1 Ndʉʉmɛ, lɔkɔʼ kəcheʼbɛʼ nɔ kə fyú yuo, wokebɛʼ ndyihə-i kə́ bɛ chichi, leʼnə chisuu tɔʼɔ təfʉəŋ-ɔŋ, ɔ bìa bɛnə kətʉ-ɔ ndə i kie bəlɔʼɔ chɔ njuɔ bûu nə wuŋ. 2 Ɔ kə́ bɛ gʉʼnə, kə́ gwía nə yɔʼ-Nyii-kə ndə ĩ byùu ɔ leʼnə mbʉə liŋnə ndə i gwè hə ndə məbí vaa.

3 Ibɛʼ cheʼkə bìʼ fyú yuo, mɔ kwɔnə nyíɛ lɔkɔʼ kwunəmbiimbii kəmbuubɛʼ ndə bə tíi ɔ nə dalagɔŋ*, ɔ kie tʉbə təkwiitia ghɔŋbə ndʉʉhə wuŋ nə bɛnətə təkwiitia ndəŋ mbʉ bətʉ. 4 Suukə-i dùu via-bəlɔʼɔ-kə mu bəlɔʼɔ ndə i bɛ yuo ndə kaʼ bə gyʉ̀əhə yəŋbə itia, mɛ̀ʼ bɔŋ kəchisê. Mbʉ dalagɔŋ tə́nə bəshʉ mbʉ woke ndə ɔ bɛ ndə məbí le, mbɔ ɔ chʉʼ kwó mbʉ vaa ndʉʉ ndə ɔ bí ɔ. 5 Ɔ bí vaabələŋ, kə́ bɛ vaa ndə ɔ bu sɔ́ʼ lɔʼ-bətə̂ŋ-tə inchəŋ nə ŋgwɔŋ kətəŋ. Bɔŋ bə jɔ̀ mbʉ vaa, gɛ̀ nə nɔŋ bəshʉ-Nyii ghɔŋbə yetəkə-i. 6 Mbʉ woke nyʉ́ʉ gɛ̀ kwɔŋkəyəŋnə, kəyəŋ ndə Nyii nɔʼ kə shʉ̀tə tʉ́ʼ tʉ ɔŋ, ndə bə bu yúʼ ɔ chɔ ndə chîbə 1,260.

7 Ndʉʉmɛ, chɔ̂ chʉ́ʉhə yuo. Maake ghɔŋbə yi-yə bʉəntəŋNyii kə́ gwúu byuʼu ghɔŋ mbʉ dalagɔŋ. Mbʉ dalagɔŋ ghɔŋbə yi-yə bʉəntəŋ kə́ bʉ̀nə gwúu bɔŋ, 8 bɔŋ bə ghɔ́ʼ ɔ, təmə bɔ̂ŋ leʼ kie ndə məchí yuo fɛ. 9 Bə mɛ̀ʼ mbʉ lɔkɔʼ dalagɔŋ, ɔ shíʼ gwù kəchisê, mbʉ nduɔŋ yɔ bəshʉ-ghɔ̄ ndə bə tíi ɔ nə Debulu leʼnə Sata, mbʉ wo ndə ɔ tʉʼ fə́ʼhə wʉʉnəmbikə nchəŋnchəŋ, bə chə̀ŋ ɔŋ mɛ̀ʼ kəchisê ghɔŋbə bʉəntəŋ-bi.

10 Ndʉʉmɛ, mɔ yʉ́ gyʉʉ dədə ndə i bɛ yuo kə́ ghɔ̀ŋ mbɔ,

"Nduɔ, mbʉ ŋkwaaNyii nɔʼ gwè leʼnə ghʉəʼkə-i

leʼnə Sɔ́ʼ-Nyii-yʉʼʉ

leʼnə ghʉəʼkə ndə məsɔ́ʼ ndə bɛ yi-Wo-yə ndə Nyii Kùŋ Tə́ŋ,

bʉʼka wo ndə ɔ tʉʼ mɔ̀ʼ nukə kətʉ bəliŋ-bʉʼʉ,

bə nɔʼ mɛ̀ʼ ɔŋ ɔ shíʼ gwù kəchisê,

wo ndə ɔ tʉʼ mɔ̀ʼ nukə kətʉ-bɔŋ

bəshʉ-Nyii-yʉʼʉ ndʉʉbətyuʼ ghɔŋ ndʉʉnəchî.

11 Bɔ̂ŋ nɔʼ ghɔ́ʼ ɔ bʉʼka fɔbʉə-mbʉ-Vaabinjyʉʉ-kə

ghɔŋ ŋgie-shʉəŋ-kə ndə bɔ̂ŋ tʉʼ lɔ̀ʼ,

bʉʼka bɔ̂ŋ kə́ buŋ fàa məchimbi-yʉə

mbɔ bɔ̂ŋ bu kwú fɛ.

12 Nɔ, Oo yuo kie tʉʉjyu,

leʼnə bii ndə bii tʉʼ chí chɔ!

Bɔŋ ŋgʉəʼ shʉ́əshʉ́ə bu gwè tʉ bʉə ndə bɔ̂ŋ tʉʼ chí kəchisê ghɔŋbə muukwɛʼtəŋmə,

bʉʼka Debulu nɔʼ shíʼ gwè tʉ bii nə fyiighɔ́ʼnə

bʉʼka ɔ nɔ kínə mbɔ ŋgwɔʼmbi-i nɔʼ mì."

13 Ndʉʉ ndə mbʉ dalagɔŋ nyíɛ mbɔ bə nɔʼ chə̀ŋ ɔŋ mɛ̀ʼ kəchisê, ɔ chə́ŋ bɔ̌ŋ mbʉ woke-ghɔ̄ ndə ɔ kə bí vaabələŋ le. 14 Bə bɔŋ kɔ́ ghɔnə-mbʉʼməghekwɛʼtəŋ-tə ibûu tʉ mbʉ woke-ghɔ̄ mbɔ ɔ chʉʼ tíe gɛ̀ mu kwɔŋkəyəŋnə bʉʼka mbʉ yɔ, kəyəŋ ndə bə bu yúʼ ɔ chɔ ndə ŋgʉʼhə itia nə viakə.

15 Mbʉ yɔ ghóʼ muu nə ŋgwɛŋ kɔ́ hə bɔ̌ŋ mbʉ woke-ghɔ̄, mbɔ i jɔ̀ ɔ, gɛ̀ nə nɔŋ nə ŋgwɔ shʉ́əshʉ́ə. 16 Bɔŋ chisêkə kwáa mbʉ woke-ghɔ̄, ŋɔ́ʼhə chu-i, mì mbʉ ŋgwɛŋ ndə mbʉ dalagɔŋ kə ghóʼ. 17 Tʉʉ mbʉ dalagɔŋ byʉ́ʼ daa te mbʉ woke, ɔ kóʼ gɛ̀ ndə məmɔ̀ʼ bəʼ-vâa-bi-kə nə chɔ̂, bʉə ndə bɔ̂ŋ kə́ tʉ́ʼ bəŋkahə-Nyii leʼ tə́nə ndə nubə ndə Jiso kə́ dàhə.

18 Mbʉ dalagɔŋ tə́nə ndəŋ kəsɛ ŋgwuu-muukwɛʼtəŋ.