1 Ŋwɔʼnə-ɔ̄ŋ nɔ bɛ ŋwɔʼnə ndə i tʉʼ dʉ̀ʼ nubə ndə Jiso Klai kə kɛ̀ʼ, ndə Nyii kə kɔ́ tʉ ɔŋ ndə mədʉ̀ʼ tʉ vâafɔʼɔ-bi, kə́ bɛ nubə ndə i kie ndə mə-chʉʼ-fyúfyú sê. Jiso Klai nɔ kə chìi Jɔŋ vaafɔ̀ʼ-ɛ kínə nubə-ɔ̄ŋ ndʉʉ ndə ɔ kə tə́ŋ wontəŋ-ɛŋ tʉ ɔŋ, 2 Jɔŋ núhə nubə inchəŋ ndə ɔ nɔʼ kə nyíɛ. Nɔ bɛ nubə te ntəŋ ndə i gwè hə kəghɔ-Nyii leʼnə shʉəŋ ndə Jiso Klai kə kɛ̀ʼ.

3 N̈yii bìʼ wo ndə ɔ tíi ŋwɔʼnə-ɔ̄ŋ ndə i tʉʼ fʉ̀ʼtə nubə ndə i bu yi fyú, bìʼ bʉə ndə bɔ̂ŋ yʉ́ bɔŋleʼ tʉ́ʼ nubə ndə bə nyɔ̀ʼ muŋgɔ, bʉʼka ŋgwɔʼmbi nɔʼ kə́ŋhə.

4 Nɔ nyɔ̀ʼ Jɔŋ nyɔ̀ʼ ŋwɔʼnə-ɔ̄ŋ tʉ bəchɔshi təkwiitia ndə i bɛ mu bie Esia.

Tə buuŋjyu ghɔŋbə fyiighʉ́ənə bɛ yii-yə ndə i lɔ̀ hə kəghɔ-Nyii ndə ɔ bɛ, ndə ɔ kə fəŋ bɛ, bɔŋ-kə́-leʼ bɛ ndə məgwè, bɔŋleʼ lɔ̀ hə kəghɔ-lyʉʉhəbə təkwiitia ndə bɔ̂ŋ tə́nə bəshʉ kəyetə-ɔŋ, 5 bɔŋleʼ lɔ̀ hə kəghɔ-Jiso Klai ndə ɔ bɛ wo ndə ɔ kə fʉ̀ʼtə nubə-ɔ̄ŋ nə shʉəŋ, ndə ɔ chàa bʉə bənchəŋ ndə bɔ̂ŋ bu nə kwú bʉ̀nə kóʼ,* ndə ɔ bɔŋleʼ bɛ Fɔŋ ndə ɔ tʉʼ sɔ́ʼ bəfɔŋ bənchəŋ kəwʉʉnəmbi-fɛ̄ŋ.

Tə məgʉ́ə nchəŋnchəŋ gɛ̀ tʉ ɔŋ ndə ɔ kʉ̀ʉ bʉʼʉ, nɔʼ kə chʉ̀ʼ tʉkə-ʉʼʉ ndəŋ bʉ̂ʼtə-ʉʼʉ nə fɔbʉəkə-i, 6 nɔʼ chìi bʉʼʉ, ndə məbɛ bʉə-bi ndə ɔ tʉʼ sɔ́ʼ bɔŋleʼ chìi bʉʼʉ bɛ bʉə ndə bʉʼʉ tʉʼ fɛ̀ʼndɛŋ tʉ Nyii mbʉ Tie-e. Tə məgʉ́ə nchəŋnchəŋ ghɔŋbə ghʉəʼkə gɛ̀ tʉ ɔŋ təmə liʼ-i ghɔ fɛ. Ï bɛ haʼ nɔ.

7 B̈ii nyíɛ! Ɔ tʉʼ sʉ̀ʉnə hə mu kəmbɔʼ.

Wotəmiyɔŋ bu nyíɛ ɔŋ,

tə buŋ kɔmə bʉə ndə bɔ̂ŋ kə shùɔ ŋkyii-i.

Bie-bʉə-hə bənchəŋ mu kəwʉʉnəmbi

bu dùʼ nə sɔ̀tʉkə bʉʼka mbəŋ-ɛŋ.

Əŋ! Ï bɛ haʼ nɔ.

8 Nyii Tiekətʉ nɔ ghɔ̀ŋ mbɔ, "Mɔ nɔ bɛ fəŋ bɔŋ-kə́-leʼ bɛ ndyiʼtəkə. Mɔ nɔ bɛ wo ndə ɔ bɛ, ndə ɔ kə fəŋ bɛ, ndə ɔ bɛ ndə məgwè, kə́ bɛ Wo ndə mɔ kie ghʉəʼkə inchəŋ."

9 Mbəŋ ɔŋ, Jɔŋ, nɔ bɛ liŋ-yii ndə mɔ nɔʼ fúu ghɔkə bʉʼʉ ndə mənyíɛ ŋgʉəʼ, ndə məbɛ mu Sɔ́ʼ-Nyii bɔŋ ndə mə-leʼ-yá fyii lyʉ̀ʉtə́nə ndə bʉʼʉ tʉʼ gɛ̀ hə bɔ̌ŋ Jiso. Bə nɔ kə jə̀ŋ mɔ kɔ́ ndəŋ kwɔŋ ntəŋntəŋ muu kəyəŋ ndə bə tíi nə Batmɔ bʉʼka ŋgieNyiikə ndə mɔ kə kə́ lɔ̀ʼ bɔŋleʼ bʉʼka nubə ndə mɔ kə kə́ kwə́ʼ te Jiso. 10 Nɔ kə bɛ ndə chî-Tiekətʉ-kə LyʉʉhəNyiikə jyʉ́ʉhə mɔ, mɔ yʉ́ gyʉʉ dədə ndə i gìe hə bɔ̌ŋ mɔ, nə gyʉəʼə-vaa, 11 kə́ ghɔ̀ŋ mbɔ, "Nyɔ̀ʼ nukə ndə a nyíɛ mu ŋwɔʼnə, tə́ŋ kɔ́ tʉ bəchɔshi təkwiitia ndə i bɛ mu yəŋkwɛʼtəŋ-bɔ̄ŋ, Ɛfɛso, Simana, Bɛgamu, Tiatila, Sadi, Filadefia leʼnə Laodesia."

12 Mɔ kíahə ŋwɔŋ-ɔŋ ndə mənyíɛ wo ndə ɔ kə kə́ kwə́ʼ tʉ mɔ, nyíɛ fɔbə ndə bə mɔ̀ʼtə kɛʼtə ndəŋ ghɔ təkwiitia bə chìi nə goo. 13 Ntəŋntəŋ bəfɔ-ghɔ̄ ndə bə mɔ̀ʼ kɛʼtə ndəŋ ghɔ le, wobɛʼ kə́ tə́nə chɔ nə vaa-woməsʉʉ, mɔ̀ʼ ndyi mbʉə-ɔ, i shíʼ tə gɛ̀ dàa ndəŋ wukə-i leʼ kɔ́ʼ kwɔkə ghɔʼ-ɔ ndə bə chìi nə goo. 14 Nyu-kətʉ-hə-i fyûʼ tə bɛ nə nyu-binjyʉʉ-hə bɔŋleʼ fyûʼ tə bɛ nə mbɔʼ-yuo-kə, shʉ-i kə́ lèʼnə nə viʼi kwíinə. 15 Wukə-i kə́ lèʼnə nə təŋ-ghɔʼ-kə ndə bə chéʼ mu kyʉ, gyʉʉ-i kə́ gìe nə gyʉʉ muu buŋmbi ndə i tʉʼ gwù nə ghʉəʼkə. 16 Ɔ yá bəlɔʼɔ təkwiitia kəghɔ-ɔ kwiimɔʼnə, setə-chyʉ́ʉchyʉ́ʉ-kə, ndə i kie tʉbə ibûu, kə́ fyú hə chu-ɔ. Mbe-shʉ-i kə́ lèʼnə ndə chichi ndə i nɔʼ tə́ŋ beʼ.

17 Ndʉʉ ndə mɔ nyíɛ ɔŋ, mɔ gwù sê bəshʉ ɔ nə wo ndə ɔ nɔʼ kwú. Ɔ bɔŋ mɔ̀ʼ kwiimɔʼnə-i ndəŋ mɔ ghɔ̀ŋ mbɔ, "Kə a mə fàa fɛ, mɔ nɔ bɛ Fəŋ, bɔŋ-kə́-leʼ bɛ Ndyiʼtəkə, 18 kə́ bɛ wo ndə mɔ bɛ ŋɛnə. Mɔ nɔʼ kə kwú, bɔŋ nyíɛ, mɔ nɔ bɛ ŋɛnə nduɔ, təmə bieleʼ nə kwú fɛ, mɔ bɔŋleʼ kie ghʉəʼkə kəghɔ-mɔ ndə məgìe hə kətʉ Kwú ghɔŋbə Lɔʼɔ-bəŊkwubʉə.

19 "Nɔ ndʉʉmɛ, nyɔ̀ʼ nubə ndə a kə nyíɛ, nubə ndə i bɛ nduɔ, ghɔŋbə nubə ndə i bu yi sɛŋ fyú bɔ̌ŋ yɔ̄ŋ-yə. 20 Nɔ bɛ nukə nɔ ndə mbʉ ŋguu bɛ yɔŋ ndə i líi bɔ̌ŋ mbʉ bəlɔʼɔ təkwiitia ndə a kə nyíɛ kəghɔ-mɔ kwiimɔʼnə ghɔŋbə fɔbə təkwiitia ndə bə mɔ̀ʼtə kɛʼtə ndəŋ ghɔ ndə bə chìi nə goo le. Mbʉ bəlɔʼɔ təkwiitia nɔ bɛ bʉəntəŋNyii ndə bɔ̂ŋ bɛ tʉ mbʉ bəchɔshi təkwiitia, mbʉ bəfɔ mɔ̀ʼ təkɛʼ təkwiitia, kə́ bɛ mbʉ bəchɔshi təkwiitia."