1 Ndʉʉmɛ, mɔ nyíɛ ibɛʼ-yə wontəŋNyii shʉ́əshʉ́ə, ɔ kə́ shíʼ gwè hə yuo, bə lʉ́əŋtə ɔŋ mu kəmbɔʼ, ŋkwunduŋ leʼ kǐa kətʉ-ɔ, mbe-shʉ-i kə́ bɛ nə chichi, fʉəŋtə-i kə́ bɛ nə tɛʼnə-viʼi-bə. 2 Ɔ yá vaa-ŋwɔʼnə kəghɔ-ɔ, i kə́ bɛ iŋɔ́ʼnə. Ɔ tʉ́ʼ kwii-fʉəŋ-mɔʼnə-i ndəŋ muukwɛʼtəŋmə, tʉ́ʼ kwiiŋkwie njəŋmbi. 3 Ɔ tíi nə gyʉʉ dədə nə bʉʼ sɔ́ʼ le. Ndʉʉ ndə ɔ tíi, mbʉ təfuu yuo təkwiitia bɔ̀ʼtə. 4 Ndʉʉ ndə mbʉ təfuu yuo təkwiitia nɔʼ kə bɔ̀ʼtə, mɔ bɛ ndə mənyɔ̀ʼ nubə ndə mɔ yʉ́ chɔ, bɔŋ mɔ yʉ́ gyʉʉ ndə i gwè hə yuo kə́ ghɔ̀ŋ mbɔ, "Lə̀ŋ nukə ndə fuu-yuo-tə təkwiitia ghɔ̀ŋ, kə a mə nyɔ̀ʼ fɛ."

5 Mbʉ wontəŋNyii ndə mɔ nɔʼ kə nyíɛ ɔŋ, ɔ kə́ tə́nə ndəŋ muukwɛʼtəŋmə bɔŋleʼ tə́nə njəŋmbi le, chɔ̀ʼhə kwiimɔʼnə-i kɔ́ nə yuo, 6 kàa nukə yie-Nyii ndə ɔ chí mbi təmə liʼ-i ghɔ fɛ, ndə ɔ chìi yuo ghɔŋbə fɔbə ndə i bɛ chɔ, chisêkə ghɔŋbə fɔbə ndə i bɛ chɔ, muukwɛʼtəŋmə ghɔŋbə fɔbə ndə i bɛ chɔ. Ɔ ghɔ̀ŋ mbɔ, "Nubə bieleʼ kwìhə fɛ. 7 Bɔŋ ndʉʉ ndə mbʉ wontəŋNyii ndə ɔ tyúnə bɔ̌ŋ fəŋ ndəŋ vɛʼ təkwiitia tʉ́ʉ yi-yə gyʉəʼə, nubə ndə Nyii nɔʼ nə shʉ̀tə i kə bíe mu bəliinə bu fyú sê inchəŋ, haʼ ndə ɔ nə lɔ̀ʼ tʉ vaafɔ̀ʼ-bi ndə bɛ bʉəyʉkəŋgie-bi."

8 Ndʉʉmɛ, mbʉ gyʉʉ ndə mɔ nɔʼ kə fəŋ yʉ́ yuo le, bìʼ kwə́ʼ tʉ mɔ, ghɔ̀ŋ mbɔ, "Gɛ̀, fí mbʉ ŋwɔʼnə ndə i bɛ ighʉ́ʉnə hə kəghɔ mbʉ wontəŋNyii ndə ɔ tə́nə mu muukwɛʼtəŋmə bɔŋleʼ tə́nə njəŋmbi nɔ."

9 Nɔ, mɔ gɛ̀ tʉ mbʉ wontəŋNyii, téʼ tʉ ɔŋ mbɔ ɔ kɔ́ mbʉ vaa-ŋwɔʼnə tîetîe tʉ mɔ. Ɔ ghɔ̀ŋ tʉ mɔ mbɔ, "Kɔ́ kwó, i bu kə́ chʉ́ʼchʉ́ʼ mu bətɔ-a, bɔŋ bu kə́ sʉ́ʼnəsʉ́ʼnə mu chu-a nə yʉʉhə." 10 Mɔ fí mbʉ vaa-ŋwɔʼnə tîetîe hə kəghɔ mbʉ wontəŋNyii, kwó. I kə́ sʉ́ʼnə nə yʉʉhə mu chu-mɔ, bɔŋ ndʉʉ ndə mɔ mì, i chìi tɔbə-ɔŋ i kə́ chʉ́ʼchʉ́ʼ.

11 Ndʉʉmɛ, bə shyíi mɔ mbɔ, "A nɔ kie ndə mə-bìʼ-téʼ ntəŋ ndə i gwè hə kəghɔ-Nyii te bie-bʉə-hə buŋmbi, leʼnə lɔʼ-bətə̂ŋ-tə, leʼnə ŋgie-bətə̂ŋ-bə ghɔŋbə bəfɔŋ."