2 Jɔŋ 1

Nchaʼtə

1 Ŋwɔʼnə-ɔ̄ŋ nɔ lɔ̀ hə kəghɔ-Jɔŋ mbʉ ntəŋbəshʉ mu chɔshi.

Mɔ nɔ tʉʼ nyɔ̀ʼ tʉ woke ndə Nyii nɔʼ séʼ ghɔŋbə vâa-bii*1:1 Woke-ɔ̄ fɛ̀ŋ ghɔŋbə vâa-bii nɔ bɛ chɔshi ghɔŋbə ŋguuhə-i. ndə mɔ kɛŋ kʉ̀ʉ ɔ nə shʉəŋ. Kaa bə haʼ mɔ tətɛʼ mɔ fɛ. Bɔŋ bʉə bənchəŋ ndə bɔ̂ŋ kínə shʉəŋ nɔ kʉ̀ʉ a ghɔ, 2 bʉʼka ŋgie-shʉəŋ-kə ndə i bɛ mu mbʉə-bʉʼʉ, bu káa chɔ təmə liʼ-i nə bɛ ghɔ fɛ.

3 Tə Nyii mbʉ Tie ghɔŋbə Jiso Klai, Vaa mbʉ Tie, dʉ̀ʼ buuŋjyu, tʉvyiikə leʼnə fyiighʉ́ənə tʉ bʉʼʉ nə shʉəŋ ghɔŋbə ŋkʉ̂ʉ.

Kə́ chí mbi nə shʉəŋ leʼnə ŋkʉ̂ʉ

4 Tʉʉ-ɔ nɔ bʉ̀ʉ yɔ́ŋyɔ́ŋ daa ndə mɔ nyíɛ vâa-ba-bɛʼbə bɔ̂ŋ kə́ chí mbi nə shʉəŋ, haʼ ndə mbʉ Tie kə kàhə bʉʼʉ.

5 Bɔŋ nduɔ, mɔ nɔ tʉʼ gìe tʉ a, naa, mbɔ b̈ʉʼʉ kʉ̀ʉ ŋwɔŋtə-ʉʼʉ. Yɔ̄ŋ-yə kaa ŋkahə fefe ndə mɔ tʉʼ mɔ̀ʼ fɛ, nɔ bɛ yi-yə ndə bʉʼʉ nɔʼ nə kie lʉ̀ hə ndəŋ nchʉʉhə. 6 Ŋkʉ̂ʉ-ɔ̄ ndə mɔ tʉʼ gìe nɔ, nɔ bɛ mbɔ b̈ʉʼʉ tʉ́ʼ bəŋkahə-Nyii. Mbʉ ŋkahə ndə bii nɔʼ kə kie lʉ̀ hə ndəŋ nchʉʉhə, nɔ bɛ mbɔ b̈ii kə́ chí mbi nə ŋkʉ̂ʉ.

7 Bʉʼka mbɔ bʉə fə́ʼhə nɔʼ fyú gɛ̀tə mu kəwʉʉnəmbi buŋmbi, bʉə ndə bɔ̂ŋ ghɔ̀ŋ mbɔ Jiso Klai kə gwè bɛ woməsʉʉ fɛ. Ntɛ wo-maa-ɔ̄ŋ, nɔ bɛ wo fə́ʼhə bɔŋleʼ kə́ bɛ wobàa Klai. 8 B̈ii láa nə tʉkə-i, bʉʼka bii mə yi bɛ́ fɔkə ndə bʉʼʉ nɔʼ fɔ̀ʼ, bɔŋ mbɔ bii yi kie lɔʼɔbə-ii ŋkwɔŋ. 9 Wotəmiyɔŋ ndə ɔ gòʼ təmə káa ndə nubə ndə Klai kə dàhə fɛ, kə́ dàhə yi-yə gɛ̀ nə shʉbə kie Nyii mu fyii-ɔ fɛ. Wotəmiyɔŋ ndə ɔ káa ndə nubə ndə Klai tʉʼ dàhə nɔ kie mbʉ Tie ghɔŋbə mbʉ Vaa.

10 Kaʼ wo gwè tʉ a təmə gwè nə nubə-ɔ̄ŋ ndə Klai kə dàhə nɔ fɛ, kə a mə lʉ̀ ɔ mu njaa-a fɛ, byuunɔ buŋ chàʼtə ɔŋ fɛ, 11 bʉʼka wotəmiyɔŋ ndə ɔ gìe tʉ ɔŋ nɔʼ fúu nuɔ ghɔŋ ɔŋ ndəŋ bʉ̂ʼʉ-e.

Ndyiʼtə-nchaʼtə-kə

12 Mɔ nɔ kie nubə buŋmbi ndə məgìe tʉ bii, təmə bɔŋ kʉʉ nyɔ̀ʼ ndəŋ ŋwɔʼnə nə vaakətyʉ ŋwɔʼnə fɛ. Mɔ nɔ tʉʼ kwɔ̀ʼtə mbɔ mɔ bu gwè mətòʼ tʉ bii chʉʼ kwə́ʼ tʉ bii nə chu-ɔ, tʉʉtə-ʉʼʉ chʉʼ bʉ̀ʉ bənchəŋ gɛ̀ kùu.

13 Vâa-liŋ-aŋ woke ndə Nyii nɔʼ séʼ ɔ, nɔ tə́ŋ nchaʼtə tʉ a.