1 Ndʉʉmɛ, mɔ nyíɛ nyaa bʉəbʉə, ɔ kə́ kóʼ mu muukwɛʼtəŋmə. Ɔ kie ndʉʉhə wuŋ leʼnə tʉbə təkwiitia, nə bɛnətə wuŋ ndəŋ ndʉʉhə-i wuŋ. Ndəŋ tʉkə-i təmiyɔŋ, i kie yie ndə i tʉʼ dʉ̀ʉhə yie-Nyii. 2 Mbʉ nyaa bʉəbʉə ndə mɔ kə nyíɛ, ɔ kə́ bɛ nə bûu, ɔ kie bəlɔkɔʼɔ vâabəwu dədə ndə i bɛ nyuhənyuhə bɔŋleʼ chyʉ́ʉ daa bɛ nə yi-nyaabɛʼ-yə ndə yie-e bɛ bɛɛ, chu-i kə́ bɛ nə chu bʉʼ. Mbʉ dalagɔŋ kɔ́ ghʉəʼkə tʉ mbʉ nyaa, kɔ́ yetəkə-i bɔŋleʼ kɔ́ fɔŋ kəghʉəʼ tʉ ɔŋ ndə məsɔ́ʼ bʉə.Nɔ bɛ nyaa nɔ bə tíi nə bɛɛ

3 I nɔ kə bɛ fi nə bə nɔʼ kə lə́ŋhə mbyu kətʉ-ebɛʼ ndə ntɛ ndə bəkɔ ɔ kwú, bɔŋ tʉ mbʉ kələŋ nɔʼ yə́ŋ. I chàa wʉʉnəmbikə bənchəŋ, bɔ̂ŋ gɛ̀ hə bɔ̌ŋ mbʉ nyaa bʉəbʉə, 4 bɔŋleʼ lə̀ʼtə mbʉ dalagɔŋ, bʉʼka ɔ nɔʼ kə kɔ́ ghʉəʼkə-i tʉ mbʉ nyaa. Bɔ̂ŋ bɔŋleʼ kə́ lə̀ʼtə mbʉ nyaa bʉəbʉə, kə́ ghɔ̀ŋ mbɔ, "Bɛ nda ndə mbʉ nyaa bʉəbʉə, bɔŋ bɛ nda ndə bəkɔ ɔ gwúu byuʼu ghɔŋ ɔŋ?"

5 Bə kɔ́ ghʉəʼkə tʉ mbʉ nyaa bʉəbʉə ndə mə-kə́-kwə́ʼ ŋgie-dʉ̀ʼ-ŋwɔŋ-bə ndə i tʉʼ dʉ̀ʉhə yie-Nyii. Bə bɔŋleʼ kɔ́ ghʉəʼkə tʉ ɔŋ ndə məsɔ́ʼ ndə bəchi njuɔ bûu nə wuŋ kwi. 6 Ɔ ŋɔ́ʼhə chu-i kə́ kwə́ʼ ŋgiebə ndə i tʉʼ dʉ̀ʉhə Nyii, kə́ dʉ̀ʉhə yie-e leʼnə yəŋ-chí-kə-i kə́ bɛ bʉə ndə bɔ̂ŋ tʉʼ chí yuo. 7 Bə nɔ kə leʼ kɔ́ ghʉəʼkə tʉ ɔŋ ndə məmɔ̀ʼ bʉə-Nyii nə chɔ̂, ghɔ́ʼ bɔŋ. Bə bɔŋleʼ kɔ́ ghʉəʼkə ndə məsɔ́ʼ tʉ ɔŋ ndə məgìe kətʉ lɔŋbə inchəŋ, bie-bʉə-hə, ŋgie-bətə̂ŋ-bə leʼnə lɔʼ-bətə̂ŋ-tə. 8 Bʉə bənchəŋ ndə bɔŋ bɛ kəchisê bu lə̀ʼtə ɔŋ, wotəmiyɔŋ ndə bə kə gòʼ təmə nyɔ̀ʼ yie-e mu ŋwɔʼnə məchímbi lʉ̀ hə ndəŋ ŋgwunə-mbi fɛ. Ŋwɔʼnə-ɔ̄ŋ nɔ bɛ yi-mbʉ-Vaabinjyʉʉ-yə ndə bə kə bɛ ndə məgwìa ɔ.

9 Kaʼ wo kie tyunəkə, ɔ̈ yʉ́.

10 Kaʼ wo kə kie ndə məgɛ̀ chaŋ,

bə bu lʉ̀ ɔ ndə wo-njaa-chaŋ

kaʼ bə kə kie ndə məyí wo nə setəkə,

təmə ɔ bu kwú ndəŋ setəkə.

Yɔ̄ŋ-yə nɔ dʉ̀ʼ mbɔ b̈ʉə-Nyii yá fyii, lyʉ̀ʉtə́nə ndʉʉ ndə bɔ̂ŋ tʉʼ nyíɛ ŋgʉəʼ, bɔŋleʼ kə́ mɔ̀ʼfyiihə-ʉə ndəŋ Nyii gɛ̀gɛ̀.

11 Ndʉʉmɛ, mɔ nyíɛ ibɛʼ-yə nyaa bʉəbʉə ndə ɔ kóʼ, fyú gwè hə mu sê. Ɔ kie ndʉʉhə ibûu ndə yi-binjyʉʉ-yə, kə́ kwə́ʼ nə dalagɔŋ. 12 Ɔ fyúhə ntɛ kəghʉəʼ inchəŋ ndə fəŋ nyaa bʉəbʉə kə kie, bəshʉ ɔ, chìi chisêkə ghɔŋbə bʉə ndə bɔ̂ŋ bɛ chɔ kə́ lə̀ʼtə fəŋ nyaa-ɛ ndə bəkɔ lɔkɔʼ kədyʉʼ-i-yīŋ bìa yí ɔ le nɔʼ kə yə́ŋ. 13 Ɔ chìi bəfɔŋ kəcheʼ, ɔ buŋ chìi tə viʼi shíʼ hə yuo gwè kəchisê bəshʉ bʉə. 14 Ndə mbʉ bəcheʼ ndə bə kə mɛ̀ʼtə ɔ fɔ̀ʼ bəshʉ mbʉ fəŋ nyaa bʉəbʉə-e, i fə́ʼhə bʉə ndə bɔ̂ŋ kə bɛ kəchisê, kə́ shyíi bɔŋ mbɔ b̈ɔ̂ŋ la chìi mbʉ finə nyaa ndə mə-kə́-kɔ́ kuŋhə tʉ ɔŋ. Nɔ bɛ nyaa-bʉəbʉə-e ndə bə kə lə́ŋhə ɔŋ nə setəkə ɔ bɔŋleʼ bìi le. 15 Bə mɛ̀ʼtə mbʉ biitə-nyaa-bʉəbʉə-kə, ɔ kɔ́ məchímbi tʉ mbʉ kəfɔ ndə bɔ̂ŋ kə chìi ɔ fínə fəŋ nyaa le, mbɔ ɔ̈ chʉʼ kie ghʉəʼkə ndə məkwə́ʼ bɔŋleʼ chìi b̈ə yítə bʉə ndə bɔ̂ŋ bu gòʼ təmə bɛ́ŋ ndə lə̀ʼtə ɔŋ fɛ.

16 Ɔ bɔŋleʼ kwɛ̀ŋhə bʉə bənchəŋ, vâaŋgwehə, vâa-fɔŋ, wo-kəfʉʼ byuunɔ wo mbʉʼ, wo ndə ɔ gòʼ təmə bɛ fʉə fɛ ghɔŋbə wo ndə ɔ bɛ fʉə, mbɔ b̈ə chèʼ bɔŋ, kwiimɔʼnə-bɔŋ byuunɔ chutəyi-bɔŋ, 17 mbɔ wo mə leʼ nyúɔ fɔkə byuunɔ fɛ̀ŋ fɛ, tə ɔ yaʼ kie mbʉ kəcheʼ ndə i kie ndə məbɛ yie mbʉ nyaa bʉəbʉə byuunɔ ntyʉʉ shʉ-ŋwɔʼnə-tə ndə i tə́nə ndə yie-e. 18 Yɔ̄ŋ-yə nɔ tʉʼ bíʼtə mukətʉ-súunə, wo ndə ɔ kie ndaa kwɔ̀ʼtə nukə ndə mbʉ ntyʉʉ mbʉ shʉ-ŋwɔʼnə-tə ndə i tə́nə ndə yie mbʉ nyaa bʉəbʉə bɛ yɔŋ, bʉʼka ntyʉʉ mbʉ təshʉ ŋwɔʼnə nɔ bɛ yie woməsʉʉ, mbʉ ntyʉʉ-i nɔ bɛ 666.