3 Jɔŋ 1

Nchaʼtə

1 Ŋwɔʼnə-ɔ̄ŋ nɔ lɔ̀ hə kəghɔ-Jɔŋ mbʉ ntəŋbəshʉ mu chɔshi. Mɔ nɔ tʉʼ nyɔ̀ʼ tʉ mbʉətə tieŋkɔŋ-ɔŋ Gayo, ndə mɔ kɛŋ kʉ̀ʉ ɔ nə shʉəŋ.

2 Mbʉətə tieŋkɔŋ-ɔŋ, mɔ nɔ tʉʼ gháaNyii mbɔ n̈ubə inchəŋ kə́ tòʼ tʉ a jyujyu, ä bɔŋ kie mbʉə shʉ́əshʉ́ə haʼ ndə mu fyii-a bɛ. 3 Tʉʉ-ɔ nɔ nə bʉ̀ʉ yɔ́ŋyɔ́ŋ daa ndʉʉ ndə bəbɛʼbəliŋ-bʉʼʉ kə gwè shyíi mɔ nə ntɛ ndə a tə́nə ndəŋ ŋgie-shʉəŋ-kə, haʼ ndə a chí mbi nə shʉəŋ. 4 Nubɛʼkə bɛ ghɔ ndə i tʉʼ kɔ́ tʉʉjyu tʉ mɔ tə tíŋ mbɔ mɔ yʉ́ mbɔ vâa-bɔŋ tʉʼ chí mbi nə ŋgie-shʉəŋ-kə fɛ.

Mə-kə́-lɛ́nə bʉə fɔʼɔ-Tiekətʉ

5 Mbʉətə tieŋkɔŋ-ɔŋ, a nɔ tʉʼ fɔ̀ʼ nə shʉəŋ-aŋ ndə fɔ̀ʼ ndə a tʉʼ fɔ̀ʼ tʉ bʉə-bɔ̄ŋ ndə bɔ̂ŋ nɔʼ bɛ́ŋ Nyii, buŋ ndə bɔ̂ŋ bɛ bəntoʼŋgwe nɔ. 6 Bɔ̂ŋ nɔʼ fʉ̀ʼtə ntɛ ŋkʉ̂ʉ ndə a kie, tʉ baʼa fɛ̄ŋ mu chɔshi. Kwáa bɔŋ ndə məgɛ̀ kəyəŋ ndə bɔ̂ŋ tʉʼ gɛ̀ chɔ, ndə ntɛ ndə tʉʉ-Nyii bu bʉ̀ʉ chɔ, 7 bʉʼka bɔ̂ŋ nɔ fyú mbi ndə məgɛ̀ ndə fɔʼɔ Jiso Klai, təmə bɛ́ŋ ndə məfì ŋkwaa kəghɔ-bʉə ndə bɔ̂ŋ gòʼ təmə nɔʼ bɛ́ŋ Nyii fɛ. 8 Mbəŋ-yʉʼʉ, bʉə ndə bʉʼʉ nɔʼ bɛ́ŋ Nyii, nɔ kie ndʉʉmɛ ndə məkwáa bʉə nə bɔŋ, mbɔ bʉ̂ʼʉ bɔŋ chʉʼ fúu ghɔkə ndə mbʉ fɔʼɔ kəŋgie shʉəŋ.

9 Mɔ nɔʼ kə nyɔ̀ʼ vaa-ŋwɔʼnə tʉ chɔshi, bɔŋ Diotələfi, ndə ɔ kʉ̀ʉ ndə məbɛ fəŋ wo, bɛ́ŋ ndə məyʉ́ nukə ndə baʼa ghɔŋ fɛ. 10 Nɔ, ndʉʉ ndə mɔ bu gwè, mɔ bu gwè nə mbʉ bənu sê ndə ɔ tʉʼ fɔ̀ʼ, kə́ kwə́ʼ, kwə́ʼ bənɔ̌ʼɔ bʉəbʉə te baʼa. Təmə maa-yɔ̄ŋ buŋ kʉ̀ʼnə tʉ ɔŋ fɛ, ɔ kə́ tɛ́ŋ ndə məlʉ̀ bʉə ndə bɔ̂ŋ nɔʼ bɛ́ŋ Nyii mu chɔshi bɔŋleʼ tɛ́ŋ tʉ bʉə ndə bɔ̂ŋ kʉ̀ʉ ndə məlʉ̀ bɔŋ, tə jə̀ŋ bɔŋ mu chɔshi.

11 Mbʉətə tieŋkɔŋ-ɔŋ, kə a mə-kə́-lʉ̀ hə kəwu nuɔ-bʉə ndə bɔ̂ŋ tʉʼ fɔ̀ʼ bʉ̂ʼʉ fɛ, bɔŋ lʉ̀ hə kəwu nuɔ-bʉə ndə bɔ̂ŋ tʉʼ fɔ̀ʼ nu-jyujyu-bə. Wotəmiyɔŋ ndə ɔ fɔ̀ʼ nu-jyujyu-bə nɔ bɛ wo-Nyii, bɔŋ wotəmiyɔŋ ndə ɔ fɔ̀ʼ nu-bʉəbʉə-bə chʉʼ nyíɛ Nyii fɛ. 12 Bʉə bənchəŋ tʉʼ kwə́ʼ nu-jyujyu-bə te Dɛmɛtolo, mbʉ kəŋgie shʉəŋ nə mbəŋ-ɛŋ tʉʼ kwə́ʼ te ɔ. Baʼa bɔŋ-nɔʼ-leʼ bìʼ yaʼ-yə chɔ, a bɔŋ kínə mbɔ nukə ndə baʼa tʉʼ gìe nɔ bɛ shʉəŋ.

Ndyiʼtə-nchaʼtə-kə

13 Mɔ nɔ kie nubə buŋmbi ndə məgìe tʉ a, təmə bɔŋ kʉ̀ʉ nyɔ̀ʼ ndəŋ ŋwɔʼnə nə vaakətyʉ ŋwɔʼnə fɛ. 14 Mɔ nɔ tʉʼ kwɔ̀ʼtə mbɔ kʉʉkə məniʼ nɔ mɔ bu gwè mətòʼ tʉ a chʉʼ kwə́ʼ tʉ a nə chu-ɔ. 15 Tə Nyii kɔ́ a nə fyiighʉ́ənə. Bətieŋkɔŋ-ba ndə bɔ̂ŋ bɛ fɛ̄ŋ nɔ tə́ŋ nchaʼtə. Bɔŋleʼ gìe tʉ bətieŋkɔŋ-baʼa ndə bɔ̂ŋ bɛ ghɔ fɛ̄ŋ bəmɔʼbəmɔʼ.