1 Yɔ̄ŋ-yə kʉ̂ʉ tíŋ, mɔ nyíɛ ibɛʼ-yə wontəŋNyii, ɔ kə́ shíʼ gwè hə yuo, kie fɔŋ kəghʉəʼ ndə məsɔ́ʼ, məŋwɔʼmə-i chìi chisêkə báa. 2 Ɔ tíi nə gyʉʉ shʉ́əshʉ́ə mbɔ,

"Ɔ nɔʼ gwù, Babilɔŋ, ndə ɔ bɛ fɔŋ kəyəŋkwɛʼtəŋ nɔʼ gwù!

Ɔ nɔʼ bə̀ŋ yəŋkə ndə lyʉʉhəbʉəbʉəbə tʉʼ chí chɔ.

Ɔ nɔ bɛ chəŋ bəlyʉʉhə nyàatə,

kə́ bɛ chəŋ mənuɔ bʉəbʉə,

kə́ bɛ chəŋ nyaa-bʉəbʉə-hə ndə bə nɔʼ bìe mɛ̀ʼ.

3 Bʉʼka lɔʼ-bətə̂ŋ-tə inchəŋ nɔʼ búu

bʉʼka ndʉʼ-məntɔ-shʉ́əshʉ́ə-bəsəŋ-mə-i.

Bəfɔŋ kəchisê nɔʼ gháa bəsəŋ ghɔŋ ɔŋ.

Bʉə-mbɛʼnə-kəwʉʉnəmbi nɔʼ kie fʉʼkə bʉʼka ntɔmə ndə ɔ kie ndə məkie nchuɔ daa."

4 Ndʉʉmɛ, mɔ bìʼ yʉ́ ibɛʼ-yə gyʉʉ ndə i gwè hə yuo kə́ ghɔ̀ŋ mbɔ,

"Bʉə-bɔŋ, b̈ii fyúhə ŋwɔŋ-yii hə mbʉə ɔ.

Kə bii bɔŋ mə fúu nuɔ ndə bʉ̂ʼʉ-e fɛ,

byuunɔ təmə bii ɔ bu nyíɛ ŋgʉəʼ mɔʼɔ.

5 Bʉʼka bʉ̂ʼtə-i nɔʼ kóʼhə də̀ʼ tə bɛ nə yuo,

Nyii nɔʼ kwɛ́nə nu-bʉəbʉə-bə-i.

6 B̈ii fɔ̀ʼ ntɛ-kənu tʉ ɔŋ ndə ɔ nɔʼ fɔ̀ʼ tʉ bəbɛʼbʉə.

Bʉ̀nə tyú ntɛ-bənu-hə tʉ ɔŋ ndə ɔ nɔʼ fɔ̀ʼ vɛʼ bûu.

B̈ii fìnə ndʉ̂ʉ-i, i shʉ́ə tíŋ yi-yə ndə ɔ kə fìnə kɔ́ tʉ bəbɛʼbʉə vɛʼ bûu.

7 Ɔ nɔ kə́ kɔ́ kuŋhə tʉ ŋwɔŋ-ɛŋ bɔŋleʼ kə́ tʉ́ʼtə nchuɔ mbʉə-ɔ buŋmbi.

Nɔ, bʉ̀nə tyú ŋgʉəʼ ghɔŋbə məvínə tʉ ɔŋ haʼ ghʉə ghɔ.

Bʉʼka ɔ nɔ gìe mu fyii-ɔ mbɔ,

‘Mɔ nɔ dùʼ ndəŋ kʉəkə-ɔŋ nə wontoʼ chufu,

bʉʼka mɔ kie woləŋ fɛ,

mɔ kʉʉnə bɛ kwuʼ woke ndə ɔ tʉʼ lí kwú ləŋ-ɛŋ fɛ.’

8 Bʉʼka yɔ̄ŋ-yə, ŋgʉəʼ bu shíʼ ndəŋ ɔŋ chîkə imɔʼ,

kwú, məlí kwú leʼnə chyʉʉ.

Bə bu tɔ̀ŋ ɔŋ nə viʼi,

bʉʼka Nyii Tiekətʉ ndə ɔ chʉ̀ə ŋkwɛ-ɛ nɔ shʉ́ə daa."

9 "Bəfɔŋ kəchisê ndə ghɔŋ bɔŋ kə́ gháa bəsəŋ bɔŋ-nɔʼ-leʼ kə́ yú nchuɔ ndə ɔ kə kie yɔ́ŋyɔ́ŋ bu gwía bɔŋleʼ tíitə ndʉʉ ndə bɔ̂ŋ bu nyíɛ ndyʉʼkə ndə i tʉʼ kóʼ ndəŋ ɔŋ ndə ɔ tʉʼ kyʉ́ʉ. 10 Bɔ̂ŋ bu tə́nə dɔdɔ kə́ fàa ntɛ ŋgʉəʼ ndə ɔ bɛ muŋgɔ, ghɔ̀ŋ mbɔ,

‘Ŋgʉəʼ, ŋgʉəʼ bu gwè tʉ a ntyʉʉ təka,

Oo Babilɔŋ, yəŋkwɛʼtəŋkə ndə a shʉ́ə daa!

Bʉʼka haʼ ndə vaa kəkʉʉ mbi məniʼ,

Nyii nɔʼ chʉ̀ə ŋkwɛ-a.’

11 "B̈ʉə chìi mbɛʼnə kəchisê gwía bɔŋleʼ lí ɔ, bʉʼka wo bieleʼ nyúɔ fɔbə kəghɔ-bɔŋ fɛ. 12 Wo bieleʼ nyúɔ fɔbə nə goo, siliba, fɔ-ŋgwuŋ-bə, vâa mbʉətə ndyi-kəfyuʼ-hə, ndyi-kəmbuu-fʉ́əŋ-hə, ndyi-chuɔŋ-chyʉʉchyʉʉ-hə, ndyi-kəmbuu-buuŋ-hə, fɔbə inchəŋ ndə bə chìi nə tyʉkə ndə i kie yɔʼ-jyujyu-kə, ntɛ-bəfɔ-hə inchəŋ ndə bə chìi nə gyʉəʼə səŋ, ntɛ-bəfɔ-hə inchəŋ ndə bə chìi nə tyʉkə ndə chuɔŋ-ɛŋ chyʉʉ, fɔ-kətəŋ-bə ntɛntɛhə, təŋ-kəmbuu-kə leʼnə ŋgoʼ bənyɔʼbənyɔʼ, 13 fɔ-núu-bəfɔ-bə ndə bə tíi nə sinamɔŋ, vâa-bəfɔ lùŋnə ndə bə núunə fɔbə nə yɔŋ, lyiikə, ŋgwo-lùŋ-mə ndə bə tíi nə məə ghɔŋ flaŋkisɛŋ, ndʉʼmə ghɔŋbə ŋgwomə, mbʉ̂ətə búɔnə leʼnə lɛshi, bənaʼa ghɔŋbə binjyʉʉhə, bənyaa bəkatə, bəmatu chɔ̂ ndə tʉʼ dùu bənyaa bəkatə, leʼnə fʉəhə ndə bɛ bʉəməsʉʉ. 14 Mbʉ bʉə-mbɛʼnə ghɔ̀ŋ mbɔ,

‘Fɔbə inchəŋ ndə a kə kʉ̀ʉ,

nɔʼ gɛ̀.

Nchəŋnchəŋ fɔ-chuɔŋ-chyʉʉchyʉʉ-bə-a ghɔŋbə fɔbə ndə i chìi a bʉ̀ʉ

nɔʼ gɛ̀ təmə a bieleʼ nə nyíɛ fɛ

i bieleʼ nə bɛ ya-yə fɛ.’

15 "Bʉə-mbɛʼnə ndə bɔ̂ŋ kə fɛ̀ŋ fɔbə-ɔ̄ŋ tʉ ɔŋ kə́ kie kyʉə yɔ́ŋyɔ́ŋ kəghɔ-ɔ, bu tə́nə dɔdɔ, kə́ fàa ŋgʉəʼ ndə ɔ tʉʼ nyíɛ, kə́ gwía bɔŋleʼ tíitə nə ghʉəʼkə mbɔ,

16 ‘Ŋgʉəʼ! Ŋgʉəʼ tʉ a yəŋkwɛʼtəŋkə ndə a shʉ́ə daa!

Ndə bə nə mɔ̀ʼ vaa-ndyi-kəfyuʼ mbʉə ɔ, leʼnə ndyi kəmbuu fʉ́əŋ leʼnə ndyi kəmbuu buuŋ,

bə chìi ŋgwuŋ mbʉə-ɔ nə goo leʼnə bəbɛʼfɔ-ŋgwuŋ-bə!

17 Bʉʼka haʼ ndə vaa kəkʉʉ mbi məniʼ, nchəŋnchəŋ nchuɔ-ɔ̄ nɔʼ bɛ njʉnjʉ!’

"Bʉʼka bʉə bənchəŋ ndə bɔ̂ŋ kie buukwɛʼtəŋbə ghɔŋbə bʉə ndə bɔ̂ŋ tʉʼ lɔ̀ʼ kóʼ, bʉə ndə bɔ̂ŋ tʉʼ té ghɔŋbə bʉə bənchəŋ ndə bɔ̂ŋ tʉʼ chìi mbɛʼnə mu muukwɛʼtəŋmə, tə́nə dɔdɔ 18 kə́ gwíatə ndə bɔ̂ŋ tʉʼ nyíɛ ndyʉʼkə ndə ɔ tʉʼ kyʉ́ʉ i kə́ kóʼ ndəŋ ɔŋ, bɔ̂ŋ ghɔ̀ŋ mbɔ, ‘Bɛ yɔ̂ŋ-yə yəŋkwɛʼtəŋbɛʼkə ndə i nɔʼ nə bɛ nə yɔ̄ŋ-yə?’ 19 Bɔ̂ŋ véʼ vɛŋ-yʉə kə́ gwía bɔŋleʼ lí kə́ ghɔ̀ŋ mbɔ,

‘Ŋgʉəʼ, ŋgʉəʼ ndəŋ fɔŋ kəyəŋkwɛʼtəŋ ndə i shʉ́ə daa,

ndə bʉə bənchəŋ ndə bɔ̂ŋ kə kie buukwɛʼtəŋbə mu muu kə kie fʉʼkə bʉʼka ɔ.

Bʉʼka haʼ ndə vaa kəkʉʉ mbi məniʼ, ɔ nɔʼ nʉ̀ʉ fuŋ.’

20 T̈ʉʉ-yii kə́ bʉ̀ʉ ndəŋ bɔŋ, Oo bʉə ndə bii bɛ yuo

leʼnə bii bʉə-Nyii, bəlɔntəŋNyii ghɔŋbə bʉəyʉkəŋgieNyii!

Bʉʼka Nyii nɔʼ kia chʉ̀ə ŋkwɛ-ɛ bʉəbʉə bʉʼka bii!"

21 Ndʉʉmɛ, wontəŋNyii ndə ɔ shʉ́ə daa chɔ̀ʼhə ŋgoʼ ndə i bɛ nə lɔkɔʼ tê, mɛ̀ʼ mu muukwɛʼtəŋmə kə́ ghɔ̀ŋ mbɔ,

"Babilɔŋ ndə i shʉ́ə daa, bə bu mɛ̀ʼ ɔŋ nə ghʉəʼkə haʼ mənɔ sê,

təmə bə leʼnə nyíɛ ɔŋ fɛ.

22 Gyʉʉ ŋkyitə ghɔŋbə gyʉʉ kəlyuu, bʉə tʉ́ʉ vâandʉ̂ʉ ghɔŋbə gyʉəʼə-vaa

təmə bə leʼnə yʉ́ mu bii fɛ.

Təmə bə leʼnə nyíɛ mu bii wo ndə ɔ tʉʼ chìi ntɛ-kəfɔ təmiyɔŋ fɛ.

Təmə bə leʼnə yʉ́ gyʉʉ tê mu bii fɛ.

23 Kɛʼɛ bieleʼ nə báa mu bii fɛ.

Bə bieleʼ nə yʉ́ gyʉʉ vaabələŋ ghɔŋbə vaabəke ndə bɔ̂ŋ tʉʼ chìi lɔŋ mu bii fɛ.

Babilɔŋ, bə bu bʉ́əhə a bʉʼka bʉə-mbɛʼnə-lɔʼɔ-ba nɔ nə bɛ fɔŋ bʉə bɔŋleʼ kə́ bɛ bʉə-tʉʉ kəchisê,

bɔŋleʼ bʉʼka a fə́ʼhə lɔʼ-bətə̂ŋ-tə inchəŋ kəchisê nə fê-a.

24 Bə nyíɛ fɔbʉə-bʉəyʉkəŋgieNyii-bə ghɔŋbə bʉə-Nyii

leʼnə bʉə bənchəŋ ndə bə nɔʼ nə gwìatə bɔŋ kəchisê yítə mu kəghɔ-ɔ."