1 Ndʉʉmɛ, mɔ nyíɛ ndə mbʉ Vaabinjyʉʉ bɔ̀ʼ fəŋ mʉə mu mbʉ bəmʉə təkwiitia bɔŋleʼ yʉ́ mbyu kəfɔ mu fɔ-ŋɛnə-bə-īŋ kwi le, bɔ̀ʼtə nə gyʉʉ dədə nə fuu-yuo mbɔ, "Gwè!" 2 Mɔ lɛ́nə, nyíɛ nyaa-bəkatə kəfyuʼ. Wo ndə ɔ dùʼ ndəŋ ghɔ kie dùu-ŋwɛŋ-kə kəghɔ-ɔ, bə kɔ́ bɛnə tʉ ɔŋ. Ɔ tə́ŋ fyú gwè nə wo ndə ɔ nɔʼ mɔ̀ʼ chɔ̂ tə yú, bɔŋ-bu-leʼ bìʼ mɔ̀ʼ yú.

3 Ndʉʉ ndə ɔ kə bɔ̀ʼ ibɛʼ-yə mʉə ndə vɛʼ bûu nduɔ, mɔ yʉ́ ndə biitəkə mu fɔ-ŋɛnə-bə-īŋ kwi le ghɔ̀ŋ mbɔ, "Gwè!" 4 Ibɛʼ-yə nyaa-bəkatə fyú gwè bùu mbuu-fyûʼ-kə. Wo ndə ɔ dùʼ ndəŋ ghɔ, bə kɔ́ fia tʉ ɔŋ ndə məlʉ̀ fyiighʉ́ənə kəchisê, mbɔ bʉəməsʉʉ chʉʼ kə́ yítə ŋwɔŋtə-ʉə nə chɔ̂. Bə bɔŋleʼ kɔ́ lɔkɔʼ kəsetə tʉ ɔŋ.

5 Ndʉʉ ndə ɔ bɔ̀ʼ ibɛʼ-yə mbəʼ-mʉə-kə ndə vɛʼ tia, mɔ yʉ́ ndə ibɛʼ-yə bìitə bɔ̌ŋ ghɔ vɛʼ bûu mu fɔ-ŋɛnə-bə-īŋ le ghɔ̀ŋ mbɔ, "Gwè!" Mɔ bɔŋleʼ lɛ́nə, nyíɛ nyaa-bəkatə kəfʉəŋ. Wo ndə ɔ dùʼ ndəŋ ghɔ yá fɔkə kəghɔ-ɔ ndə bə lʉ̀ fʉ̀ʼ kəfɔ ndəŋ ghɔ mbyuhə ibûu. 6 Mɔ yʉ́ fɔbɛʼkə ndə i gìe nə gyʉʉ, kə́ gwè hə mu fɔ-ŋɛnə-bə-īŋ kwi le kə́ ghɔ̀ŋ mbɔ, "Mbyu ŋke lɛshi nɔ bɛ kyʉə fɔʼɔ kəchîmbi, bəŋke-suu itia kə́ bɛ kyʉə fɔʼɔ kəchîmbi. Kə a mə bʉ́əhə tyʉ-oli-bə ndə b̃ə chìi ŋgwomə chɔ ghɔŋbə tyʉ-geleb-bə ndə b̃ə chìi ndʉʼmə chɔ fɛ."

7 Ndʉʉmɛ, mbʉ Vaabinjyʉʉ bɔ̀ʼ ibɛʼ-yə mbəʼ-mʉə-kə ndə vɛʼ kwi nduɔ, mɔ yʉ́ ndə mbyu kəfɔ ndə ɔ bìitə bɔ̌ŋ ghɔ vɛʼ tia mu fɔ-ŋɛnə-bə-īŋ kwi le ghɔ̀ŋ mbɔ, "Gwè!" 8 Mɔ lɛ́nə nyíɛ njəŋtə-nyaa-bəkatə-kə ndə nyɔʼkə-i bɛ nə ŋkɔ, wo ndə ɔ dùʼ ndəŋ ghɔ, yie-e kə́ bɛ Kwú, Lɔʼɔ-bəŊkwubʉə kə́ gwè hə bɔ̌ŋ ɔŋ. Bɔ̂ŋ kə́ bʉ́ kətʉ yəŋkə imɔʼ mu yəŋbə kwi ndə bə gyʉ̀əhə wʉʉnəmbikə chɔ, ndə məyítə bʉə nə chɔ̂, nə chyʉʉ, nə yɔʼkə leʼnə nyaa-muŋkɔ-hə ndə bɔ̂ŋ bɛ kəchisê.

9 Ndʉʉ ndə mbʉ Vaabinjyʉʉ bɔ̀ʼ ibɛʼ-yə mʉə kə́ bɛ vɛʼ taa nduɔ, mɔ nyíɛ lyʉʉhə-bʉə-bə tiɛŋ kəyəŋfɛ̀ʼndɛŋNyii kə́ bɛ bʉə ndə bə kə gwìatə bɔŋ bʉʼka ŋgieNyiikə ghɔŋbə məlyʉ̀ʉtə́nə ndə bɔ̂ŋ kə tə́nə ndə məlɔ̀ʼ ŋgieNyiikə. 10 Bɔ̂ŋ tíi nə gyʉʉ dədə mbɔ, "Tiekətʉ, ndə a tʉʼ bʉ́ kətʉ wʉʉnəmbikə inchəŋ, ndə a bɛ ŋkʉʉ bɔŋ-kə́-leʼ bɛ wo gìe shʉəŋ, i bu chí ntyʉʉ təka, a buŋ kwɛ̀ fɛʼɛ bʉə-kəchisê tyú bʉ̂ʼʉ ndə bɔ̂ŋ kə chìi ndə məyítə baʼa?" 11 Wotəmiyɔŋ mu bɔŋ, bə nɔ kə kɔ́ ndyi-kəfyuʼ-hə tʉ ɔŋ, shyíi bɔŋ mbɔ bɔ̂ŋ la bu dùʼ káa tə kwìhə, tə b̈ə yi yítə bəbɛʼvâafɔʼɔ ndə ghɔŋ bɔ̂ŋ kə́ fɔ̀ʼ mɔʼɔ ndə bɛ bəliŋ-bʉə, ndə bə kie ndə məyítə bɔŋ haʼ ndə bə kə yítə bɔŋ ghɔ le.

12 Ndʉʉ ndə mbʉ Vaabinjyʉʉ bɔ̀ʼ ibɛʼ-yə mʉə kə́ bɛ vɛʼ ntʉʼʉ nduɔ, mɔ lɛ́nə nyíɛ, fɔŋ məŋɛ̀nə ndə chisêkə ŋɛ̀nə, chichi kíahə kəfʉəŋ ndə ndyi lí kwú, chisuu inchəŋ kíahə bɛ nə fɔbʉəkə, 13 bəlɔʼɔ-yuo chóʼtə gwùtə kəchisê, nə ntɔŋ-fik-mə ndə i gòʼ təmə nɔʼ tə̀ŋ fɛ chóʼtə ndəŋ tyʉkə gwùtə sê ndə ndʉʉ ndə fʉʉ-shʉ́əshʉ́ə-kə gwè le. 14 Yuo gyʉ̀əhə kíatə nə via-ŋwɔʼnə-kə kíatə le, bə chóʼtə kwɔŋhə inchəŋ, leʼnə kwɔŋhə ndə i tə́nə ntəŋntəŋ muu, ndə yəŋbə-ʉə. 15 Ndʉʉmɛ, bəfɔŋ kəwʉʉnəmbi, bʉəkwɛʼtəŋ lɔʼɔ, bəntəŋbəshʉ bəsɔge, bʉə-kəfʉʼ, bʉə shʉ́əshʉ́ə, wotəmiyɔŋ, bʉə ndə bɔ̂ŋ bɛ fʉəhə leʼnə bʉə ndə bɔ̂ŋ gòʼ təmə bɛ fʉəhə fɛ, gɛ̀ lə̀ŋ ŋwɔŋtə-ʉə mu mbyuʼhə ndə i bɛ ndəŋ ŋgoʼhə leʼnə tɔʼ-ŋgoʼ-hə ndə i bɛ kwɔŋhə, 16 kə́ tíitə tʉ kwɔŋhə ghɔŋbə ŋgoʼhə mbɔ, "B̈ii gwùtə ndəŋ baʼa kwóhə baʼa shʉ-wo ndə ɔ dùʼ ndəŋ mbʉ kəyetə leʼnə tʉʉbʉə mbʉ Vaabinjyʉʉ, 17 bʉʼka chî-tʉʉbʉəkwɛʼtəŋkə-ʉə-ghɔ̄-kə nɔʼ gwè, bɛ nda ndə bəkɔ ɔ tə́nə?"