ nchʉʉhə káa mu mbʉə-bii, mbəŋ-yii ghɔ káa mu njunə biibə mbʉ Vaa ghɔŋbə mbʉ Tie. 25 Nɔ bɛ ŋkɔʼnə nɔ ndə mbʉ Klai nɔʼ kə kɔ̀ʼnə ndə məkɔ́ tʉ bʉʼʉ. Nɔ məchímbi təmə liʼ-i ghɔ fɛ.

26 Mɔ nɔ tʉʼ nyɔ̀ʼ nubə-ɔ̄ŋ tʉ bii te bʉə ndə bɔ̂ŋ tʉʼ kɔ̀ɔtə ndə məfə́ʼhə bii. 27 Bɔŋ LyʉʉhəNyiikə ndə i bɛ kuŋbə ndə bii kə kie kəghɔ-Klai nɔ káa mu mbʉə-bii, nɔ, wo leʼ kie ndə mə-kə́-dàhə bii dàhə fɛ. Bɔŋ ndə Lyʉʉhəkə-i tʉʼ dàhə bii te nubə ndə bii kie ndə məkínə, bɔŋleʼ kə́ bɛ shʉəŋ, təmə kə́ bɛ lɛɛŋkə fɛ. Haʼ ndə LyʉʉhəNyiikə kə dàhə bii, b̈ii káa biibə Klai mɔʼɔ.

28 Bɔŋ nduɔ, vâaŋgeŋge, b̈ii káa mu njunə-yii bɔŋ, mbɔ ndʉʉ ndə ɔ bu bʉ̀nə gwè nɔ, bʉʼʉ chʉʼ kie fyii shʉ́əshʉ́ə təmə kə́ bíanəbíanə mbʉə-ɔ fɛ bʉʼka tʉvyiikə ndəŋ chîkə ndə ɔ bu gwè chɔ. 29 Bʉʼka ndə bii kínə mbɔ Klai bɛ ndyʉndyʉ, nɔ, bii nɔ kie ndə məkínə ndʉʉmɛ mbɔ wotəmiyɔŋ ndə ɔ tʉʼ chìi nubə ndyʉndyʉ nɔ bɛ vaa-Nyii.