1 Wotəmiyɔŋ ndə ɔ bɛ́ŋ mbɔ Jiso bɛ mbʉ Wo ndə Nyii Kùŋ Tə́ŋ, Nyii nɔʼ bí ɔ, bʉə ndə bɔ̂ŋ kʉ̀ʉ mbʉ Tie nɔ kʉ̀ʉ wotəmiyɔŋ ndə ɔ nɔʼ bí ɔ. 2 Nɔ bɛ ntɛ nɔ ndə bəkɔ bʉʼʉ kínə mbɔ bʉʼʉ kʉ̀ʉ vâa-Nyii, ndʉʉ ndə bʉʼʉ kʉ̀ʉ Nyii bɔŋleʼ tʉ́ʼ nubə ndə ɔ kàhə. 3 Məkʉ̀ʉ Nyii nɔ bɛ mbɔ bʉʼʉ tʉ́ʼ bəŋkahə-bi təmə bəŋkahə-bi bɔŋ shʉ́ə ndə mətʉ́ʼ fɛ. 4 Bʉʼka wotəmiyɔŋ ndə Nyii nɔʼ bí ɔ, nɔ tʉʼ ghɔ́ʼ wʉʉnəmbikə. Bʉʼʉ bɔŋ ghɔ́ʼ wʉʉnəmbikə nə məmɔʼfyiihə-ʉʼʉ ndəŋ Nyii. 5 Bɛ nda ndə bəkɔ ɔ ghɔ́ʼ wʉʉnəmbikə? Nɔ bɛ haʼ wo ndə ɔ bɛ́ŋ mbɔ Jiso nɔ bɛ VaaNyii.

6 Jiso Klai nɔ bɛ wo ndə ɔ kə gwè ndəŋ muu ndə bɛ məfì muu leʼnə fɔbʉəkə ndə i kə fyú mbʉə-ɔ ndəŋ tyʉntɔɔnəkə, kaa bə haʼ ndəŋ muu fɛ, nɔ bɛ ndəŋ muu ghɔŋbə fɔbʉəkə. LyʉʉhəNyiikə nɔ bɛ wo ndə ɔ nú gwù mbɔ yɔ̄ŋ-yə la bɛ shʉəŋ, bʉʼka mbʉ kəLyʉʉhə nɔ bɛ shʉəŋ. 7 Nɔ, bʉʼʉ nɔ kie nubə itia ndə i dʉ̀ʼ yɔ̄ŋ-yə kə́ bɛ 8 mbʉ kəLyʉʉhəNyii, mbʉ muu leʼnə mbʉ kəfɔbʉə, nubə-ɔ̄ŋ itia nɔ gìe gyʉʉ imɔʼ. 9 Kaʼ woməsʉʉ nú gwù, bʉʼʉ bɛ́ŋ, gwù ndə nú Nyii nɔ gʉ́ə chàa yɔŋ, bʉʼka nɔ bɛ gwù nɔ ndə Nyii nú te Vaa-ɛ. 10 Wotəmiyɔŋ ndə ɔ bɛ́ŋ VaaNyii nɔ kínə mbɔ nukə-ɔ̄ŋ nɔ bɛ shʉəŋ. Wo ndə ɔ gòʼ təmə bɛ́ŋ nukə-ɔ̄ŋ fɛ, nɔ tʉʼ ghɔ̀ŋ mbɔ Nyii nɔ bɛ wo kəlɛɛŋhə, bʉʼka ɔ bɛ́ŋ gwù ndə Nyii nú te Vaa-ɛ fɛ.

11 Mbʉ gwù ndə ɔ kə nú nɔ bɛ mbɔ Nyii nɔ kə kɔ́ məchímbi təmə liʼ-i ghɔ fɛ tʉ bʉʼʉ, mbʉ məchímbi kə́ bɛ mu Vaa-ɛ. 12 Wo ndə ɔ kie mbʉ Vaa, nɔ kie məchímbi təmə liʼ-i ghɔ fɛ, wo ndə ɔ gòʼ təmə kie mbʉ VaaNyii fɛ, kie məchímbi fɛ.

13 Mɔ nɔ tʉʼ nyɔ̀ʼ nubə-ɔ̄ŋ tʉ bii ndə bii mɔ̀ʼfyiihə-ii ndəŋ yie VaaNyii mbɔ b̈ii chʉʼ kínə mbɔ bii nɔ kie məchímbi təmə liʼ-i ghɔ fɛ. 14 Fyiihə-ʉʼʉ nɔ bɛ shʉ́əshʉ́ə mbɔ kaʼ bʉʼʉ bíʼtə fɔkə təmiyɔŋ ndə i tòʼ ghɔŋbə ŋkʉʉnə tʉʉ-i, ɔ̈ yʉ́ bʉʼʉ. 15 Bɔŋ bʉʼka bʉʼʉ kínə mbɔ ɔ̃ yʉ́ bʉʼʉ ndʉʉ ndə bʉʼʉ bíʼtə nukə tʉ ɔŋ təmiyɔŋ, bʉʼʉ nɔ kínə ghɔ mbɔ ɔ bu kɔ́ fɔkə tʉ bʉʼʉ ndə bʉʼʉ bíʼtə tʉ ɔŋ.

16 Kaʼ wo nyíɛ liŋ-iŋ ɔ kə́ chìi bʉ̂ʼʉ ndə i lìʼ nə kwu fɛ, ɔ̈ gwía tʉ Nyii, ɔ̈ kɔ́ məchímbi tʉ ɔŋ təmə liʼ-i ghɔ fɛ. Yɔ̄ŋ-yə nɔ bɛ tʉ bʉə ndə bɔ̂ŋ tʉʼ chìi bʉ̂ʼʉ ndə i lìʼ nə kwu fɛ. Bʉ̂ʼʉ nɔ bɛ ghɔ ndə i lìʼ nə kwu, mɔ tʉʼ ghɔ̀ŋ mbɔ wo gwía tʉ Nyii te maa-yɔ̄ŋ ntɛ fɛ. 17 Fɔʼ-bʉəbʉə-tə inchəŋ nɔ bɛ bʉ̂ʼʉ, təmə bɔŋ bɛ bʉ̂ʼtə inchəŋ ndə i lìʼ nə kwu fɛ.

18 Bʉʼʉ nɔ kínə mbɔ wotəmiyɔŋ ndə Nyii nɔʼ bí ɔ, kyi kə́ chìi bʉ̂ʼʉ gɛ̀gɛ̀ fɛ, bʉʼka VaaNyii nɔ tʉʼ kyʉ̀hə ɔŋ təmə wo bʉəbʉə, Sata mə kə̀ŋ ɔŋ fɛ. 19 Bʉʼʉ nɔ kínə mbɔ bʉʼʉ nɔ gwè hə kəghɔ-Nyii, wʉʉnəmbikə inchəŋ bɔŋleʼ kə́ bɛ mu kəghɔ-wo bʉəbʉə. 20 Bʉʼʉ bɔŋ kínə mbɔ VaaNyii nɔʼ gwè kɔ́ bʉʼʉ nə ndaa ndə məkínə ɔŋ ndə ɔ bɛ shʉəŋ, bʉʼʉ bɔŋleʼ kə́ bɛ ndə njunə bʉʼʉbə mbʉ Nyii-shʉəŋ bʉʼka bʉʼʉ bɛ ndə njunə bʉʼʉbə Vaa-ɛ, Jiso Klai. Nɔ bɛ kɛŋ Nyii-shʉəŋ bɔŋleʼ bɛ məchímbi təmə liʼ-i ghɔ fɛ.

21 Vâaŋgeŋge, b̈ii láa bʉʼka mə-kə́-gháa bənyii.