Jud 1

Nchaʼtə

1 Nɔ nyɔ̀ʼ mbəŋ-ɔŋ Jud nyɔ̀ʼ ŋwɔʼnə-ɔ̄ŋ, ndə mɔ bɛ vaafɔ̀ʼ Jiso Klai bɔŋleʼ kə́ bɛ liŋ-Jɛŋ.

Mɔ nɔ tʉʼ nyɔ̀ʼ tʉ bʉə ndə Nyii mbʉ Tie nɔʼ tíi bɔŋ, bɔ̂ŋ kə́ chí mbi mu ŋkʉ̂ʉ-Nyii ɔ bɔŋleʼ kə́ kyʉ̀hə bɔŋ tʉ́ʼ tʉ Jiso Klai. 2 Tə Nyii dʉ̀ʼ tʉvyiikə, fyiighʉ́ənə leʼnə ŋkʉ̂ʉ yɔ́ŋyɔ́ŋ tʉ bii.

B̈ii láa bʉə dàhə kəŋgieNyii nə mbii

3 Mbʉətə bətieŋkɔŋ-bɔŋ, mɔ nɔ nə kə́ mʉ̀ʉ nə fyii-ɔ inchəŋ ndə mənyɔ̀ʼ tʉ bii te ntɛ ŋkwaaNyii imɔʼ ndə bʉʼʉ bənchəŋ kie, bɔŋ nduɔ, mɔ nɔ nyíɛ mbɔ mɔ nɔ kie ndə mənyɔ̀ʼ fʉ̀ʉtə bii mbɔ b̈ii gwúu byuʼu ndə mənyíɛ mbɔ b̈ii kyʉ̀hə mbʉ məmɔʼfyiihə-ʉʼʉ ndəŋ Nyii, ndə bə kə kɔ́ tʉ bʉə-Nyii ndə məbɛ vɛʼ mɔʼɔ tə mbi nə lìʼ. 4 Bʉʼka bʉəbɛʼbə ndə məchimbi-yʉə gòʼ təmə kə́ kɔ́ kuŋhə tʉ Nyii fɛ, bɔ̂ŋ bɔŋleʼ tɛ́ŋ Jiso Klai ndə ɔ bɛ haʼ mbyu Tiekətʉ-yʉʼʉ imɔʼ leʼnə mbyu Tiefɔʼ-yʉʼʉ imɔʼ, nɔʼ nyáʼtə sʉ́ʉ mu bʉʼʉ, bʉə ndə bɔ̂ŋ tʉʼ gə́ŋtə nə ntəŋ te buuŋjyu Nyii-yʉʼʉ, mbɔ i chʉʼ kɔ́ fia tʉ bɔŋ ndə mə-kə́-chìi nu-nyàatəŋwɔŋ-bə-ʉə. Bə nɔ kə nyɔ̀ʼ mbɔ bə bu chʉ̀ə ŋkwɛ-yʉə bʉəbʉə lʉ̀ hə ŋgʉʼŋgʉʼhə.

5 Buŋ ndə bii kínə yɔ̄ŋ-yə, mɔ nɔ tʉʼ kʉ́ʉ kwɛ́nə tʉ bii, nə ntɛ ndə Tiekətʉ*1:5 Bəbɛʼbəŋwɔʼnə kəŋgie-Gili nɔ nyɔ̀ʼ yie Jiso fɛ̄ŋ. kə kwáa tʉ-bʉə-Isilɛ-kə fyúhə bɔŋ mu Iji, bɔŋ bʉ̀nə bʉ́əhə bʉə ndə bɔ̂ŋ kə gòʼ təmə bɛ́ŋ ɔŋ fɛ. 6 B̈ii kə́ kwɛ́nə bʉəntəŋNyii ndə bɔ̂ŋ kə yíɛ́ʼ yʉə-yə bìa ndə yəŋkə ndə bɔ̂ŋ kə kie ndə məsɔ́ʼ lìʼ chɔ, mɛ̀ʼtə yʉə-yə yəŋkə ndə bɔ̂ŋ kə chí chɔ. Bə nɔʼ kɔ́ʼtə bɔŋ nə bəchaŋ təmə i mə nə chə̀nə fɛ, mu fɔŋ kənjəŋ, kəyəŋ ndə Nyii yá bɔŋ tʉ́ʼ chɔ kə́ chyìi fɔŋ kəchî kwɛ̀ fɛʼɛ-ghɔ̄. 7 B̈ii kə́ kwɛ́nə bʉə-Sodɔŋ ghɔŋbə bʉə-Gomola leʼnə yəŋkwɛʼtəŋbə ndə i kə bɛ mbʉə bɔŋ ndə bɔ̂ŋ kə kɔ́ ŋwɔŋtə-ʉə ghɔ ndə nu-bəsəŋ-bə ghɔŋbə nu-nyàatəŋwɔŋ-bə. Ŋgwɔŋ-yʉə nɔ bɛ viʼi ndə i mə nə lʉ́əŋnə fɛ ndə bɔ̂ŋ bu nyíɛ ŋgʉəʼ muŋgɔ ndə məsúuhə shʉ bʉə bənchəŋ.

8 Nɔ bɛ haʼ nɔ, ndə bʉə-bɔ̄ŋ ghɔ yʉ́əʼnə bə ndəŋ njəŋhə-ʉə, bʉ́əhə ŋwɔŋtə-ʉə, tɛ́ŋ ghʉəʼ-Tiekətʉ-kə bɔŋleʼ bʉ́əhə yie bʉəntəŋNyii ndə bɔ̂ŋ kie məgʉ́ə. 9 Bɔŋ buŋ Maake ndə ɔ kə bɛ wontəŋkwɛʼtəŋNyii kə́ chìi nɔ fɛ, ndʉʉ ndə ɔ kə́ shyùunə ŋkwu-Mushi-kə ghɔŋ Debulu, túŋ bəŋʉʉ te wo ndə ɔ bu gɛ̀ nə yɔŋ, təmə fyii-i tə́ŋ ndə məmɔ̀ʼ nukə kətʉ Debulu mbɔ ɔ nɔʼ gìe ŋgie-bʉə-kə fɛ. Ɔ bɔŋ ghɔŋ bə mbɔ, "T̈iekətʉ sɔ́ʼ a." 10 Bɔŋ bʉə-bɔ̄ŋ kə́ bʉ́əhə nubə inchəŋ ndə bɔ̂ŋ gòʼ təmə kínə fɛ. Nə nyaahə, bɔ̂ŋ nɔ tʉʼ fɔ̀ʼ bə haʼ nubə ndə mbʉəhə-ʉə tʉʼ kʉ́ʉ, kə́ bɛ nubə ndə i bu bʉ́əhə bɔŋ. 11 Bɔŋ ŋgʉəʼ ndəŋ bɔŋ! Bʉʼka bɔ̂ŋ nɔ lʉ̀ fia ndə Kɛɛŋ kə tíŋ hə chɔ, kɔ́ ŋwɔŋtə-ʉə ndəŋ nu-kyʉə-bə ndə Balaŋ ndə məfə́ʼhə bʉə, ndə Kola, bɔ̂ŋ bu kwú bɛ́ bʉʼka kwɛ̀ŋhə.

12 Ndʉʉ ndə bʉə-bɔ̄ŋ tʉʼ chə̀ŋtə bii bɔŋ ndə yəŋ-nchəŋtə-bə ndə mənʉ́ətə ŋkʉ̂ʉ Tiekətʉ nɔ, bɔ̂ŋ bɛ nə ŋgoʼ ndə i bɛ mu muu ndə bəkɔ buukə gwè bə̀ŋtə ndəŋ ghɔ. Ndʉʉ ndə bii bɔŋ tʉʼ yú mɔʼɔ nɔ, fyiihə-ʉə tə́ŋ təmə bɔ̂ŋ kə́ kie tʉvyiikə fɛ, nə bənchyii bənaʼa ndə bɔ̂ŋ tʉʼ lɛ́nə bə haʼ ŋwɔŋtə-ʉə. Bɔ̂ŋ nɔ bɛ nə mbɔʼ-njəŋtə-bə ndə fʉʉkə tʉʼ bɛ̀ʼ təmə wyuu chɔ fɛ, byuunɔ kə́ bɛ nə tyʉbə təmə ntɔŋmə chɔ fɛ ndə ndʉʉ kwɛ̀tə məntɔŋ. Bɔ̂ŋ nɔ bɛ nə tyʉbə ndə i nɔʼ sòʼnə ndəŋ ghûutə-ʉə tʉ i nɔʼ kwútə. 13 Bɔ̂ŋ nɔ bɛ nə lɛɛŋhə-muu-shʉ́əshʉ́ə-bə, nu-kətʉvyiinə-bə ndə bɔ̂ŋ tʉʼ fɔ̀ʼ, kə́ bɛ nə lukə ndə mbʉ bəlɛɛŋhə tʉʼ fyùʼ. Bɔ̂ŋ nɔ bɛ nə bəlɔʼɔ jyʉ́ʉnə. Nyii nɔʼ shʉ̀tə yəŋkə-ʉə tʉ́ʼ mu fɔŋ kənjəŋ təmə liʼ-i ghɔ fɛ.

14 Ɛnɔ, ndə ɔ kə bɛ vaavaa Adaŋ ndə yuhəbə ntʉʼʉ nɔ nə téʼ ntəŋ ndə i kə gwè hə kəghɔ-Nyii te bʉə-ɔ̄ŋ mbɔ,

"B̈ii nyíɛ! Mbʉ Tiekətʉ nɔ tʉʼ gwè

ghɔŋbə wuŋ ŋkɔŋ-bʉə-bi-hə ndə bɔ̂ŋ bɛ ŋkʉʉ,

15 ndə məgwè chʉ̀ə ŋkwɛ bʉə bənchəŋ.

Ɔ bu chʉ̀ə ŋkwɛ bʉəbʉə tʉ bʉə bənchəŋ ndə bɔŋ gòʼ təmə kə́ kɔ́ kuŋhə tʉ Nyii fɛ ndə fɔʼ-bʉəbʉə-tə inchəŋ

ndə bɔ̂ŋ nɔʼ fɔ̀ʼ,

leʼnə ŋgie-bətʉgyʉəʼ-bə ndə bʉə-bʉ̂ʼʉ, ndə bɔ̂ŋ gòʼ təmə kínə Nyii fɛ, nɔʼ kwə́ʼ bʉ́əhə yie-Nyii."

16 Bʉə-bɔ̄ŋ nɔ gòʼ haʼ lúŋtəlúŋtə bɔŋleʼ kie nukə ndə məmɔ̀ʼ sê te bəbɛʼbʉə, kə́ fɔ̀ʼ nu-bʉəbʉə-bə ndə mbʉəhə-ʉə tʉʼ gìe tʉ bɔŋ. B̃ɔ̂ŋ nɔ ŋàʼtə te ŋwɔŋtə-ʉə, kə́ gìe ŋgie-ndoʼtə-bə ndə məfə́ʼhə bʉə chʉʼ kie fiatə-ʉə.

B̈ii yá fyii

17 Mbʉətə bətieŋkɔŋ-bɔŋ, b̈ii kwɛ́nə nukə ndə bəlɔntəŋ Jiso Klai Tiekətʉ-yʉʼʉ kə shyíi bii. 18 Bɔ̂ŋ nɔ nə ghɔ̀ŋ tʉ bii mbɔ, "Kʉ̂ʉ bɛ ndə ndyiʼtə-bəchî-bə nɔ, bʉə dʉ̀ʉhə bʉə gwè, kə́ fɔ̀ʼ nubə ndə fyiihə-ʉə kʉ̀ʉ təmə i kə́ kɔ́ kuŋhə tʉ Nyii fɛ." 19 Nɔ bɛ bʉə-bɔ̄ŋ ndə bɔ̂ŋ tʉʼ gwè nə ŋkʉʉŋkʉʉ mu bʉə ndə bɔ̂ŋ nɔʼ bɛ́ŋ Nyii, kə́ fɔ̀ʼ nubə ndə mbɔʼ-mbʉə-yʉə tʉʼ bíʼtə, təmə bɔ̂ŋ kie LyʉʉhəNyiikə mu mbʉə-bɔŋ fɛ.

20 Bɔŋ mbəŋtə-ii, mbʉətə bətieŋkɔŋ-bɔŋ, b̈ii kə́ bɔ́ ŋwɔŋ-yii mu mbʉ fɔŋ fia ndə i bɛ ŋkʉʉ ndə məmɔʼfyiihə-ii ndəŋ Nyii, kə́ gháaNyii nə ghʉəʼ-kəLyʉʉhəNyii-kə, 21 kə́ tʉ́ʼ ŋwɔŋ-yii mu ŋkʉ̂ʉ-Nyii, ndə bii tʉʼ chyìi Tiekətʉ-yʉʼʉ Jiso Klai ndə mədʉ̀ʼ tʉvyiikə-i, ndə i bu kɔ́ məchímbi tʉ bii təmə liʼ-i ghɔ fɛ. 22 B̈ii bɔŋ kie tʉvyiikə tʉ bʉə ndə bɔ̂ŋ bíe jínəjínə. 23 B̈ii kwáa bəbɛʼbʉə ndə məjɔ̀ bɔŋ mu viʼi, dʉ̀ʼ tʉvyiikə tʉ bəbɛʼbʉə nə faakə tə buŋ kə́ bàa nu-bʉ̂ʼʉ-bə ndə i nɔʼ bʉ́əhə bɔŋ.

GháaNyii nə lyuu ndə mələ̀ʼtə ɔŋ

24 Nduɔ, b̈ʉʼʉ kɔ́ kuŋhə tʉ Nyii ndə ɔ kie ghʉəʼkə ndə məyá bii tʉ́ʼ bʉʼka məgwù, bɔŋ ndə mə-leʼ-gwè nə bii mu məgʉə-e təmə kwɔtəkə mbʉə-bii fɛ, nə fɔŋ tʉʉjyu. 25 B̈ʉʼʉ kɔ́ kuŋhə tʉ mbyu Nyii ndə ɔ bɛ imɔʼ, tʉ Ŋkwaa-yʉʼʉ, tíŋ hə bɔ̌ŋ Jiso Klai Tiekətʉ-yʉʼʉ, məgʉ́ə, kuŋhə, ghʉəʼkə leʼnə ghʉəʼkə ndə məgìe hə kətʉ fɔbə inchəŋ, b̈ɛ tʉ ɔŋ, lʉ̀ hə bəshʉ mbi buŋ nə chʉ́ʉhə tə gwè dàa nduɔ gɛ̀ nə shʉbə təmə liʼ-i ghɔ fɛ! Ï bɛ haʼ nɔ.