1 Yɔ̄ŋ-yə kʉ̂ʉ tíŋ, mɔ yʉ́ fi nə nuɔ-bʉə-tə buŋmbi tʉʼ yùɔnə yuo shʉ́əshʉ́ə kə́ kwʉ̀ʉnə ghɔ̀ŋ mbɔ,

"B̈ʉʼʉ lə̀ʼtə Nyii!

Ŋkwaa, məgʉ́ə ghɔŋbə ghʉəʼkə nɔ kie Nyii-yaʼ.

2 Bʉʼka ɔ̃ nɔ chʉ̀ə ŋkwɛ nə shʉəŋ, i bɔŋleʼ kə́ bɛ ndyʉndyʉ,

Ɔ nɔʼ chʉ̀ə ŋkwɛ bʉəbʉə tʉ fɔŋ sɔkʉʉ

ndə ɔ nɔʼ bʉ́əhə chisêkə nə məgháa bəsəŋ.

Ɔ nɔʼ tyú bʉ̂ʼʉ tʉ ɔŋ ndə ɔ kə chìi ndə məyítə vâafɔʼɔ-bi."

3 Bɔ̂ŋ bìʼ tíitə, kə́ ghɔ̀ŋ mbɔ,

"B̈ʉʼʉ lə̀ʼtə Nyii!

Ndyʉʼkə ndə i tʉʼ fyú hə ndəŋ ɔŋ tʉʼ kóʼ təmə liʼ-i nə bɛ ghɔ fɛ."

4 Mbʉ bəntəŋbəshʉ ghəŋ ndə bɔ̂ŋ kie kuŋhə njuɔ kwi nə wuŋ bûu leʼnə fɔ-ŋɛnə-bə-īŋ kwi bʉ́ʉnə bəshʉ-Nyii, lə̀ʼtə ɔŋ ndə ɔ kə yétə ndəŋ kəyetə, kə́ ghɔ̀ŋ mbɔ, "Ï bɛ haʼ nɔ! B̈ʉʼʉ lə̀ʼtə Nyii!"

5 Gyʉʉ gwè hə ndəŋ mbʉ kəyetə kə́ ghɔ̀ŋ mbɔ,

"B̈ii lə̀ʼtə Nyii-yʉʼʉ,

bii bənchəŋ ndə bii bɛ vâafɔʼɔ-bi,

bii bənchəŋ ndə bii tʉʼ fàa ɔ,

lʉ̀ hə ndəŋ vâaŋgwehə tə gɛ̀ dàa ndəŋ vâa-fɔŋ."

6 Ndʉʉmɛ, mɔ yʉ́ fi nə gyʉʉ nuɔ-bʉə-tə buŋmbi ndə gyʉʉ muu buŋmbi ndə i tʉʼ gwù nə ghʉəʼkə leʼ bɛ nə gyʉʉ fuu-yuo-shʉ́əshʉ́ə-tə ndə i tʉʼ ghɔ̀ŋ mbɔ,

"B̈ʉʼʉ lə̀ʼtə Tiekətʉ!

Bʉʼka mbʉ Nyii Tiekətʉ-yʉʼʉ, ndə ɔ kie ghʉəʼkə inchəŋ, nɔ tʉʼ sɔ́ʼ.

7 Tə tʉʉtə-ʉʼʉ bʉ̀ʉ, b̈ʉʼʉ kə́ chʉ́əʼtə,

tə bʉʼʉ kɔ́ kuŋhə tʉ ɔŋ.

Bʉʼka ndʉʉ nɔʼ kʉ̀ʼnə tʉ mbʉ Vaabinjyʉʉ ndə məchìi lɔŋ,

Vi-i bɔŋ-nɔʼ-leʼ shʉ̀tə ŋwɔŋ-ɛŋ.

8 Bə bɔŋ-nɔʼ-leʼ kɔ́ vaa-mbʉətə-ndyi kəfyuʼ chɛŋ ndə i tʉʼ lèʼnə tʉ ɔŋ mbɔ ɔ mɔ̀ʼ."

Mbʉ vaa-mbʉətə-ndyi kəfyuʼ nɔ tə́nə ndə fɔʼɔ bʉə-Nyii ndə i bɛ ndyʉndyʉ.

9 Mbʉ wontəŋNyii ghɔ̀ŋ tʉ mɔ mbɔ, "Nyɔ̀ʼ yɔ̄ŋ-yə, tʉʉjyu nɔ bɛ yi-bʉə-yə ndə bə kɔ̀ʼnə bɔŋ ndə məgwè yú lɔŋ mbʉ Vaabinjyʉʉ." Ɔ ghɔ̀ŋ tʉ mɔ mbɔ, "Nɔ bɛ ŋgie-shʉəŋ-bə nɔ ndə i gwè hə kəghɔ-Nyii."

10 Ndʉʉmɛ, mɔ bʉ́ʉnə sê ndə mələ̀ʼtə ɔŋ, ɔ buŋ leʼ ghɔ̀ŋ bə tʉ mɔ mbɔ, "Kə a mə mùutə chìi nɔ fɛ! Mɔ nɔ bɛ wo-fɔ̀ʼ haʼ ndə a leʼnə bəliŋ-ba ndə bɔ̂ŋ nɔʼ kə bɛ́ŋ Nyii tə́nə ndəŋ ŋgie-shʉəŋ-kə ndə i gwè hə kəghɔ-Jiso. A nɔ kie ndə mələ̀ʼtə haʼ Nyii. Bʉʼka ŋ̃gie-shʉəŋ-kə ndə ĩ gwè hə kəghɔ-Jiso, nɔ kɔ́ yɔŋ kɔ́ ghʉəʼkə tʉ bʉə ndə məlɔ̀ʼ ŋgieNyiikə."

11 Ndʉʉmɛ, mɔ nyíɛ ndə yuo ŋɔ́ʼnə, mɔ nyíɛ nyaa-bəkatə kəfyuʼ. Wo ndə ɔ kə dùʼ ndəŋ ghɔ, bə kə́ tíi ɔ nə Wo kəŊgie Shʉəŋ leʼnə Shʉəŋ, ɔ bɔŋ-kə́-leʼ bɛ ndyʉndyʉ ndə məchʉ̀ə ŋkwɛ, ghɔŋbə chɔ̂ ndə ɔ mɔ̀ʼ. 12 Shʉ-i kə́ bɛ nə leʼnə-viʼi-bə, ndəŋ bʉʼʉ-e, bɛnətə kə́ bɛ chɔ buŋmbi. Bə nyɔ̀ʼ yie ndəŋ ɔŋ, təmə wo bɛ ghɔ ndə ɔ kínə fɛ yaʼkɛŋ haʼ mbəŋ-ɛŋ. 13 Ɔ mɔ̀ʼ ndyihə mbʉə-ɔ ndə bə nɔʼ túɔtə mu fɔbʉəkə, yie ndə bə kə tíi ɔ nə yɔŋ, kə́ bɛ mbʉ kəŊgieNyii. 14 Bəsɔge yuo, kə́ gɛ̀ hə bɔ̌ŋ ɔŋ ndəŋ bənyaa bəkatə kəfyuʼ mɔ̀ʼ vaa mbʉətə ndyi-kəfyuʼ-chɛŋ-hə mbʉə-bɔŋ, ndə i bɛ tʉ́ʉnə. 15 Setə-chyʉ́ʉchyʉ́ʉ-kə fyú hə chu-ɔ ndə i bɛ ndə məgwúu lɔʼ-bətə̂ŋ-tə ghɔ́ʼ bɔŋ. Ɔ bu kə́ sɔ́ʼ bɔŋ nə ŋgwɔŋ kətəŋ, ɔ bu fyúhə fyiighɔ́ʼnə Nyii, ndə ɔ bɛ wo ndə ɔ kie ghʉəʼkə inchəŋ i bu kè nə ndʉʼmə ndə bə lyúʼ mu kəŋkyʉʉ ndə bə bɔ́ŋ ndə mə-kə́-lyúʼ ntɔŋmə muŋgɔ. 16 Ndəŋ ndyihə-i leʼnə yʉʉkə-i, bə nyɔ̀ʼ yie-ɔ̄ chɔ mbɔ Fɔŋ bəfɔŋ leʼnə Tiekətʉ bətiekətʉ.

17 Ndʉʉmɛ, mɔ nyíɛ wontəŋNyii, ɔ kə́ tə́nə ndəŋ sʉʉchi, ɔ kə́ tíi nuɔmə inchəŋ ndə bɔ̂ŋ tíe kɛŋ mu yuo nə gyʉʉ dədə mbɔ, "B̈ii gwè, b̈ii chə̀ŋtə gwè yú fɔyubə ndə Nyii nɔʼ shʉ̀tə, 18 ndə məgwè kwó mbɔʼ-mbʉə bəfɔŋ, mbɔʼ-mbʉə bʉəkwɛʼtəŋ bəsɔge, mbɔʼ-mbʉə bʉə shʉ́əshʉ́ə, mbɔʼ-mbʉə bənyaa bəkatə ghɔŋbə bʉə ndə bɔ̂ŋ kə́ kóʼ ndəŋ bɔŋ leʼnə mbɔʼ-mbʉə bʉə bənchəŋ, bʉə ndə bɔ̂ŋ gòʼ təmə bɛ fʉəhə fɛ ghɔŋbə bʉə ndə bɔ̂ŋ bɛ fʉəhə, vâaŋgwehə ghɔŋbə vâa-fɔŋ."

19 Mɔ leʼ nyíɛ mbʉ nyaa bʉəbʉə ghɔŋbə bəfɔŋ kəchisê ghɔŋbə bəsɔge-bʉə chə̀ŋtə ndə məmɔ̀ʼ wo ndə ɔ kə dùʼ ndəŋ nyaa-bəkatə nə chɔ̂ ghɔŋbə bəsɔge-bi. 20 Bɔ̂ŋ yá mbʉ nyaa bʉəbʉə ghɔŋbə mbʉ yʉkəŋgieNyii nə mbii ndə ɔ kə́ chìi nubəcheʼbə bəshʉ mbʉ nyaa bʉəbʉə. Nɔ kə bɛ nə nubəcheʼbə-ɔ̄ŋ ndə ɔ kə fə́ʼhə bʉə bənchəŋ ndə bɔ̂ŋ nɔʼ kə fí cheʼ-mbʉ-nyaa-bʉəbʉə-kə chutəyi-bɔŋ bɔŋleʼ kə́ lə̀ʼtə fɔ-kɔ́ŋ-kə ndə bɛ finə-i. Bə mɛ̀ʼ bɔŋ bəbûu ŋɛnə mu taanə-viʼi-kə ndə i kə́ kyʉ́ʉ kie yɔʼ-məkɔŋ-kə. 21 Bə síitə bəʼ-bʉə-kə nə setəkə ndə i fyú hə chu mbʉ wo ndə ɔ dùʼ ndəŋ mbʉ nyaa-bəkatə, mbʉ mənuɔ bənchəŋ chʉ́ʼtə mbɔʼ-yʉə tə yuo.